電子神童

別了

2009-07-02T19:33:00.001+08:00

呢一排返早之前成日眼光光等天光, 就算瞓得著都係個零鐘, 所以起身返早係好痛苦. 唯一嘅舒緩就係巴士上有 Shure SE530 同 iPod touch 呢個靚聲組合, 每次聽都好享受!! 正如好耐之前提過 iPod Shuffle 推出後, 我將 32GB MP3 random 咁 play, 今朝就聽到孫耀威一首未聽過嘅新歌 --- 眼閉, 好好聽!! 可惜呢首歌冇 MV... 一路搭車一路諗吓今晚響度記低首歌, 同時亦考慮將呢度劃上句號...

不經不覺呢個 blog 都寫咗四年, 都應該係時候休息吓. 原因係呢一排冇乜心情又有啲懶, 唔想有交功課心態去寫, 又唔想超過一個星期都唔 update, 所以唔係咁想再寫落去... 呢次停幾耐我唔知, 睇心情啦... 一個月唔定一年唔定又或者唔會再寫都唔定... 點都好, 好多謝大家支持, 尤其是果啲齋睇唔出聲嘅朋友, 最後祝妹妹阿 Milk 今日生日快樂, 佢話佢間唔中都有入嚟睇架.

文化

2009-07-01T14:44:00.001+08:00

拖咗三個月終於可以到惠州影相! 全因為就天氣就假期搞到咁遲... 值得一提行程途中我地被司機帶咗去一個小鎮食 RMB$8 煲仔飯. 味道真係唔錯, 只係三十幾度冇風扇冇冷氣之下食真係幾難忘... 仲有我參觀過佢地嘅廚房, 一如所料衛生欠佳, 洗碗果盤水啡色嘅, 好似黃泥水咁!! 最後, 司機未經我地同意改咗影日落嘅地點由大東海去咗大亞灣 (核電廠??) 一個冇地平線日落嘅海灘... SHIT!!!

國內同胞啲文化真係接受唔到到, 同佢地公司投訴永遠都好好禮貌咁耍你, 乜都話得得得, 但永遠唔同你跟進, 個個 A 字搏! 衛生又係咁, 十年如一日差到嘔... 仲有揸車又係亂咁嚟, 坐佢地車其實好得人驚!! 呢啲文化我諗唔係呢十年八載改變到...

巨星隕落

2009-06-28T23:34:00.002+08:00

好多巨星都突然英年早逝, Michael Jackson 唔算係我偶像, 不過我都好鍾意佢啲歌同跳舞. 佢同其他歌星一樣, 一死就間間 DVD 舖都播佢啲 concert, 個個都圍住睇, 未死之前又唔見係咁, 永遠都係咁諷刺!!

呢幾日四圍播佢啲歌, 但好似冇乜人提或者識呢首情歌. 我唔算係粉絲, 不過都有佢嘅 MP3 同 DVD 收藏, 慢歌嚟講呢首最鍾意!!

跌眼鏡

2009-06-25T23:53:00.001+08:00

賴輝上次元朗團之後已經話想再上大漁食鐵板燒順便睇單車, 不過最後咕咕提議試新嘢, 同樣係鐵板燒日本料理叫鳳山鐵板燒日本料理, 型式其實同我嘅至愛大漁差唔多, 只係多啲垃雜嘢食例如生蠔咁解... 任食當然喪叫, 食物質數一流, 個個都讚不絕口! 只係唯一一樣係冇大漁咁就腳…

行程另一個目的當然睇單車, 目的地一樣係樂園路同華強南路. 樂園路一向有個開驚人價嘅賣點. 今次唔例外, 口痕問吓標 RMB$9500 嘅 Dahon Mu SL, 佢地一開就 RMB$5800, 冇得再還價亦唔預你還! 計返港幣 $6600, 我自己都嚇咗一跳!! 不過冷靜落嚟諗吓再買多架托咩!! 咁算啦… 但全場最孤寒嘅小龍竟然話買, 仲係實牙實齒果隻, 即時令全場大跌眼鏡!! 可能上次元朗一役, 佢發現輕量化嘅車會踩得輕鬆啲... 而大洗嘅我竟然一啲收穫都冇!!

見到小龍有新車我都戥佢開心, 哈哈! 真係毒海無涯!

征服

2009-06-20T18:32:00.005+08:00

上次遠征元朗大敗入廠, 一直耿耿於懷, 對以後落斜有好大陰影, 亦都對小輪徑性能失去信心... 直至打造完 26" 旅行車後, 心思思想再試一次!!

由於成日同小龍佢地一齊出車, 影埋啲相會 send 比一啲玩單車嘅朋友, 就係咁, 同事人山個幾月前已經叫我搞單車團, 因為佢今個月放大假. 心裡第一個 idea 就係元朗, 第二個 idea 就係唔行林錦公路.

天公總算做美, 係一到河上鄉豆腐花廠先落咗大半個鐘狗屎, 及時避過一劫, 其餘時間都冇雨. 之前果晚唱完 K, 成三點幾先瞓, 跟住 0800 出發到大圍集合食早餐玩到 2320 先返到屋企, 全程約 110KM, 攰到飛起但個個都話好玩!! 真係多謝大家比面出席, 同時亦都要多謝帶路嘅電鋸同賴輝!! 今次最勁有兩個人, 小龍單餅負重磅唔使推車走完全程; 第二個係阿賢, 同我地大圍至元朗不特止, 佢由油痲地屋企經大埔道入大圍都係踩, 回程都係踩返屋企, 真痴線!!

大家玩得開心我仲開心, 尤其是事後收到阿衡同人山嘅 SMS. 搞團大家開心反而係其次, 最重要係安全同個個平平安安返到屋企, 我係過來人深深體會到呢點... 所以有個問題係踩單車徑冇乜所謂, 但踩街我始終建議大家買返頂頭盔好啲. 其實好多人都冇, 我同朋友嘅團係咁, Facebook 果幾次 Dahon 團又係咁, 十個得兩個帶就響馬路四圍踩... 我上次出事之前都認為唔係咁必要. 回程同阿衡見到一個七十幾歲嘅阿伯帶住頭盔踩車, 原來佢識嘅, 佢話個阿伯日日走三轉唔知沙田至大埔定邊, 日日三轉喎!! 有一次炒車撞到個頭昏迷咗幾日, 之後就開始帶頭盔... 真係針唔吉到肉唔知痛!!

終於都征服咗元朗, 用征服對好多車友嚟講好似誇咗啲, 對我就唔係. 頭先同阿衡響電話傾開佢話下次想搞個萬宜水庫東壩日出團, 等我計劃吓先... 夾大家時間同天氣最難搞!!

升級

2009-06-18T13:28:00.008+08:00

Olympus E-P1 係將史前 Olympus Pen 現代化, 雖說 Micro 4/3, 但唔係特別細部, 原先想將佢代替 Ricoh GR Digital II, 不過有幾樣嘢令我卻步. 第一就係冇內置閃燈, 作為隨身機唔夠全面; 第二兩支鏡都唔太啱心水; 第三就係太貴. 諗諗吓 Micro 4/3 市場係針對有少少要求又嫌 DSLR 大部嘅人用, 代替唔到 DC 仔同 DSLR. 反而之前我覺得勁樣衰嘅 Panasonic Lumix G1, 細心研究之後發覺同樣 Micro 4/3 佢好玩好多. 主要係 flip LCD 同強勁嘅 EVF, 不過就衰在冇機身防震. 如果我冇 Panasonic Lumix L1, 我會入呢部做旅行機. 細心啲諗 Panasonic 用縮水 DSLR 做外型似乎係想話比全世界知, 冇 DSLR 反光板呢個包袱, 可以整部咁嘅換鏡嘅數碼相機出嚟, 彷彿係對將來數碼相機一個革命.

Pentax K-7 終於開始響各大電器舖做 demo, 淨 body 差唔多一皮嘢, 莫財但好想快啲擁有, 有時間去試試先!!

抓拍皇道

2009-06-13T17:58:00.008+08:00

見細佬買咗支 PENTAX DA 21mm F3.2 AL Limited 有啲心癢癢, 之前唔太鍾意呢支鏡, 唯一嘅原因係嫌光圈唔夠大. 不過焦段響 APS-C 嚟講約 32mm, 慣咗用 28mm 嘅 Ricoh GR Digital 2 snap 嘅我非常啱用, 加上特別喜歡 Pentax Limited 鏡嘅質感同體積小, 而且 Pentax 唔知係唔係廠方自信新機太強, 所有鏡加哂價, 特別係 FA 鏡如三公主, 加幅特別嚇人, 最後好彩仲可以以舊價入手呢支掃街鏡. 之前求其試咗一晚真係好用, 我仲發現近攝食物都可以, 掃街真係一流!! 如果配合體積更細嘅功能更強嘅 Pentax K-7, 真係玩 snap 嘅強勁組合.

我部 Ricoh GR Digital II 有出名嘅入塵問題, 一收細光圈顯然易見, 整就未必因為驚再入塵. 有考慮 Panasonic LX3 代替, 不過想睇埋六月十六日 Olympus 發佈嘅 DC 型 micro 4/3 機先. 講真, 睇睇吓 Pentax K-7 想一出即入, 用佢嚟 snap 又如何呢?

後悔

2009-06-12T23:30:00.001+08:00

一朝早七點半收到細佬電話, 由於沉晚收夜, 一反到屋企洗衫浪衫洗埋車, 早上四點半開開心心咁上床... 所以收到電話正直半夢半醒之間... 佢同我講 dotcom 唔得, 我第一個反應就問點解會咁?? 實在太突然因為佢不嬲冇乜問題... 原來佢急性腎衰竭, 冇得醫, 所以要人道毀滅...

回想返都唔係冇先兆, 佢差唔多一年前開始無啦啦響樓上賴尿, 由於佢不嬲都好乖, 由細到大都唔會四圍疴, 我地以為佢忍唔住, 所以會鬧吓佢. 呢幾個月間唔中都係咁, 咁兩星期前爸爸仲綁住佢響天台罰佢, 係咁多年都未試過... 咁我又扮鬧佢, 因為一鬧佢佢就矇起對眼好得意. 扮?? 我其實唔捨得真鬧佢, 佢真係好乖. 唉!! 佢唔舒服又唔識講比我地聽, 所以我地好後悔罰佢鬧佢. 佢臨走之前兩日我收夜返屋企, 佢響門口扒響地下望住我, 我好攰同佢揮下手就上咗樓上, 估唔到果次係最後一次見佢... 我好後悔冇攬吓佢摸吓佢呀!!

佢死得早過我地, 我接佢返屋企第一日已經清楚知道, 話雖如此, 咁突然同一旦要面對真係好難過. 以前 Linda 走我都好難過, 雖然有經驗, 亦知道時間可以冲淡, 但至今我仲會諗起 Linda, dotcom 即都會係一樣...

我地有好多生活點滴, 唔想寫, 我會記住... 寫呢篇我要成個星期先有勇氣寫完, 我地全家都好唔捨得佢!!

身痕

2009-05-31T23:24:00.004+08:00

對於兩位買咗新車嘅車主, 成日都搵人出車. 今晚又有個 hea 車團, 冇咩特別目的地, 上吓大壩食吓晚食. 呢次去咗大尾督第一檔 BB 開心棧, 叫咗幾味再食埋甜品芒果布甸, 非常滿足同開心. 最後大隊送賴輝同阿賢到大圍搭火車, 咁就結束七十公里嘅行程.

清潔

2009-05-27T02:50:00.006+08:00

我好錫車, 每一次出完車都會洗乾淨, 有時會打埋臘. 通常簡單嘅如 set 吓 brake 換吓呔都自己搞吓, 其他就落單車舖. 最近架 LG 條鏈有少少嘈, 比阿偉睇佢話冇嘢!! 好啦, 叫佢幫我落少少鏈油啦, 佢又話唔使. 真實我啲車好少落鏈油, 咁不如自己買支自己搞. 去咗屋企附近單車舖買咗支 Finish Line WAX Lubricant (KryTech), 車友通常喜歡用 Finish Line, 佢地有幾款, 我呢隻屬於乾性, 因為考慮到香港天氣比較濕. 落油之前用 WD-40 同布清潔好啲污糟嘢, 跟住一路轉個 crank 一路滴少少就得, 唔使咁多. 落咗幾日大雨下晝叫好天少少, 終於可以走返轉試吓個效果. 嘩!! 真係順哂靜哂!! $35 咁大支真係抵有排滴, 尤其是我有三架車實用得著.

講開清潔, 部 laptop 攞返嚟第一件事就還原個 clone harddisk, 之前幾次都冇事, 不過呢次就出咗個妖怪問題, 就係 drive letter 無啦啦自己轉咗唔係 C drive, 修復 WinXP 雖可正常開機, 但成個 WinXP drive letter 同 clone harddisk 調轉咗, WinXP 可以正常 bootup, 但由於之前啲 software 係裝響 C:, 而家有好多都有問題. 於是 clone 返個 backup, 然後用部超慢 PowerMac 上網搵方法搞, 搞衰咗又再修復 WinXP 反反復復十幾次, 足足三日終於放棄唔想再浪費時間... 咁執著主要係唔想重新裝過哂所有嘢, 不過諗返轉頭如果一開始試幾唔得就當機立斷重新嚟過, 可能兩日就搞掂哂.

努力重裝咗一日, 而家總算搞掂哂. 個 clone harddisk data 雖然有 drive letter 問題, 不過 email 同我的文件所有嘢都可以過返, 而家終於可以開開心心咁用電腦, 之前有啲小問題由於重裝, 所以冇哂!! 當係比個機會清潔吓部電腦啲垃圾 data 都未嘗唔好嘅...

冇 laptop 用果幾日, PowerMac 就成為我主要上網工具, 不過佢真係太慢, 我頂唔順... 反而我用部 Nokia 5800 XpressMusic 經我屋企 WiFi 上網仲爽仲快. 佢個 browser 好正, 睇 You Tube 又掂又可 fullscreen, 我去開果啲 forum 用筆劃輸入中文出 post 又得, Facebook 仲好過我響 Dopod U1000 用 Opera Mobile 上流動版, 我直頭試過帶上床玩到瞓著為止!! 呢部機今時今日買真係超值, widescreen 拍片又清又超慳電, 而且之前新出果陣嘅問題同 bugs 都 fix 哂咁滯. 期待下個月同樣行 Symbian S60 v5.0 嘅旗艦機 Nokia N97 一出, 真係可以同 htc Touch Pro 2 有得打.

之前好努力去搞部 laptop 我當時認為自己好堅持, 相信只要唔放棄, 一定可以比我搞掂. 響呢件事我體會到堅持同執著似乎係一線之差, 結果發現有時唔咁執著反而係一件好事...

成熟

2009-05-22T01:13:00.016+08:00

相機主流品牌 Canon 同 Nikon 一部都冇擁有過, 主流並冇令我隨波逐流, 主要我認為非主流為咗吸引用家而發明好多有趣嘅東東, Konica Minolta 嘅 Anti-Shake 就係其中一樣最具代表性嘅科技.

記得幾年前去宮峪駿三鷹博物館, 有對日本情侶叫我幫佢地影相, 佢地用一部 Pentax ist* DS, 當時我諗: "乜呢啲機都有人用嘅??". 對於 Pentax 就只有爸爸年青時用果部 Pentax Spotmatic 有印象, 數碼機冇一部睇得上眼, 直至 Pentax K10D 個 spec 流出, 當時用緊 Konica Minolta Dynax 5D 嘅我直頭比雷劈咁震憾, 心裡諗呢部必買!! 仲記得等佢出果幾個月真辛苦!! 証明品牌我唔太 concern... Pentax 嘅顏色係之前嘅 Konica Minolta 甚至而家嘅 Sony 係冇得比, Canon 同 Nikon 更加唔使講... 咁當然佢比唔上 Sony 嘅功能亦都有, 只係顏色我放第一位... 其次就係質感極高嘅 Limited 鏡, 攞上手把玩一番都好滿足, 簡直係藝術品!! 及後 Pentax 推出 K10D 強化版 K20D, 我 skip 咗, 反而用 K100D 嘅細佬 upgrade 咗, 強化咗嘅功能我不為所動...

早兩日發表咗 Pentax K-7, 並冇當年 K10D 嘩一聲嘅震憾, 但一樣有必買嘅念頭. 部機嘅功能其他品牌半專業機都有, 不過以下幾樣幾吸引我:

1. 起角嘅外型有別於 Pentax 之前所出過嘅 DSLR, 走返 Pentax MZ-3 果種路線, 鍾意到 set 哂 laptop 嘅 wallpaper 做官方 K-7 wallpaper, 殺死人!! 仲有鎂合金機身質感一流!!

2. 體積同 Pentax K200D 差唔多, 以往呢一級嘅 DSLR 如 Nikon D300 都一定大部, 而家終於比佢打破咗.

3. 同 Ricoh CX1 一樣可影 HDR 相片, 唔使後制, 高反差唔使怕.

4. Ricoh GRD II 其中一樣我最愛嘅功能電子水平儀當然唔少得.

5. 死穴 AF 速度同準確度大大提高.

6. 新一代防震加超聲波除塵.

7. 機身終於有輔助對焦燈.

8. kit 鏡 DA18-55 追加 weather resistant (WR) 版, 落雨粗用一流.

現只有高 ISO 表現係未知數, 如果都掂就冇得頂, 而家未有正式 samples 流出. 我相信冇完美嘅嘢, 不過呢部應該係 Pentax 最成熟嘅一部 DSLR, 因為佢似乎係針對以往嘅死穴而出. 除咗冇 flip LCD 外, 足以同曾經諗過入手嘅 4/3 機皇 Olympus E3 匹敵. 我想等半年跌吓價先入手, 希望忍到!! 最驚出埋正式版 samples 同去百老匯玩完後忍唔住...

傳染病

2009-05-15T01:12:00.002+08:00

單車病毒勁過豬流感, 擴散到身邊嘅人. 原因我估主要係而家啲車好靚同埋我地太少呢類健康活動. 呢次個初心者旅程雖然又係去到麻木嘅上水豆花廠, 主要比阿賢同賴輝去吓呢個必到嘅景點. 回程我地到大埔單車舖遊覽, 再約埋阿衡同豪仔到禾輋陳根記食晚飯, 成班車友兼舊同事聚一聚, 真係好玩!! 其實原本諗住入埋元朗, 不過都係下次先!! 呢次比佢地 warm up 吓先...

老友記

2009-05-09T00:01:00.003+08:00

Patrick 同 Oscar 佢地兩個我響澳門讀幼稚園已經識, 都好難得嘅一份友誼. Patrick 讀完小六就移民美國, 我就返香港讀書, Oscar 響澳門讀完中學之後就移民加拿大, 後來到香港發展. 最近 Patrick 到關島工作, 由於較近, 到香港機會多咗. 呢次返我地到東大門韓燒, 講返細個嘅趣事, 有啲我已經唔記得, 不過都好有趣好令人懷念!! 真想同佢地返澳門一次, 我都超過一年冇返過去...

佢地話會嚟飲我果餐, 太好了!!

毒發身亡

2009-05-08T01:28:00.002+08:00

部 laptop 又死底版, 死因似乎同上次一樣... 六百幾蚊續多兩年保, 之前換過底板 harddisk, 呢次師傅報價再換多次底板再換埋個 LCD 成個 assembly, 真係抵到爛!! 所以買 laptop 買多兩年保都唔區... 冇咗部 laptop 好唔方便, 因為部老爺 Mac 慢得要死, 連睇網頁都勁慢!! 好彩部機一個禮拜都唔使就有得攞, 都係多得高人相助!!

豪仔調去守馬料水, 所以想買架好啲嘅新車嚟返工, 佢心目中係新瓶舊酒嘅上一款 Dahon Jetstream P8, 換哂色印條龍上去就叫 Dahon Dragon, 真識做生意!! 我地約咗去深圳, 果度某啲車款比香港平好多. 去咗兩間 Dahon 專門店, 第一間係響華強南路, 所謂專門店, 成架車上上下下嘅 parts 佢地差唔多都有, 真係大開眼界. 咁果架 Dahon Dragon 其實除咗拉花唔係我杯茶外, 其他都 ok, 不過豪仔最後寧願比多少少買架新款 Jetstream P8.

第二間就係以前去過嘅樂園路, 記憶所及果度黑媽媽好山寨 feel, 印象麻麻. 呢次除咗煥然一新嘅裝修外, 仲有隔兩間舖開咗間 Dahon 招牌嘅舖頭... 嚴格嚟講佢主打賣 Dahon, 但時亦有少量 KHS 同 Birdy. 旅程中賴輝己經心思思想響華強南路入手 Dahon Speed Pro, 響樂園路老細竟然開價更平, 尤其是 Speed Pro TT 只係比 Speed Pro 貴 RMB$500, 佢雖然忍住咁返香港, 但恐怕都抵擋唔住...

新手

2009-05-06T22:27:00.006+08:00

踩咗單車差唔多兩年, 興趣有增無減, 影響到身邊嘅朋友一齊玩. 阿賢嘅參與令我有少少意外, 因為我認為佢冇與趣玩, 所以同佢好少提及單車嘅嘢, 只係間中 send 我出團嘅相比佢睇吓. 佢玩唔係因為受我影響, 佢係行開山突然想玩 off-road 所以玩, 但多個朋友成為車友都好開心.

於是梗係叫佢帶架車入嚟玩, 搵埋小龍一齊影吓相. 大尾督當然係新手第一個必到嘅地方. 我地途經海濱公園吓相, 響大尾督食吓嘢, 咁就玩咗成個下晝.

活著夢想

2009-04-30T17:17:00.004+08:00

豬流感爆發, 希望唔好搞到 SARS 咁大鑊就好...

好耐冇去過 Outback, 沉晚同 Kitty 佢地拆返餐勁!! 呢次食咗過之前咁多次都未食過嘅炸洋蔥花, 嘩!! 真係好食!! 到最後漏單嘅芝士焗薯條, 超級香口又脆, 果種好味令我非常享受, 直情有種 "活著真好" 嘅感覺!! 記得之前響度都有講過同樣感覺就係天氣清爽一路踩車一路聽歌好 relax 嘅時候. 今日唔知聽日事, 所以我成日主張享受人生, 趁而家身體健康健全... 致命流感又再襲擊人類, 有啲嘢都係唔好咁執著, 好似最近響公司令我有啲不快嘅事, 都係算把啦...

打造旅行車連最後嘅 Holux GPSport 245 都到手, 用 GPS logger 記錄低行程仲可以將行程中所影嘅相片用 GPS 記錄影相地點, 返到屋企可以用 Google Map 睇返成個路程同張相邊個地方影, 真係冇得頂!!

阿賢話想同我台灣環島單車遊, 同呢架旅行車去得成就正雖然阻力都唔少... 呢個一直都係我踩車後嘅夢想!! 再唔係踩大陸短線都好玩...

久別重逢

2009-04-29T15:08:00.010+08:00

呢十年用咗 Sony Ericsson 都好多個 model, 其次就係 htc. 對於 Sony Ericsson, 我都算係粉絲, 不過啱啱果部 W960i 實在令我太失望. keypad 壞整第一次時換個冇 backlit 嘅新 keypad 比我, 搞到我要整第二次, 第二次 parts 冇貨等咗足足兩個星期, 其間如果唔係自己有部珍藏 Ericsson T39mc, 真係冇電話用!! 其次用 Sony Ericsson 真係有啲悶, 咁啱 Catherine 部 W980i 又好垃圾, 於是一齊換 Nokia 5800 XpressMusic.

Nokia 我自 N8210 之後都冇用過佢地嘅手機, 原因係之前有一堆外型比較核突嘅機... 呢次入手呢部係響佢推出時已經好有興趣, 奈何 Nokia 由於反應太好, 響正式推出時將售價由預定 $3000 加到 $4000, 直頭受騙嘅感覺!! 等咗半年嘅今日, 終於回落到 $3000 呢個價位.

用咗一日, 我唔明大家都係 Symbian, 點解 Nokia 嘅 S60 v5.0 正過 Sony Ericsson 嘅 UIQ 3.1 咁多??? 介面佢打 iPhone 所以比 W960i 好唔奇, 對於 PC 嘅連接性同配套都咁正!! 至少 update firmware 唔會冇哂啲嘢先勁!!

老實講, 5800 介面某程度上比 iPhone 好而且有 multitasking, 介面靚嘅程度我又覺得同 iPhone 不相上下, 仲有拍片都唔差又可以拍 widescreen, 輸入法又正過 iPhone. $3000 有部咁全面嘅機真係無話可說!! 不過 iPhone 嘅 apps store 同 install software 方法都做得較好, 而且 multitouch 操作同外型都最好嘅...

有啲朋友好奇怪我點解咁背買呢一部, 一啲都唔似我. 事實上人老咗心態有少少唔同, 唔想買太貴嘅 gadget, 尤其是新出一定貴, 而且而家買有好多新機嘅問題都 fix 左. 所以傳說五月尾出嘅 Pentax 旗艦 DSLR K-7 我都唔會即買, 等返大半年跌吓價先.

唯一唔捨得 Sony Ericsson 一樣嘢, 就係之前用過嘅 P990i, W950i 同 W960i 有嘅 Jog Dial, 真係超好用!!

完全體

2009-04-27T23:03:00.005+08:00

之前幫襯沙田順利單車都係啲濕碎嘢, 呢次搵佢地搞套 Avid 油壓碟剎時同時又見到另一毒物 --- Race Face XC Deus. 呢套餅最吸引我就係紅色, 同一價錢嘅 KCNC K-type XC1 我考慮咗一陣就扑鎚!! 換餅同時換咗個舊款 Shimano Deore XT 波撥, 解決埋之前大陸波撥上落餅唔順嘅問題, 而家成架車輕哂餘仲完住襯哂色!!

三架車嘅 style 同 setting 完全唔同, 用嘅件都係唔同, 完全唔會有重覆嘅感覺. 呢架 XC 都唔係用咩頂級件, 改到咁都好夠玩, 係有時個八飛齒比有啲唔上唔上唔嘅感覺, 可能踩慣九飛十飛較密嘅齒比嘅關係...

無往不利

2009-04-24T18:59:00.006+08:00

上次提過呢架 XC 車主要改避震同制動, 目標嘅 Rock Shox SID Team 同 Avid Elixir CR 終於上車, 以後穿州過省都無往不利!!

另外, 阿賢竟然有興趣玩山, 陪佢睇完車之後佢買咗架白色 Louis Garneau XC Casper Pro!! 佢住旺角, 我叫佢操熟啲入嚟新界一齊踩...

有賺

2009-04-21T23:46:00.001+08:00

賴輝話搞團上深圳大漁拆番餐講咗好耐, 終於的起心肝. 全靠 Catherine 幫我地 book 咗間房, 七條大漢啱啱好坐滿成間房. 全男班有樣好就係講乜都得, 而且吞吐量差極有個譜, 於是好多個 round 個個滿載而歸, 難為 serve 我地間房個小妹妹, 我地你一言我一語, 少啲耐性都唔掂.

工具

2009-04-20T23:33:00.003+08:00

打進旅行車其中一個環節就係隨車小工具, 萬一踩長途架車有小問題都搞得掂. 車方面, 我想偷輕少少, 首當其衝前叉著手, 原裝較重效能一般, 然後安全為主嘅制動系統.

三架車嘅 style 同零件完全唔同, 玩乜都得!!

探路

2009-04-14T20:18:00.007+08:00

個零星期前已經想為士多啤梨園而探路, 難得小龍又有興趣, 今日放假一齊去!!

想去士多啤梨園好耐, 可能去得太多上水豆腐花廠, 想搵啲新地標去吓, 於是上網Ú39;人, 有網友介紹位於坪輋嘅觀光有機士多啤梨園. 於是影低地圖, 本想帶 Dopod U1000 做 GPS, 不過怕重所以冇... 咁出發前 update 過 Facebook status 話出發探路就走人, 踩到大窩東老朋友大梁原來見我 Facebook status 所以揸佢架 Acura NSX 嚟 join 我地. 大梁係一個好享受人生嘅人, 對園藝又有好豐富嘅認識, 所以呢啲地方佢好熟, 好彩多得佢帶路同介紹先至有今日咁充實又豐富嘅旅程.

講返士多啤梨園, 坪輋有兩個, 不過貨櫃車響附近出出入入, 所以環境幾垃圾, 唔太值得去. 於是大梁介紹另一邊亦即是流水響, 果邊地點靚好多, 士多啤梨園一樣有, 而且再入啲鶴藪仲有個香薰園, 有薰衣草有山羊可自製香薰水晶蠟燭同 BBQ, 冇得頂!! 不過今日咁熱又少少曬踩車去摘士多啤梨都會幾辛苦, 所以天熱搞呢類團要同其他網友研究吓... 無論點, 小龍同我都認為成個旅程都好玩, 攰係攰啲, 探路過程都好有趣, 而且可以試吓架新車, 雖然呢架唔係正統 MTB, 但好似今日咁玩 XC 真係爽!! 唔使之前幼呔咁就住就住驚爆, 路搏照上!!

踩完車去大埔 Neway 幫阿宣慶祝生日, 成幾個月冇唱過, 成個腦好似冇歌咁, 枉我日日煲 iPod...

責任

2009-04-08T23:35:00.004+08:00

踩車經過大埔海濱公園都過百次, 認真入去行今日真係第一次!!

裡面原來大得好緊要, 鳥語花香又新又靚, 放風箏嘅草地有人野餐瞓覺, 令我想起幾年前去三藩市漁人碼頭旁邊嘅公園一樣.

今日主要幫 Catherine 嘅姨甥女寶兒影相, 講開呢個小朋友, 我地兩個都好錫佢, 佢可愛講嘢又好笑, 仲好似卡通版嘅小九子!! 可惜嘅就係佢父母係有咗佢先結婚, 結婚冇幾耐就離婚... 唉... 真係唔知咩心態!! 據講係佢老豆當時已經話唔要, 係佢媽咪堅持生佢出嚟先至焗住結婚, 而家成日唔理個女留比佢阿媽照顧, 跟住當自己係女仔咁同第二個拍拖!! 唔理個女留低比阿媽已經好不負責任, 夾硬生個女出嚟比唔到一個完整嘅家庭比佢真係幾自私, 我成日都諗如果我同 Catherine 有個女, 一定唔會咁對佢.

成個下晝幫佢影相都幾攰, 不過影出嚟有好幾張好滿意都值得嘅... 跟住下場又係同 Apple 佢地去新星打邊爐, 任食買一送一真係好抵!! 其實今晚係順便睇吓 Apple 新開張嘅髮型用品舖頭, 佢話本來想同 Catherine 夾份開, 佢話如果做得好或者第日考慮馬鞍山開分店, 到時一齊大展身手. 唔... 經濟唔好, 工越來越難做, 香港打工仔一啲地位都冇, 永遠比老闆食住, 創業係冒險, 不過都唔係唔好, 況且 Catherine 無論男女老幼都咁鍾意佢, 我對佢都好有信心.

呢啲都係言之過早...

旅行車

2009-04-07T23:41:00.008+08:00

最近去開嘅 UMPC Fever 竟然介紹小弟呢個 blog, 真係受寵若驚, 開心當然有少少啦!!

至於佢地舉辦嘅 Viliv S5 團購, 我登記咗但冇落訂, 正如之前講過我想要內置 HSDPA. 落咗訂據聞今日有機攞, 我冇份應該會好空虛, 只不過...

一個星期前響 Chain Reaction Cycles 買咗部 XC 單車 Dahon Matrix 終於從英國運到香港!! 買呢架車其實都十五十六. 事源一月已經心思思想入手, 最後 Paypal 比咗錢有少少後悔, 主要係覺得又買第三架車有啲嘥錢, 咁 send 個 email 去 cancel 同 refund 返... 呢幾個月都念念不忘, 間唔中會 check 吓佢有冇劈價, 事關我留意到呢個網站嘅 Dahon 賣剩幾款唔 hit 嘅大摺車, 我諗佢地賣哂就唔做 Dahon. 上星期竟然比我等到!! 仲平之前個價差唔多 30% 咁多!! 於是即入!! 仲有樣奇就係當晚又變返原價, 唔通佢地系統出錯??

其實沉日朝收工已經去鎮洋買定啲 accessories 如尾袋手筒等等, 事關呢架暫時唔打算大改, 主要用嚟比 Catherine 踩同出團... 沉日下晝瞓瞓吓就送到, 用咗兩個鐘砌起趕住返通宵. 回想返佢車架有個特別之處就係佢個硬度高摺位 lockjaw hinge 同一般摺車唔同, 摺埋幾乎天衣無縫!! 仲有佢摺要用六角匙, 方法可以睇片. 今朝一收工返屋企攞佢單車舖 setup, 順便裝 Vetta V100A WL2X 無線碼錶同換咗支 Easton MonkeyLite SL 頭 bar. 跟住走咗轉大埔試吓車, 撞到由沙田行返大埔嘅巧姑姐同小丸子丁寶寶, 仲有同同事踩緊車嘅豪仔.

呢架大摺終於解決咗我村屋唔夠位上落樓梯嘅間問題!!

延續

2009-04-03T00:32:00.003+08:00

冇行 WinXP 嘅 MID 唔緊要, 積極咁去搵終於比我搵到一個非官方嘅 You Tube client 叫 youtubeplay, 呢個免費程式解決咗我用 Windows Mobile 睇唔到 You Tube 嘅缺憾, 而且可以睇埋 FLV 檔. 咁 RMVB 方面唯有用 WinAVI MP4 converter 轉 MP4 用 Coreplayer 睇.

咁就可以延續 Dopod U1000 嘅服役時間!!

更動聽

2009-03-30T19:54:00.003+08:00

一向鍾意打機, 仲會收集至愛遊戲 soundtrack, 而家響用老爺 PowerMac dual G4 做嘅 server 收藏咗一千六百多首 game soundtrack 嘅 MP3, 好多係好耐以前儲落而家好難搵返. 最近開過吓停咗年半冇玩嘅 The Lord of the Rings Online, 響入面 hea 咗一陣, 佢啲 soundtrack 雖然同電影完全唔同, 但好鬼好聽, 我覺得比電影版有過之而無不及. 記得仲有玩果陣 search 過鬼佬 BT site 係冇 soundtrack, 點知而家竟然有!! 於是上 ebay 睇吓有冇得賣, 當然有啦仲好平, 原來係 expansion pack Mines of Moria preorder DVD 有跟, 於是 bid 咗隻 soundtrack 同製作特輯 DVD, 今日終於收到好開心!!

講返隻 game, 我玩開個公會啲香港人已經 quit 哂... 我就一開波 subscribe 咗個 lifetime account, $1600 左右玩成世, 鍾意幾時玩幾時停都得!! 點解投資個 lifetime account?? 一炮過 $1600 唔貴, 況且勁鍾意魔戒嘅世界觀, 而家隻 game 所出的地圖範圍雖然已經超大, 但其實只係 Middle-earth 嘅一小部份...

車神

2009-03-26T02:41:00.004+08:00

呢段片真經典, 七屆 Tour De France 冠軍 Lance Armstrong, 驚人體力同毅力, 比 F1 嘅世界冠軍更厲害!! 唔知以前有冇 post 過呢段片?? 百看不厭!! 加入 Facebook 佢嘅粉絲 group, 可以隨時睇佢近況, 佢本人時時 update 架!! 啱啱佢響因為上星期比賽炒斷鎖骨而入手術室前影咗張相, 我都有為佢打氣呀!!

當機立斷

2009-03-19T01:12:00.008+08:00

同 Catherine 返完大陸修甲揼完骨就入元朗同 Kitty 食日本嘢, 還可以... 好難搵喪食壽司腳, 諗起就得阿賢一個. 食完就上咗佢地屋企參觀, 真係幾舒服... 一路跟佢返屋沿途都有好多飯店, 住元朗最正就係好多地方食嘢, 如果唔係成日出九龍玩真係唔錯!!

今日同時正式帶 Aigo 出街玩一日, 續航力真係強差人意!! 考慮咗一晚應該要當機立斷 let go... 除咗續航力唔夠部 U1000 好, U1000 一著即上網唔使等, Aigo 要插 HSDPA 手指 detect 完再 search network 再 connect, 呢度都超過一分鐘. 二來插手指冇內置咁過癮, 始終內置先係皇道!! 三來 U1000 standy mode 都可以 set 到每十分鐘幫我 check 一次 email 我好鍾意... 其實呢一堆我都接受到, 只係最頂唔順係啲電去得好快, 好似我今日咁玩兩舊電出街都好窄!!

當然 Opera Mobile 效能同操作都麻麻, 同 Firefox 冇得比, 而家唯有犧牲冇得睇 You Tube 同冇得直讀 rmvb, 而家實在有少少返唔到轉頭嘅感覺...

悶場

2009-03-15T19:24:00.006+08:00

花卉展年年都有, 前年有去上年就冇, 因為都知冇乜新意. 原本今年都唔想去, 不過今朝臨收見到天氣咁好加上收工後都係一條悶棍, 所以就一支弓去影. 去到一如以往冇乜新意, 人又超多, 真係冇乜心機影, 所以呢次影得唔多又麻麻地靚...

病態

2009-03-12T03:38:00.008+08:00

我有一個病態, 電腦同上網已經離唔到身... 講起電腦, 小學五年級已經同我結下不解之緣, 曾經諗過以電腦為職業, 亦都試過發覺唔適合, 亦都好興幸冇繼續, 眼見身邊細個一齊玩電腦嘅朋友相繼入行, 而家都撈得唔係幾好, 尤其是金融海嘯, 又或者搵到食都要東奔西跑超辛苦...

MID 最後都代替 Dopod U1000 成為我身上嘅隨身電腦, 最後都係造功麻麻膠感重嘅 Aigo P8860 勝出. 至於點解唔揀接近夢幻嘅 Viliv S5?? 因為我比較鍾意 Aigo 果個我之前用過嘅 Dopod 838 同 Softbank X01HT 最欣賞嘅 form factor "slide keyboard" 同機頂 USB 位比我插 Vodafone HSDPA 手指多啲... 二來代理為咗下個月有改版散貨, 比 UMPC Fever 團購更平嘅超荀優惠價比我... 三來, Viliv S5 團購唔知代理咩事 cancel 咗唔如幾時先返到貨.

講返 Aigo, 唔好就係 performace 同內置 SSD 太少比 WinXP 用, Intel Atom 800MHz 加 512MB RAM 同 2GB + 2B SSD. 好彩代理整咗隻 Linux 同 WinXP 嘅還原碟比我. 部機本身原生係 MID 版 Linux, 介面唔靚同好雞批嘅感覺. 其後外國有人 hack 咗同 Intel 發放 WinXP drivers 先可以裝 WinXP. 代理就整咗隻瘦身版 WinXP, 2GB 唔用瘦身版唔得, 裝完仲有 500MB 左右, 裝吓嘢搞搞吓得返 100MB 唔夠, 成日 warn 我 disk space 唔夠搞唔掂... 最後重裝多兩次 system 比我知道原因而家裝哂所有我想要嘅 software 同 set 埋 100MB virtual memory 都仲有 400MB 左右, 算幾滿意.

Dopod U1000 同 Aigo P8860 各有各好, Windows Mobile 嘅 Opera Mobile 9.5 始終麻麻, 操作唔方便同睇唔到 Youtube. 但部機勝在方便, 一著就上網, sleep mode 都可以自動 check email, 不過始終係 mobile OS. WinXP 就唔使講, 完完全全 desktop system 而家放響袋, 裝返屋企用開嘅 software, 仲有樣好重要響網上 download 嘅 RMVB 唔使轉. 只係 Aigo 太少 RAM 有時返應頓少少同埋 HSDPA 唔係內置, 不過隨身 WinXP 真係唔錯.

而家 netbook 大熱, 但始終放唔落褲袋, MID 就唔同, 定位 notebook 同 PDA 之間, 雖然唔知 hit 唔 hit 得起... 由於屋企已經係用 notebook, 所以都係 MID 啱我多啲.

百萬葵園

2009-03-05T01:06:00.004+08:00

祖國地方夠大, 近年經濟起飛, 連帶有好多主題公國出現, 番禺百萬葵園係近年大陸影婚紗相熱點. 入面大就一定, 近年熱門嘅花好似油菜花薰衣草櫻花向日葵等等都有, 每一種花田都算大, 但又未算巨大, 只係小小花海. 當日去到好陰天, 影相麻麻, 但為咗就嚟冇嘅櫻花所以照去. 果日我成日都有留意國內同胞影婚紗相, 始終都擺脫唔到 "娘" 味...

死忍

2009-03-01T15:20:00.002+08:00

Viliv S5 以 UMPC Fever 嘅團購價嚟講真係超級吸引, 只係冇內置 HSDPA 係令我考慮唔入手住嘅原因, 要用 HSDPA 手指插機身左邊似乎會阻住左手揸機... 不過呢幾日睇啲開箱操作片睇到流哂口水...

忍!! 仲有 Benq S6 同 Aigo 行 WinXP 嘅強化版未出...

完美進化

2009-02-28T00:51:00.006+08:00

唔係介紹 2009 Shimano Dura-Ace, 不過最近睇過段官方宣傳短片真係好正, 同用汽車電單車競技比賽一樣咁專業. 其實不嬲都覺得今年嘅 Dura-Ace 外型真係好剎!! 之前諗過 SRAM Red, 始終今年 Dura-Ace 型啲, 最重要 dual control 好用. 想換, 不過唔可以吓吓追, 等多一兩年吧...

代替品

2009-02-23T23:58:00.005+08:00

Windows Mobile 始終都冇一個好嘅 browser, Opera Mobile 雖然比以前進步唔少, 但操作都係差少少同仲唔知 beta 幾耐. 兩隻韓國品牌 MID 不約而同今個星期一齊出. 先講 UMID M1 最理想, 成部迷你 notebook 一樣, 而 Viliv S5 外型造功似乎更正, 仲有個獨有專用 Cube 介面, 電磁更勁!!

睇吓行貨定價如何先...

懷念

2009-02-19T23:43:00.002+08:00

真係好懷念之前提過嘅 DIY 手制, Hori 呢隻雖然話高級嘢, 但碌棍係四個角位... 可能我武功又退步咗, 硬係唔多得心應手... 操多啲解哂所有隱藏人先!!

啱啱連 Ryu 同 Ken 嘅師傅剛拳都解埋, 而家剩返最後大佬 Seth 未解...

斷尾

2009-02-17T19:43:00.003+08:00

KCNC 呢套 V brake 殺氣太大, 睇真啲同芒果真係絕配!! 單車亭阿偉話幾難裝, 個 design 為咗偷輕, 用返好多舊設計, 調校較麻煩...

裝完可以了咗件心事, 唔使成日心思思...

集體回憶

2009-02-16T13:00:00.012+08:00

自細喜歡打機, 雖唔算機癡, 不過癲峰時都好沉迷. 好耐之前曾經諗過畢生最喜愛嘅 game 係邊隻?? 唔... 當時就覺得係街霸 2 同 Rainbow Six.

街霸 1 已經係粉絲, 放學反轉件校服就到沙田廣場地下嘅機舖操, 波動拳昇龍拳學識就到剛有機舖嘅澳門大顯身手, 當時澳門冇人識昇, 睇到佢地呆哂. 記得果陣又未夠秤但好鍾意打, 同同學到長洲 camp, 夜晚個個入機舖打, 但果陣生得細粒, 一入去就比人睇出被拒諸門外, 搞到我自己一個響門口望住所有同學仔響入面玩...

直到有一日響而家旺角兆萬對面機舖見門口企滿人, 一睇先知原來出咗街霸 2!! 果種興奮同感動到而家都仲記得!! 果陣真係幾沉迷, 讀 T.I. 時點完名就去娛樂城沙龍度打, 打到食 lunch, 跟住又返去點名, 點完名又再去... 尤其是學軍佬無影撻, 響黃金做暑期工一放工就響附近機舖打到柵門, 苦練得嚟成功率達九成. 得知超任出街霸 2, 直頭問老闆借糧買機同帶. 為咗好 feel, 搵細佬同學文仔買鴨記買喇叭箱同威利電子遊戲機買棍同制 DIY 街機手制!! 老實講就算而家 Hori 頂級手制用果啲三和日本街機部件都冇咁正. 除咗打機方面, 我連 soundtrack 都唔放過!! 其實咁多年都有好多珍貴 game 嘅 soundtrack 而家收藏哂響 iTunes 裡面.

街霸 2 系列之後嘅街霸已經冇乜點玩過, 原因係角色同系統都變得幾多... 直至呢一隻第四集, 雖然都改咗好多嘢, 不過感覺返哂嚟... 成三張幾嘢, 相信好多人一樣以前一齊打機嘅同事同朋友, 大多已成家立室, 各有各忙, 已經少咗好多聯絡... 就係街霸 4 家用版一出, 個個可以上網抽過, 大家又難得一齊有共同話題, 呢啲真係百份百集體回憶... 我相信好多三張左右嘅男人都係同波動昇龍一齊成長... 身邊玩開嘅人大多數都買咗 game, 大家再回憶返以前都津津樂道!! 時代唔同, 以前要對戰要到大家屋企打, 好多時都打通宵, 而家科技一日千里, online 就得. Online 雖然方便, 回味返幾條友屈埋屋企打通頂又過癮好多, 比用 mic 更開心.

咁鍾意隻 game 梗係要入手掣, joypad 真係唔得... 不過手掣選擇太少, 靚嘢只有 HORI Real Arcade Pro.EX 同 MadCatz Street Fighter IV FightStick Tournament Edition.

死心

2009-02-13T04:00:00.008+08:00

始終對 Aigo P8860 念念不忘, 今日終於去油麻地專門店玩過部機, 部機攞上手第一個感覺就係一如所料造工麻麻, 好膠又冇質感, 同 htc 啲機差幾皮, 完全唔係我杯茶... 跟住用 WiFi 睇 YouTube 竟然疾, PPlive 又睇唔到, 似乎要改 WinXP 至得!! 唔止唔止, 仲有改 3.5G module, 仲有電量方面, 可以睇吓下面條片, 改咁多嘢先至接近完美, 如果係咁可以死咗條心... 跟住的起心肝走去先達幫部 Dopod U1000 換返張新嘅 screen protector, 又得咗!! 靚仔返哂!!

我個人有個大缺點就係多心, 近呢幾個月發覺好多時原來自己已經擁有最好嘅嘢, 但又貪心想試吓其他, 到頭來發覺原來自己擁有嘅係最啱自己, 部 Dopod U1000 就係好好嘅例子.

啱啱入手 Street Fighter IV, 好鬼正!! 下次先再介紹... 呢個星期同細佬斷斷斷續續咁打爆 Gears Of War, 佢猛話正即刻買埋第二集!! 希望快啲同佢完成埋第二集, 因為實在太正! 想佢快啲感受到!

一年一度

2009-02-07T23:16:00.003+08:00

唔係刻意一年一度搞大型車聚, 只係一時心血來潮.

同預計差唔多, 三十架車, 孖橋大合照幾巴閉. 呢類團最啱新手同 hea 人玩, 自從上次大炒後就同自己講唔再踩公路, 條命矝貴嘛!! 今次一如以往, 認路成日要 recall 返啲記憶, 去過好幾次都咁話. 去到大家諗住一路食一路交流, 點知人多到插針都插唔入, 全場比長者們攻陷, 咁耐都未見過咁!! 最激就係成班阿婆男廁都唔放過, 不過我都少理, 阿婆響我後面我都唔理照響尿兜疴. 人咁多都食唔到, 唯有好似上年咁去埋寶生園養蜂場飲檸蜜, 十蚊杯真係賺死佢!!

豆花團已經去到有啲麻木, 不過返到去見佢地留言話好好玩我都好滿足!! 下次真係要搞下士多啤梨團, 要搵個人肉 GPS 至得...

有今日

2009-02-04T19:41:00.007+08:00

等無限 3.5G 上網月費跌到 $200 內等咗好耐, 終於等到有咁嘅一日!!!

3HK contract 未滿即 join Smartone Vodafone. 頭一次比 $1328 簽 24 個月送 HSDPA USB modem (內置 Micro SD card 插槽), 頭六個月回贈哂全部錢. 大家都 HSDPA, SV 好似爽過之前 3HK!! 又可能同時 update 咗 Opera Mobile 9.51 beta 2 嘅關係. 3HK 果 500MB 要爆唔難, 一爆就唔抵玩, 而家唔使就住就住玩啦!!! 至於 3HK, contract 到六月, 毀約賠 $500, 不過 data plan 可以 cut 只用 voice plan $68 一個月, 剩返四個月共 $300 左右, 冇必要毀約.

有無限 3.5G 就想買部更強嘅上網機器嚟代替 Dopod U1000, 睇中 Fujitsu Lifebook U 系, 雖然細過 netbook, 但都係放唔到落衫袋或褲袋返工做嘢. 跟住仲有 Intel 提倡嘅 Mobile Internet Device (MID), 市場選擇好少, 當中祖國名牌 Aigo P8860 個 form factor 最正, size 同 Sony PSP 差唔多, 只係冇香港未有亦唔知會唔會有嘅兄弟機 Gigabyte M528 咁有個 3.0M pixel 相機同內置 HSDPA. 我 research 得知呢部機用 3.5G 上網兩個鐘就冇電, Dopod U1000 就上一個鐘網都仲有 80%, 似乎兩年前面世嘅 Dopod U1000 一啲都未 out, size 同功能依然仲咁啱我用.

當然, Gigabyte M528 有行貨我都想試, 白色 Aigo P8860 插白色 Smartone Vodafone HSDPA USB 手指雖然絕配, 但我唔想凹支嘢嚟...

破紀錄

2009-02-02T23:37:00.002+08:00

下年派利是, 今年當然一定要搏盡!! 額頭寫住 "厚顏無恥" 四個字, 響機場到處恭賀大家, 舊公司更成重災區!! 結果成績破哂咁多年嘅紀錄, 勁呀!!

利是真係開心, 派利是都應該係, 至少第一年派係掛... 我估...

人車合一

2009-01-31T14:00:00.002+08:00

一向都係用 MKS 嘅 Ezy 快拆腳踏系列, 對呢個系列情有獨鍾係因為切換普通踏同 lock 踏超方便, 而且好多時食嘢放底部車響舖頭門口可以拆走腳踏當防盜用. 不過佢嘅 lock 踏 model MM Cube 較其他 model 貴好多. 沉晚少有地見有人放就即時 KO 佢, 頭先收工交收發覺賣家咁啱之前同佢響元洲仔吹過水, 真係有緣!!

跟住要買對 lock 鞋, Shimano 定 SIDI 好呢?? 踩得多發覺大多數時間用 lock 踏安全好多, efficiency 又高啲.

行大運

2009-01-26T01:19:00.005+08:00

年卅晚豪仔約我轆車, 沿途影吓相, 我就順便試吓車. 今次目的地係三門仔雲吞麵, 去到可惜收咗爐. 咁唯有入大尾督影相, 順便食埋嘢. 至愛嘅忠誠收埋爐, 於是到隔嚟巴提雅食泰國嘢, 最後上大壩...

花市就年廿九去大埔墟行咗個垃圾蚊型花市...

終極升級

2009-01-25T02:16:00.007+08:00

之前有諗過放咗部芒果再換其他車, 只係一諗到一放就蝕好多就... 咁不如踩深啲再改勁啲!!

香港單車嘢其實幾貴, 代理食水深, 舖頭又吓吓要講價. 有見英磅弱勢, 英國著名單車購物網站 Chain Reaction Cycles 係香港車友近來掃貨熱點, 因為英磅下滑同買滿 HKD$2400 就可以免運費 (單車例外). 搞到好多人一鍋蜂咁響香港討論區搞團購, 為求儲夠 quota 可以免運費... 至於我, 自己一個要買嘅嘢都己經到 quota, 至於 upgrade 乜嘢?? 呢次主要係傳動方面, 仲有上次林錦炒花哂嘅 Ergon GR2 手筒, 佢地有一長一短賣, 所有嘢都平過香港買. 最後仲心郁郁想 KO 埋單車亭比紙重少少果套 KCNC Bear Bone V brake 套裝, 阿偉比個靚價我. 但一來之前 upgrade 咗手感極好嘅 Shimano XTR, 二來套 KCNC 夠我響 Chain Reaction Cycles 買半架 Dahon Matrix!! 我 email 問過買呢部車竟然都 free shipping, 咁不如 budget 比呢部車好過. 呢部 cross country (XC) 解決咗我因為樓梯窄而唔買大車嘅問題!!! 我計過以而家嘅滙率仲比阿偉嘅友情價平差唔多成千銀!! 值得考慮考慮...

團年

2009-01-21T11:45:00.005+08:00

入咗嚟呢間公司年幾, 我發覺好多同事都好攪笑. 呢間公司啲人事同文化同之前果間好唔同, 同事間是非同衝突當然一樣有. 雖然係咁, 大家好似有一份我唔識點形容嘅感情響度. 好似幾 team 一齊搞嘅團年聚餐以前間公司記憶所及係冇... 我地 mechanic 間人情味係有, 唔似之前果間啲人咁變態, 咁多人鍾意搞屎棍... 記得 last 響果度做果年幾兩年真係做得幾唔開心, 好彩可以成功脫離是非之地, 如果唔係比人屈又冇辦法捉到真兇果種無助嘅感覺都幾難受...

夢想成真

2009-01-18T16:03:00.004+08:00

喜歡 X Japan 已經十二年前嘅事, metal 聽唔少, 唔知點解特別鍾意佢, 咁打鼓同鋼琴都咁勁嘅隊長 YOSHIKI 亦都係主要因數.

第一次睇佢地嘅 live, 亦都係第一次自己一個睇音樂會... 佢地 Live 嘅 DVD 都睇唔少, 都知道咁多年型式唔會大變. 前晚冇興奮到瞓唔著, 亦冇特別期待. 一如以往, 開場一路播 YOSHIKI 果首 Amythest 一路介紹佢地出場, 果刻我已經頂唔順喊出嚟... 呢個開場 DVD 睇過唔少, 咁多年都冇變, 咁多年我都仲覺得好型, 親身感受果種感動非筆墨能夠型容!! 從佢地解散再死埋 hide 諗住呢一生人都唔會有機會親眼睇到佢地嘅 live, 如今夢想成真!!!

死而無憾!!

魅力

2009-01-14T00:50:00.002+08:00

屋企條樓梯窄, 小輪車就最理想. 其實一直都心思思去買 MTB, 但始終敵唔過條樓梯... 與此同時, 對小輪車嘅鍾情有增無減. Alex Moulton 嘅小輪車一直都好欣賞, 只係價錢唔平...最近有網友 post 咗一篇小輪車嘅優勢 FAQ, 幾值得一睇:

1. Why the small wheels?

The small wheels are an essential feature of the Moulton concept. They offer many advantages.
With only half the rotating mass of the wheels on a 'conventional' bicycle, it is possible to accelerate faster.
They are extremely stiff and much stronger than larger wheels because of the short spokes.
The aerodynamic drag is lower; there is less frontal area and less spoke area causing turbulence to slow you down.
The centre of gravity is lowered, resulting in improved stability.
The small wheels free up space normally occupied by large wheels, allowing luggage to be carried lower.

2. Aren't smaller wheels harder to pedal?

No, because:-
The gears are chosen so that they correspond to pedalling a bicycle with large wheels.
The smaller frontal area results in less aerodynamic drag.
The lower inertia means that you can accelerate faster.
If you are still doubtful, consider the HPVs (Human Powered Vehicles) developed for the ultimate performance - many of these use the unique 17" Moulton wheels and tyres fitted to the AM series bicycles.

3. Why the space frame?

The construction makes it far stiffer and stronger than conventional frames.
The weight is similar to that of the best conventional touring bicycles - and the Speed model is comparable with the lightest racing frames. In conjunction with the small wheels it results in a low centre of gravity.
The standard frame size can be ridden by cyclists of almost any size.
The low top tube leads to improved safety and controllability.
The low top tube allows it to be ridden equally easily by men and women; it is also a major advantage for elderly or disabled riders, who cannot easily ride conventional bicycles.

4. Why suspension?

It allows the advantages of the very rigid small wheels, high pressure tyres and space frame to be enjoyed while giving a much more comfortable ride than a conventional large-wheeled bicycle. The road shocks experienced on a conventional bicycle are dramatically reduced.
It is a light, simple, maintenance free system.
Improved traction - the wheels do not bounce going through corners or on rough surfaces.
Reduced strain on the wheels - the wheels stay true, spoke nipples stay tight and spoke breakages are extremely rare.

5. Does it fold?

No - this is a no-compromise high-performance bike, quite unlike any folding bicycle.
But ...
The frame does separate into two parts.
This does not affect the frame rigidity - tests on a brazed-up version of the frame against the normal separable version showed no difference in rigidity. When separated into the two parts, it easily fits into the boot of a car.
When placed in the carry bag, it can be carried on a train as hand luggage, rather than needing to be placed in the luggage van of the train - a big advantage given the restrictions on some train services. Users have also transported their AMs as normal luggage on aircraft flights.

6. Is it as good as a conventional bicycle?

It's not just as good as a conventional bicycle, it's better:-
Owners of Moulton bicycles report that after using the Moulton for a week, they never want to ride conventional bicycles again. Just look at the specification and the performance details.

7. How well does it perform?

An AM bicycle holds the world speed record for bicycles of conventional riding position at 51mph, fully faired.
The AM bicycle has successfully completed the Race Across America (RAAM) - finishing the course of 3117 miles in 10 days 15 hours and 1 minute. Owners of AM bicycles use them successfully for commuting, touring the world and for racing. The APB bicycles are ideal for commuting, touring and use off-road.
My own real world experience over 20 years of owning several F frame Moultons, an ATB and a Mark 3 seems to confirm at least equal rolling resistance. I do also confess to riding and owning full size bicycles-a touring bike and a mountain and road tandem.

當然仲有 Alex Moulton 嘅專訪 video, 睇完中毒更深!! 不過諗深一層, 好似 Alex Moulton 咁 full suspension 小輪 road bike 我而家都有, 一樣咁正!! 只係擁有一部 Alex Moulton 就好似擁有一部歐洲車咁要佢先進高質嘅 engineering 同 design.

兄弟

2009-01-12T23:47:00.004+08:00

同細佬分開住之後都好少一齊玩...

由於今日我要同佢去中環嘅間律師樓贖屋契, 咁就順便去影吓街, 仲有帶佢去蘭芳園醫肚. 佢叫咗個蕃茄薯仔豬扒通粉, 我就叫香葱雞扒撈公仔麵, 最後仲整多個咖央西多士. 之後就到中環石板街影咗一陣... 由於佢有揸車又未夠鐘接二嫂收工, 於是佢提議去西九海濱長廊影吓相, 出奇地果度竟然有單車租, 不過老實講果度除維港外就幾垃圾, 乜都冇死城一樣, 科學園對出同大埔海濱公園好佢多多聲, 所以住沙田大埔區再加部單車真係幾正!! 最後就同佢影吓佢架車, 跟住車我返尖沙咀解散.

成日都叫細佬買 XBOX 360 上網打機, 佢就遲遲未買... 記得以前成日同佢打 Rainbow Six 第一集打通頂, 一人一部電腦響屋企超過癮. 仲有佢細個鍾意單車, 我就全無興趣, 我暑期工出糧買咗部單車比佢, 踩咗冇耐響屋企樓下比人偷咗, 激到我死!! 大概人大咗玩私家車就覺得單車只係 cheap 到死嘅休閒工具, 一條鏈一塊餅兩個轆咁大把, 已經一啲興趣都冇... 其實單車可以玩到好 pro 嘅... 試過叫佢同我走轉, 可惜佢以踩唔郁為理由拒絕我...

堅持

2009-01-06T13:06:00.004+08:00

好日都唔去捷成, 一去就唔見錢...

買咗一堆唔等使嘢, 仲有咁啱見到高禮澤響度買嘢, 可惜我部 Ricoh GR Digital II 入咗廠整前轉盤, 變咗冇隨身機冇得合照.

話說我不嬲有對士啤芒果呔, 上次林錦落斜大炒湯咗條頭, 果陣全香港冇貨好彩芒果呔呢類損耗角器性罕物有儲士啤嘅習慣, 咁用咗一條剩返一條. 好彩上次搞 Facebook 團聽狗爺講捷成有, 咁沉日去開咪買多對, 不過已經係炒價 $360 條!! 冇計... 架車鬼叫我堅持用呢款呔咩!! 此外, 不嬲都想將 seat clamp 同轆快拆仲有呔咀 cap 轉橙金色靚仔啲, 咁果度有就順便買埋. 比錢果陣問咗老闆娘幾次對快拆啱唔啱大行用, 佢死都係話啱, 點知今朝返完通宵收工都係要去換, 去到仲未開門, 好彩等咗十分鐘老闆娘踩車返到...

新一年

2009-01-02T23:49:00.001+08:00

2008 年又過咗, 我就 so far so good 啦... 呢一年響 ebay 都執咗唔少筍嘢, 當中單車嘢最多, 好似呢個 Dahon El Bolso, 連運費比代理鎮洋平 $200 左右, 真係抵到爛!! 有機會帶車去第二度玩一流!! 農曆年前想再改改架芒果, 少少嘢但會變成完美改裝, 又或者有朋友想接手架芒果, 我會換架銀色 Birdy Intego, 我想要架內三速單車.

大召集

2008-12-27T22:59:00.003+08:00

Facebook 大熱, 除咗揾返好多舊朋友外, 群組都係一個比有共同興趣嘅朋友聚腳嘅地方. 我都加入咗好幾個同我興趣有關嘅群組, 當中香港 Dahon 單車聯盟係小弟建立, 果度人數唔多, 而且有部份係外國人, 所以之前都好少入去睇. 不過早兩個月有位朋友響果度好活躍, 傾傾吓先知原來佢係我同 form 唔同班嘅中學同學, 佢想搞個車聚, 於是我幫手響群組開個活動召集一班 Dahon 粉絲嚟個大尾督慢轆團, 當然亦有到我成日浦嘅香港討論區單車版
度宣傳一吓. 到當日都有十五六部車參加, 都幾熱鬧. 成班到大埔昌運中心豆漿大王食個午飯就到大尾督影相交流一番, 當中仲有團友拍埋高清影片.

例會

2008-12-25T01:37:00.005+08:00

BBQ 好似係年年平安夜必搞嘅活動, 至少我係... 今年當然唔例外, 不過唔再係我屋企, 真係怕怕... 今次我地成班到小欖燒烤場, 貪食完可以拍吓籮柚就走. 果度環境 OK, 當晚都係 $88 位, 唔算貴... 人就當然越夜越多啦. 最唔話得就係 Kitty 特登整咗個 Blueberry Cheese Cake, 真係好味到震, 忍唔住食咗兩件, Kitty 真係夠老友!!

鬆弛

2008-12-20T23:33:00.002+08:00

成個月冇出車...

主要係呢排多咗加班同個人懶咗少少, 今朝返完通宵就好想快啲返屋企攞車... 好耐都冇試過咁雀躍, 天氣都係一個主要原因, 天又藍氣溫又爽. 一路踩一路聽歌, 冇目的地咁四圍慢轆好 relax, 果種 relax 嘅感覺非筆墨所能夠型容.

活著真好, 感謝神!!

一份子

2008-12-15T13:32:00.003+08:00

好耐都冇見過 Bryan, 佢要請我去佢隊 band "BACK", 響尖沙咀 CD Bar 第一場 live show. 我以前有段時間好鍾意去呢類型嘅 bar, 所以今次去加上第二日 off, 捧場到完場.

有幾有歌都好想跳上台... 哈哈... 真係好想一齊玩, 只可惜返 shift 根本就唔到練習同出 show...

極端

2008-12-13T12:48:00.003+08:00

沉晚收工聽爆粗 BAND 友套戲裡面主角根岸宗一隊 Detroit Metal City (DMC) 啲歌, 好難想像熱愛民歌嘅根岸響舞台上變成 death metal 主音兼結他手 Krauser II, 兩種音樂係完全兩回事, 可能正如 DMC 嘅社長所講根岸係天才, 攪到好想睇漫畫版...

點都好, 飾演根岸嘅松山研一真係演得好好!! GO TO DMC!!!!

轉接王

2008-12-08T23:15:00.010+08:00

4/3 系統比較少定焦鏡, 入手 Panasonic LUMIX DMC-L1 主要係當初想入支靚嘅標準 zoom 鏡去玩或旅行用, 用 Pentax 系統首當其衝一定係同我部 Pentax K10D 一樣防塵防滴嘅頂級標準 zoom 鏡 SMC PENTAX DA* 16-50MM F2.8 ED AL (IF) SDM, 唔入只係佢畫質名不副實. 咁啱見好耐之前已經想入但嫌太貴嘅 Panasonic LUMIX DMC-L1 kit set (兩年前初出賣 $16800) 跳樓價, 咁不如用個 budget 入手玩多個系統, 反正單係果支最昂貴 kit 鏡 LEICA D VARIO-ELMARIT 14-50mm F2.8-3.5 ASPH 齋買都唔止而家全新 kit set 入手價. 而且 4/3 系統號稱轉接王, 好多系統嘅名鏡如 Pentax K mount 同 Nikon F mount 都可以加 adaptor 響 L1 用, 當然只有 MF (手動對焦), 不過唔使怕因為 MF 有合焦提示. 另外 L1 可以測光, 所以我常用嘅光圈先決絕無問題. 最正係 Live View 都用到仲有同樣可以 4x 或 10x 放大比你重點對焦!! 有見及此響 ebay 入咗個幾高質素嘅 adaptor, 我所有 Pentax 定焦鏡又可以響 L1 用, 雖然 crop factor x2 後有焦段有少少唔拖唔水, 但三公主可以落 L1 簡直正爆, 外型襯絕不特止, 畫質都一樣咁正!!

大自然

2008-12-03T23:55:00.003+08:00

好少同 Catherine 去大自然, 行街又冇乜好行, 揼骨又唔想, 突然諗起去濕地公園行吓... 有樣美中不足就係天陰陰, 影相大忌!! 仲有貝貝又冇得睇... 去完 Catherine 話冇乜好睇, 又話要比 $30, 大埔海濱公園仲靚... 哈... 佢真係率直, 又錯唔哂, 唔係睇雀真係冇乜好睇. 跟住我地入元朗行街, 夜晚同 Kitty 食客家菜...

十年佳作

2008-11-29T01:36:00.004+08:00

除非 Gears of War 3 會響 2010 年底前出, 如果唔係, 呢隻第二集一定係 2000-2010 年最強遊戲, 至少動作遊戲一定係!!

同阿賢返工時間好唔同, 分幾次約埋打, 啱啱終於打爆困難模式!! 總結呢集無論畫面音效同故事仲有設定都冇乜好挑剔, 幾乎無懈可擊, 完全一路打一路睇荷理活電影咁!!

由於有三個同事去咗上堂, 呢排 OT 較多, 另外兩隻 game 都未認真玩過, 只係開過吓... OT 的確會少咗空閒時間, 但如果好似之前份工咁, 咁多空閒時間但冇錢比你去空閒, 又有乜用呢?? 至少而家除咗比以前更滿足欲望之餘仲可以儲到錢, 搵得就好搵, 世事難料...

半天假

2008-11-27T23:45:00.008+08:00

返咗晚 OT, 等於冇放過假, 由於兩個星期前因壞 keypad 而入過廠嘅 Sony Ericsson W960i 又有問題, 又要入過廠, 所以一放工就一支弓落旺角整機... 仆佢個臭街明明係佢地整得唔好, 呢次都要等四個鐘... 咁唯有睇套戲打發時間, 去到百老匯有興趣睇嘅有三套, 分別係日本片爆粗 band 友, 台灣熱爆嘅海角七號同新 007. 同樣同音樂有關, 喜歡 metal 嘅我最後當然揀爆粗 band 友, 其實海角七號都有興趣, 只係感覺上同女孩子一齊睇會好啲... 對我嚟講睇完絕對冇後悔. 跟住打比索愛點知又要換過上次換嘅前面板連 keypad, 仲要冇貨要等兩個星期, 嬲嬲地真係想攞返 trade 咗佢換 Nokia 5800 XpressMusic 算, 不過我想等到一月尾約滿轉台先... 橫掂落到旺角, 行陣先走... 去信和中心睇吓 game, 見到 game 舖播 Call of Duty: World at War, 本來諗住唔買住點知乖乖咁比錢, 再睇埋 Half Life 原班人馬嘅新作嘅 Left 4 Dead 一樣忍唔住!! 出奇地 Left 4 Dead 成個旺角都比人掃清, 好彩夜晚響大埔買到!! 同 Gears of War 2 一樣, 呢兩隻都有 co-op story mode, 仲要係四人!!

呢個月買 game 都買咗成千銀...

重遊舊地

2008-11-21T23:09:00.000+08:00

不嬲都鍾意打邊爐, 早幾年例去紅磡新星海鮮火鍋酒家, 同 Catherine 一齊後已經極少去, 佢嫌遠喎... 沉晚終於有得再去!! 除咗啲待應唔同哂外, 基本上其他一樣, 好似肥牛寫五碟嚟兩碟咁. 呢次同 Apple 佢地個個拆得都好滿足!! 返到屋企就同阿賢打 Gears Of War 2 合作故事模式, 打到差唔多朝早六點都未爆機!! 隻 game 真係超好玩, 故事內容所有嘢好似西片咁... 瞓醒後就約咗賴輝同小龍走轉大尾督, 例係忠誠嘅冬陰功肥牛湯河, 冇得頂!!

系統經典

2008-11-18T02:12:00.007+08:00

Olympus E-1 同 Panasonic LUMIX DMC-L1 被好多 4/3 用家譽為最經典機身, 我今次揀咗 Panasonic LUMIX DMC-L1, 原因 ebay 仲買到全新, 仲有最重要係個 design.

美國用 UPS 運過嚟三日就收到, 超快! 急不及待拆開, 一攞上手第一個感覺係比想像中好揸, 亦唔係人地所講咁重!! 一早 download 定嘅 firmware version v2.1 即刻 upgrade, 多咗好幾個功能如多重曝光同 Mega O.I.S. mode 3 等等.

上次用 Contax 食菜 (Carl Zessis) 今次飲奶 (Leica), 呢次被稱為最昂貴 kit 鏡, 而家支鏡全新約 $6000-$7000, 所以如我上次所講今次簡直係買鏡送機身.

過兩日 dayoff 去試機先!!

插水

2008-11-12T03:09:00.008+08:00

頭先響 expansys 入手 Dopod U1000 終極配件 docking station, 有咩用?? 簡單啲講可以將部 U1000 變 desktop 咁用, 睇片就清楚!!

一路都想入支 8GB USB 手指, 響兩個月前要 $230 先買到, 而家同樣價錢已經可以買到 16GB!! 呢次入手最平嘅 Kingston Data Traveler, 以後返公司抄 game 又或者屋企兩部腦過大量 data 都超方便!!

冇時間

2008-11-10T22:45:00.004+08:00

返工要打發時間, 但呢個星期放工就冇時間...

買咗巨作 Gears Of War 2 都未有時間玩, 主要呢幾日係加班截數日, 呢個月加班算多, 平時懶到死嘅我索性盡啲 cher 爆佢... 無非都想買新玩具!! 至於係乜?? 暫時目標係兩年前賣 $16800 嘅過氣 4/3 機皇 Panasonic LUMIX DMC-L1, 鍾意佢好似以前部 Contax 咁有質感, 最重要係支強勁 kit 鏡 Leica D VARIO-ELMARIT 14-50mm / F2.8-3.5 ASPH. / MEGA O.I.S, 而家 ebay 全新一套嘅價直頭係買鏡送 body 咁滯...

當然, 仲爭扎緊入唔入手, 唔可以咁衝動!!

打發時間

2008-11-05T22:24:00.003+08:00

開工其實有好多時間做自己嘢, 難得搞到 PSP 做睇片機器, 所以好辛苦搵到今年一集都冇 download 過嘅幪面超人 Kiva, download 咗差唔多成個星期終於搞掂!! 跟住一次過轉哂!! 睇咗幾集, 雖然同上兩年果兩套咁小童向, 不過暫時都算好睇...

而家返工不愁寂寞!!

重組

2008-10-29T23:58:00.008+08:00

之前買果張雜嘜 micro SDHC 轉 MS Pro Duo adaptor 用用吓唔掂, 換過張都唔得!! 之後唔死心入咗張 Eagletec, 直情唔得... 頭先去先達見到有張近期電腦廣場測試果張 PhotoFast CR-5400 dual slot adaptor, 決定一試!! 貪佢可以一次插兩張, 點解入呢張?? 因為已經浪費金錢買咗兩張垃圾, 唔死心咁再浪費就買張唔同安慰自己, 跟手入多張 Kingston 8GB micro SDHC, 實行雙 8GB!! 至於插入 PSP 後佢會認成一張 16GB... 咁 16GB 點用好? 老實講裝哂 game 都玩唔哂... 橫掂 iPod touch 唔夠位滿足我用嚟睇片, 咁用返 PSP, 反正買咗 PSP 咁耐都未用過佢嚟睇片, 而且個 LCD 又大好多... 轉片就用 WinAVI MP4 Converter 一次過 batch convert 一大堆片快靚正!! 而家重組隨身裝備同途叫做滿意, Dopod U1000 當隨身電腦 3.5G HSDPA 上網兼打電話, 部 Sony Ericsson W960i 全打電話同踩車 MP3 player, Ricoh GRD II 就當然影相, PSP 就打機睇片, iPod touch 就聽歌睇相兼小量上網. 不過返工真係帶好多嘢, 可以一部續航力高大容量打機電話影相靚上網又有 keyboard 兼靚聲 MP3 player 嘅裝置似乎呢十年八載都唔會有...

好無奈上星期洗衫洗埋隻 cheap 雞 Sony Ericsson HBH-PV703 bluetooth handfree, 攪到開工冇 handfree 比部 Dopod U1000 用. 呢次索性買隻可以同時對兩部機嘅 bluetooth handfree. 上次踩車專用果隻全天候 Plantronics 好滿意, 呢次亦都係支持入手 Plantronics Voyager 520, U1000 同 W960i 是但一部打電話佢都會運作, 當然佢亦都有防風功能, 響 ramp 講電話啱哂.

一人前

2008-10-23T23:22:00.001+08:00

近幾年連鎖式快餐店推出各種迷你火夠, 份重足夠一個大男人過癮. 一向捧大家樂場沉晚試吓近來好評嘅大快活, 對於肥牛狂熱者嘅我的確好啱胃口. 於是今晚一條友再食多次, 竟然響夜晚八點零鐘沽清!! 激死呀!! 退而求其次返大家樂, oh well... 返唔到轉頭...

講返套新手提音響, 無論喇叭又好耳機又好都話要煲返幾百個鐘先好聲, 老實講耳機方面真係半信半疑, 有時真係覺得係聽得多習慣咗... 點都好唔理係咩原因的確真係 feel 到, 上一隻又好而家呢隻都好, 越聽越正!! 我試過好多組合, 好似由較重 bass 嘅黑色耳綿到而家洽到好處嘅灰色膠耳塞, iPod 由唔同 EQ 試到而家 off 埋 EQ, 呢個組合加理煲咗百零個鐘, 自己覺得而家好正好正!! 不至驚為天人, 但真係好耐冇咁 enjoy 用耳機聽歌過. 同埋舊果部 iPod 第三代一啲都唔會浪費, sync 唔同嘅歌入去, 聽乜歌就攞邊部, 解決咗冇較大容量嘅問題!! 至於 iPod touch 係唔係真係冇 classic 咁好聲??? 可能我木耳, 我覺得不相百仲, 視乎你首歌嘅 quality.

難為情

2008-10-16T23:43:00.001+08:00

有時見到 Catherine 為佢啲朋友選擇生日禮物, 又試過佢好朋友 Lily 問過我送咩生日禮物比佢好, 覺得女仔幾煩, 男仔都唔會咁嘅...不過今年竟然有一個好有趣嘅生日飯局, 當中有老朋友同而家嘅同事. 選址 Ruby Tuesday 因為有半價, 咁我地可以放任地大拆一餐. 有樣驚喜嘢就係阿駿準備咗個超好食嘅生日蛋榚比我, 仲由 waitress 帶領之下一齊唱埋生日歌, 對於一個大男人嘅我真係好難為情! 不過真係好多嘢大家同我一齊慶祝!! 對上一次難忘嘅生日已經係十六歲果陣同學仔響返學食 lunch 響茶餐廳擺咗兩圍.

藝術品

2008-10-14T18:40:00.001+08:00

新 Macbook 終於發表, 我覺得佢係咁多代最震憾. 一體式機身, 獨立 nVidia display 同發光 keyboard 等等. 上次講過部 Mac 好慢, 而家可以有目標 upgrade!! 定係等 Mac mini 轉款好呢??

隨身聽

2008-10-10T20:12:00.003+08:00

之前提過會入隻高階 in ear monitor 如 Ultimate Ears triple.fi 10 Pro, 不過有睇開呢度都知我最後嘅選擇有時會有變數啦!! 好似呢次選咗 Shure SE530, 原因 Shure 帶得我好舒服, 仲有兩年一換一 (UE 新貨得一年). 入手返屋企時急不及待響巴士試咗一陣, 佢明顯比用開嘅 Shure E2c 好推, 仲有 bass 更強, 其實應該煲返二百個鐘先 comment.

回想返以前用過嘅所謂隨身聽, 初初係小學接觸細舅父嘅有杜比嘅 Sony walkman, 到後來讀 TI 自己都擁有用過 AIWA walkman, model 唔記得, 有杜比同 BBE, 好似有個電箱響機底, 果陣 headphone 用 SONY MDR-E484, 都十幾年前. 到後來第一份長工就買第一部 MD walkman, 係 Sony 第三部 MD walkman Sony MZ-R3, 而家諗返呢部幾正架, 跟住有部橙色 Sony 齋 play, 印像呢部麻麻地... 到後期果鍾意嘅 Denon DMP-R50 (Sharp OEM), 同最後一部嘅 Sharp MD-MT77 加 SONY MDR-E888 headphone, 部 MT77 仲健在兼激新, 唔捨得唔要. 咁 iPod touch 之前就用緊之前提過六年機齡嘅 iPod 第三代 20GB 加 Shure E2c, E2c 之前竟然係用較高級嘅 Etymotic Research er6i, 但唔鍾意佢冇 bass 同最難頂嘅聽診器效果, 所以再上 Shure E3c, 分析力強好多不過都係嫌唔夠 bass, 再試聲稱 bass 強嘅 Koss Spark Plug 呢隻垃圾先入 E2c. E2c so far so good, pop 歌還可以, bass 多過 E3c 同 E4c 但分析力就冇得比.

緣份

2008-10-06T22:57:00.005+08:00

我好信緣份, 要嚟擋都擋唔住, 要走點都留唔住, 好多嘢都唔可以強求...

多得 Facebook, 比我搵返幾位老朋友, 其中兩位係比較難搵. 首先係一位小學同學, 我地果陣好好朋友, 佢小六後移民 NYC, 曾經失去聯絡, 唔記咩情況之下又聯絡上, 一路 keep 住 ICQ 同 email, 直至 911 就音訊全無, 之後 email 又打回頭, 我仲以為佢出咗事... 好彩呢兩日收到佢 Facebook 嘅要請我地又聯絡返!! 原來條死仔去咗關島做嘢, 當堂放心哂!! 第二個係一位嫁咗佢挪威嘅中學同學, 一次疴屎期間突然靈光一閃想試吓響 Facebook 睇吓搵唔搵到佢, 點知真係搵到喎!! 好彩咁啱又撞啱佢上個月帶埋兩個小朋友返嚟參加佢堂妹嘅婚禮. 今晚仲約咗佢去新城市廣場果間幾靚嘅印呢餐廳度食, 佢仲帶埋佢超靚超可愛 mix 嘅大女, 佢個大女仲比我整蠱到嬲咗我... 我冇見佢十八年, 讀完中五我地冇再聯絡, 我不嬲都認為呢一生人都冇機會再見返佢, 所以呢次見返老套啲講真係彷如隔世!! 我地仲約咗響下星期響旺角掃街, 我意思係食街邊嘢果啲!!

搵返佢地真係今年最有意思嘅生日禮物!!

大熱

2008-10-04T03:37:00.003+08:00

話咁快就放咗三日, 今晚同 Apple 佢地食韓燒, 呢次並唔係咩漢洋苑, 而係響友誠商業中心五樓嘅東大門. 果度裝修幾靚幾舒服, 亦都係任食但唔係任飲, 立雜嘢又少, 換鑊又只可以換一次, 貴又貴過漢洋苑, 只係勝在舒服同食物質數高... 都係漢洋苑食得過引啲, 雖然佢乜都 cheap 少少...

終於出咗比 iPod touch 第二代嘅 Invisible Shield, 星際二樣包貼要成 $280, 不過 lifetime 任換就算啦!! 貼咗部機少咗啲質感, 不過就幾乎包到撼一撼, 又夠薄. 講開 iPod touch 同 iPhone 都幾好玩, 買咗個用方向感應器玩嘅 Super Monkey Ball, 但超難控制. 仲有如果狂熱 Facebook, 一定要買事關 Facebook 官方啱啱出咗 2.0 版 client, 超正!! Facebook 呢類網站佢唔係第一個, 但唔知點解全球大熱, 身邊好多人都玩包括我, 唔沉迷都好, 都成日開住.

牛一週

2008-10-01T23:36:00.003+08:00

牛一就要賀一賀, 一連請五日假休息吓... 第一日就返大陸, 呢次係第一次同 Carmen 阿 Moon 佢地上, 主要係同佢地兩 pair 人睇響深圳影嘅婚紗相影成點. 呢次上竟然有阿耀舅父架中港牌 Toyota Alphard, 咁上又快又方便, 真係第一次咁上... 至於婚紗相就出奇地好正喎!! 雖不致於驚天地泣鬼神, 但都一定好過最近呢年睇果幾輯台灣貨好多, 完全唔需要考慮響台灣影!! 我同 Catherine 陪佢地睇咗一陣後就過對面水都國際健康俱樂部揼肯因為咁啱有 coupon... 呢間嘢正就正, 乜都有不過幾貴... 玩好啲我寧願返宏昌, cheap 嘅有華清池. 揼完過返婚紗舖樓下大漁福田分店大拆一輪, 原來唔同分店啲嘢係有少少唔同, 圖中隻蛋國貿站果間就冇!!

清爽

2008-09-29T23:51:00.003+08:00

今日有班都唔加同小龍豪仔遊車河, 秋天一到涼涼地踩得好舒服. 呢次去咗大埔咖哩至尊, 一人一個 set, 真係正!! 如果聽日唔使返工仲正...

屢敗屢戰

2008-09-25T13:23:00.005+08:00

Harddisk 當然換過隻新, 係時候做返個系統還原. 還原最擔心係 Norton Ghost 10 究竟 clone 向 USB harddisk 得唔得, 仲有我試個用佢隻 installation CD 嚟 boot 發覺係冇 clone 嘅功能, 只有還原點. 於是上次 hp 個師傅打比我了解部機嘅問題嘅時候, 我就請教佢仲有咩好嘅 clone software, 佢話佢地唔用 Norton Ghost 並介紹 Acronis True Image 11 Home 比我. 年紀大咗唔再嚮往 install 同 tweak 嘅過程, reinstall Windows XP 同其他 software 真係好攞命!! 所以真係好想乜都唔搞還原返死前狀態就算. 於是四處搵最後比我搵到 True Image 11 Home 嘅 boot 機碟 ISO, 火速 download 完一用之下發覺真係好正. 唔抱大期望咁 clone 返八月頭嘅 backup 大約一小時十分鐘, 約 115GB data. Clone 完好緊張咁 boot 機, 點知真係 OK 喎!! 咁當然 update 返八月至而家嘅 data 好似 Norton Antivirus 病毒定義同最重要嘅就係我呢個幾月所影嘅相啦... 好!! update 完 software 就一定要 reboot, 一 reboot 就出事!! 竟然次次 hang 響 load 入 desktop 果度, desktop icon 同 taskbar 出唔到, 只可以 call 到 task manager 出嚟, 於是反覆 clone 返個 backup 去 trial and error, clone 咗大大話話都有七八次. 永不放棄令我最後搵到問題所在, 原來係 Norton Antivirus 響 startup 出現問題搞到 boot 唔入. 而家終於搞掂哂 backup 返呢個最 update 嘅 copy, 大功告成!!

幾時都覺得 backup 呢個習慣係不可多得, system 有乜東瓜豆腐好簡單就搞掂. 仲有電子產品好似我呢次嘅 notebook, 比多少少買 extended warrantry 真係必要架!! 好似年幾前買機果陣, hp 收我 $6xx 就多兩年即保到 2010 年, 上次死底板呢次死 harddisk 都唔收錢. 最後, 好彩仲有部 Mac 用, 不致於無腦狀態, 但七年前嘅 Power Mac dual G4 到今時今日 performance 真係麻麻, 名乎其實慢半拍, 希望玩多一兩年先再 upgrade, 反正而家主要做 MP3 database 比 iPod 同多個 source 放相.

毒發

2008-09-21T23:47:00.002+08:00

其實小龍有少少心思思想買架勁嘢如 08' Dahon Jetstream XP, 只係唔知有冇地方分期同埋佢可能怕自己三分鐘熱度. 於是我試吓幫佢問單車亭阿偉有冇 Dahon Speed P8, 雖然呢款係制服車, 但無可否認 $3000 內價性比佢最高! 阿偉果然有部黑色, 並聲稱 08' 款, 以友情價出售, 可惜做唔到上次紅色果架咁平.

咁今朝一收工就同小龍去睇部車, 點知原來係 07' 啞黑曲 bar, 小龍冇乜所謂咩年份, 所以最後成交咗.

天氣轉涼三五知己整返個豆腐花團就一定走唔甩!

播毒

2008-09-17T23:32:00.000+08:00

首先報導一吓肥陳嘅最新情況, 從一位網友所拍底嘅相可以見到打撈船華天龍正將肥陳隻船吊起, 該殘骸而家正安放響水警基地對出, 前途未明.

至於今日收工就同小龍約咗豪仔走轉大埔食晚飯, 地點又係昌運中心豆漿大王. 小龍似乎幾嚮往單車生活, 分別試過我地部車後打算買返架 Dahon 玩吓...

家好月圓

2008-09-16T18:37:00.001+08:00

過時過節 Catherine 屋企就最熱鬧, 每逄中秋例係去佢阿嫲圍頭村度 BBQ, 今次仲多埋我阿爸阿媽, 果晚連埋佢老闆應該都有三十人. 之後返屋企休息一陣就約咗豪仔同幾個孖橋車友 345am 集合出發去大尾督睇日出, 好彩真係睇到, 行程尾聲就到富善邨食早餐, 跟住返屋企瞓.

返到屋企又唔捨得瞓, 整呢整路放咗部 Dopod U1000 響部 hp notebook 個手枕位上面, 即刻聽到幾聲吱吱怪響都不以為意, 跟住聽到幾聲卡卡聲先心知不妙, 部機攞走都攞唔切, 不過已經太遲... 原因係話說 U1000 機底有舊大磁石磁住個可拆式 keyboard, 我就係咁啱放咗響機面手枕位上面個位置, 我當時唔知 harddisk 係響果個位下面亦醒唔起有咁嘅問題, 仲要係放正 system 果隻 harddisk (部 notebook 內置兩隻) 上面. 今日唯有死死地氣拎去太古城 hp customer service center 度, 要等幾日... 希望 backup 還原冇阻力啦... 我好擔心好唔想由零開始裝過哂啲嘢...

部 iPod touch 暫時都係唔 jailbreak 住, 因為 iTunes App Store 都有好多免費 application download. 至於 comments 就係過 data 超慢, 不過 Apple 配套真係掂! iPhoto 一個個 album 同 iTunes playlist 一齊 sync 落部機度. 講到部機外型真超薄, 真係唔明點塞咁多嘢落去, 有時揸揸吓仲驚跌落地!! 音質方面都唔係人地講得咁差, 我就收貨... 電量響聽歌方面算強, 頭先去咗幾個鐘頭街一滴都冇跌過, 比舊果部強太多!!

而家 Mac OS X & Windows Mobile & Symbian UIQ 三大流動 OS 我都有齊!

係你就係你

2008-09-14T23:27:00.004+08:00

今日幾乎買唔到新 iPod touch!!

一心做節 BBQ 前 6pm 去到沙田新城市廣場出機, 點知只有豐澤賣淨 16GB, 全層大型連鎖電器舖 sold out!!! 真係得人驚加灰爆... 心諗唔通天意出唔到機之際, 好彩之後去太和做節果度間豐澤竟然有!! 果然係冷門地方!!

呢一代個 packing 非常簡單非常 fit, 放多啲嘢都唔得, 為咗降低成本咁喎... 唔又係, 開咗盒唔揼都只會收埋... comments 暫時只係一拆開攞上手真係超正!! 仲薄過 iPhone 3G!! 如果 iPhone 係同 htc 果啲一樣係 PDA phone, 咁 iPod touch 就係大容量 WiFi PDA. $3100 好過比人綁 24 個月, 反正 iPhone 仲有少少唔完善嘅地方如自閉 bluetooth 等等...

值得一提五年前 iPod 第三代個 dock 竟然啱用, 正呀!! 等我試吓 jailbreak 佢先!!

繼續欲望

2008-09-10T23:34:00.007+08:00

沉晚又同 Ruby 佢地去左荃灣小肥羊打邊爐, 冇乜特別, 但都總算大拆一餐. 跟住返屋企睇網站即時報導教主 Steve Job 發報新 iPod. 咁講吓我期待咗好耐嘅第二代 iPod touch, 最驚喜莫過於價格大幅下調, 另一方面由於 64GB nano flash 價格仲高企, 今次頂級依然係 32GB, 有少少失望!! 改良唔太多, 例如 iPhone 3G 弧形底同 volume 掣, 最吸引就係內置 speaker... 今日去過好多街舖都仲未有, 希望一個星期內入手.

另外一件有趣嘅玩具就係 Sony A-900, 追溯到 1998 年 Minolta 為慶祝 70 週年之時, 推出跨世紀頂級機 Alpha 9, 經歷過合拼成 Konica Minolta 再將相機部門賣比 Sony, 十年後嘅今日 Alpha 9 數碼版而家先出, body 約 $23000 左右, 同 Nikon D700 價錢差唔多. 興趣唔係冇, 只係唔想又轉 system 同數碼 body 跌得太快...

好耐冇去元朗, 趁 Catherine 放假同佢去行咗半日, 去埋祥記單車行同雲鵬單車店. 講開 Pacific 代理雲鵬, 終於見到 08' Reach Racing SL, 架車紅白色幾靚, 門口標 $17800, 打動唔到我, 我覺得而家果架無論外型同零件都正啲!! 返而吸引我係 24 速嘅 Birdy Intego, 個人其實喜歡白色 Birdy, 不過要買就唔想再死改爛改, 同埋想要一架行 SRAM Dual Drive 嘅車只有灰同藍嘅 Intego 似乎最啱, 盛惠 $15800... 當然短期內我唔會再買車!!

最後嘅節目係食超大型壽司, 唔錯唔錯...

喪食團

2008-09-05T22:05:00.005+08:00

好耐冇去過松屋日本料理, 沉晚我地一班同事拖男帶女, 一行九人就響果度搞喪食團. 去之前同龍哥走轉大尾督忠誠打咗過底, 都有少少擔心影響食量, 好彩都冇乜... 愉快嘅節目最唔想第二朝一早起身返工, 不過沉晚瞓得算好, 貴精不貴多, 瞓四粒鐘一覺到天光, 我最近呢幾個返早瞓到朝早四點幾就紮醒瞓唔返, 好攞命...

原本想出張大合照, 只怕當事人怕出鏡, 唯有出其中一樣我喜歡嘅燒羊架.

最後, 今日得知至愛樂隊 X Japan 響下年一月響機場博覽館開 show, 聲稱將 Tokyo Dome 個舞台搬過嚟!! 我真係超感動極期待!! 十年前佢地拆夥我仲以為有生之年都冇幾會親眼睇佢地嘅 live, 我諗到時我一定睇到流淚... We are X!!!!!!

期待已久

2008-09-03T23:29:00.002+08:00

好辛苦忍住唔入手 iPod Touch 莫過於轉款, 轉成點未肯定, 提升容量就梗架嘞!! 傳聞仲有 GPS, volume 掣同埋同 iPhone 3G 一樣嘅弧型底殼. 而我部舊 iPod 都係頂唔順換咗電, 而家直頭重生一樣!!

好期待九月九號教主 Steve Jobs 嘅發佈會, 佢近來健康唔太好, keynote 真係睇一個少一個...

首航

2008-08-28T23:57:00.012+08:00

今日終於得閒同豪仔走轉烏溪沙至大埔, 順便想去單車舖買頭尾燈同叮叮. 呢架車其實唔想搞任何嘢, 本應連頭尾燈同叮叮都唔想加, 不過有時出夜車有就好啲. 叮叮原本想買 Haro 嚟襯色, 可惜搵哂全大埔都冇, 但響登山者搵到有個金色一撥響兩吓而又勁清脆嘅叮叮, 我好鍾意!! 要成 $80 都照入, 痴線!! 跟住頭燈都係用我另外兩架車果款 Cateye HL-EL135, 平靚正又夠光!! 尾燈就用 LR1 電嘅細 Cateye TL-LD270. 碼錶呢?? 唔裝啦!! 呢架車冇必要!!

踩咗成個下晝超熱超辛苦嘅原因莫過於為咗型!! 我竟然連快拆水壺架同水壺都冇裝, 搞到渴到死, 真係自作孽!! 講返性能方面, 速度就一定冇, 不過出奇地內三波走今日條路線完住冇難度, 只係可能踩開密齒比, 三個波好多時都有半天吊嘅感覺. 車架上次提過超穩定, 並唔係比小朋友玩嘅玩具咁兒戲. 十二吋呔雖然效能較低, 上搏過氹仔都冇問題. 值得一讚張原裝櫈係我坐過最舒服, 大細又啱我, 連火炭世紀阿偉竟然都話成架車最欣賞係佢, 可想而知... 至於收視率一如所料超高, 好似仲高過部 LG, 我估主要係 LG 多數係玩小輪跑車先識欣賞, 而呢架就識唔識單車都覺得佢特別, 直頭好似拖住件索女出街咁不斷有途人同車友行注目禮, 同埋頭先問嘅人亦都好幾個, 虛榮感同部 LG 一樣滿分!!

真係想快啲天氣涼啲帶去南丫島同長洲甚至澳門走轉...

草蜢仔

2008-08-27T03:54:00.005+08:00

之前講過話三號車會揀綠色 Strida 或 A-Bike Plus, 陰差陽錯入手法蘭西罕物 Mobiky Genius, 一樣係綠色, 比 Strida 靚, 但同時比佢貴同重, 成 28lbs. 咁重主要係佢機關較多, 不過唔緊要, 佢設計原意係三秒超快收摺跟住比你推住行, 冇乜機會比你攞住, 因為就算輕如 A-Bike 5.5kg 長期咩住響背脊都幾攰.

呢個世界冇完美嘅嘢, A-Bike, Strida 同而家呢架各有各好壞... 首先講吓 A-Bike, 真係摺得細同最輕, 但犧牲乘騎性, 平路短程駁腳一流. Strida 收摺最簡單仲可以推住行, 但較大同較重, 同 A-Bike 一樣單速, 似乎最 balance 嘅一部. Mobiky Genius 啲人來來去去都係批評貴同重, 正就正在真係可以摺得好快, 乘騎性最好因為有經典老牌子 Sturmey-Archer 內三速!! 仲有一樣係我接觸真車先知就係佢造工一流好紮實, 佢個設計真係好精巧, 唔怪知要用歷時兩年及 100 萬美元嘅投入開發啦. 其實最鍾意就係佢同我部 LG 一樣極罕有, 響香港同人撞款幾乎等如零. 其實仲有 Pacific CarryMe, 佢有 Speed Drive 版但我唔鍾意佢摺法所以唔諗.

響新港城郵局收件後即時就地開箱踩返屋企, 唔使睇 manual 都搞得掂超過癮!! 等我過兩日 dayoff 走轉吐公認真試吓車兼影返啲相先.

地標沉沒

2008-08-26T11:22:00.001+08:00

馬料水水警基地肥陳都有十幾廿年歷史, 果度主要係一個艇家補給站比沙田至大埔嘅單車友, 陳奕迅同容祖兒幾年前響果度拍過一套叫魂魄唔齊嘅電影. 咁歷史悠久嘅地標今次終於不敵九號風球嘅衝擊沉咗. 大多數車友都覺得好可惜, 雖然我只幫襯過一次半次, 但都希望佢可以再開返, 話哂都算係經典嘛!!

集思廣益

2008-08-20T15:43:00.008+08:00

終於到咗飛機拖車嘅考試, 當初學重型貨車都係為咗佢. 學飛機拖車呢樣嘢主要係當初入呢間公司簽咗 agreement, 同埋一旦好似而家咁考到會有幾好嘅人工增長.

至於今日嘅考試係一啲壓力都冇, 因為衰咗唔使好似運輸署咁要排過期又要比錢, 所謂考官只係部門 superintendent, 佢好好人好隨和. 回想當初學同學重貨一樣好多挫折, 學果陣最大問題一嚟就係推架真飛機, 所以學嘅過程有一定嘅壓力. 開頭最唔掂係搞唔清楚攞軚嘅方向, 仲好多技巧唔識, 推到亂哂龍... 最大鑊果次係推貨機推到拖巴摺咗又拆唔到, 雨又越落越大, 到拆到同埋拆埋 steering bypass pin 個 nose gear 又 neutral 唔到, 真係到爆... 好彩除咗自己 team 嘅 supervisor 悉心教導外, 我都請教咗好幾位同事提供心得. 記得最重要一次係第二 team 同我一樣好鍾意玩高科技嘢嘅 supervisor 親身示範講解一次, 佢講得非常簡單我反而易明, 果陣直情即刻開竅咁, 自此之後我就明白固中嘅原理, 呢個過程好難忘.

無窮無盡

2008-08-17T12:32:00.007+08:00

服役五年多嘅 iPod 第三代 20GB 舊電第三次打柴, 都係時候 update 吓呢件最長壽隨身裝備. 睇中當然又係 iPod, 幾乎係 Mac 用家不二之選尤其是我龐大 MP3 database 係用 iTunes 去 manage. 由於唔會買 iPhone 住, iPod touch 似乎係最佳選擇. 佢而家最大容量只有 32GB, 之前都提過 32GB 或以上就入手. 呢個星期真係忍得超辛苦, 好多次都差少少入手, 忍住嘅主要係 32GB 出咗半年, 差唔多時候出 64GB. 仲有成個 series 去到九月就一年, 有機會轉款, 好可能外型會有少少改同 features 方面唔止加大容量咁簡單, 例如傳聞會加入 GPS. 另外, 同時心思思想將用咗二年多嘅 Shure E2c 上 Ultimate Ears triple.fi 10 Pro, 暫時考慮吓先... 定係絕版 60GB Sony PS3 呢???

咁部 iPod 第三代點算?? 我係唔會揼因為佢係咁多代 iPod 最靚, 特別係果四粒紅燈!! 我會再換電用佢嚟做 removeable hard disk.

多年嘅病態購物欲真係無窮無盡...

派糖

2008-08-15T20:28:00.002+08:00

話說澳門政府為咗舒解民困, 對居民大灑金錢, 我係永久居民當然受惠. 啲錢點用?? 或者去威尼斯人買舖大細, 睇吓好唔好彩... 話時話都好耐冇去過澳門, 其實都好掛住.

激動

2008-08-09T12:35:00.004+08:00

一向唔係啲咩愛國份子, 對奧運亦冇乜興趣嘅我, 都比開幕式嚇呆...

由於返夜更嘅關係, 我只睇開場果半個鐘同最後李寧點聖火果段, 跟住再睇返新聞精華片段咁大把... 之前對張藝謀根本冇乜期望, 但整個過程真係精彩絕倫, 特別題材揀得非常好, 彷彿提醒各老外, 中國嘅四大發明, 深遠地影響住全世界. 有一幕最難忘係升國旗唱國歌, 真係睇到眼濕濕.

呢個開幕式不旦冇失禮人, 仲令所有中國人驕傲!! 如果開幕式好似當初咁比史匹堡攪又會點呢?? 我肯定一定冇咁好!!

好味道

2008-08-06T23:31:00.002+08:00

好耐都冇試過八號風球返工, 興幸係響我返工左右掛同個風比較弱, 所以仲有巴士. 返到公司當然冇乜嘢做, 做咗一隻半機就收工, 由於八號風球開工有雙工, 八點返到五點半食到正足足一個 double, 個風好似為我地而掛咁.

串燒團

2008-08-05T03:11:00.003+08:00

難得星期一第一日 off, Catherine 又要上堂, 梗係參加逢星期一孖橋小輪車慢轆團, 今次終於食到串燒, 自己食嘢加飲嘢加加埋埋成 $70, 都算幾盡興. 回程同班團友慢轆吹水最寫意, 第二朝唔使返工心情最輕鬆.

可能唔可以每個星期一 join 佢地玩, 所以玩得特別開心!!

回味之旅

2008-07-31T00:17:00.005+08:00

我同 Catherine 一個月都會返大陸揼一兩次骨 relax 吓, 前日又上但多咗 Ruby 兩個同 Andy, 呢次係玩過夜... 首先係去皇室假期對面華神火鍋打邊爐, 我同 Andy 就幾鍾意, 其餘就麻麻. 由於玩過夜, 去間好啲所以揀冇去差唔多兩年嘅宏昌休閒島, 我地五個人, 打電話叫佢地去華神車我地, 點知係架 Benz. 第二朝中午離開去國貿站附近飲茶, 然後返羅湖口岸修甲, 趁佢地修甲我就同 Andy 去行單車舖. 第一站係賣 Dahon 出名嘅樂園路單車舖, 估唔到個格局係咁... 成間車房咁, 又黑媽媽, 果度好多連官網都冇嘅 Dahon 大陸 model, 不過又黑又熱又迫一啲都唔好行, 果度比較有興趣係 07' Curve SL, 只賣 RMB$3980, 係全店唯一令我有興趣嘅野... 樂園路果度有車友推介我地到體育館有間叫騎行者嘅單車舖, 佢地話幾好咁喎... 點知去到我覺得一般, 果度比較企理不過又係冇冷氣, 賣嘅嘢較高檔, 低嘅有 JAVA RB 同 MTB 架, 仲有國產 carbon RB 架幾靚, 賣人仔五千頭... 不過唯一係 Ergon grip 比較有興趣...

總結呢個旅程好回味, 見 Ruby 同肥仔對我嘅景點選擇都好滿意, Catherine 亦都話去宏昌係正確之選.

走漏眼

2008-07-28T19:32:00.009+08:00

RPG (只限美式) 係除咗第一身射擊外最喜歡玩嘅類別, 早兩日上網無意中發現一隻不嬲對我嚟講完全唔起眼嘅動作 RPG Mass Effect. 一開始玩已經覺得同兩年前響度介紹嘅 The Elder Scrolls 4 : Oblivion 一樣震撼!! 玩咗一陣未有咩詳盡玩後感, 值得一提只係隻 game 係絕無播片, 全部係 XBOX 360 即時運算, 皆因佢係用 Gears Of War 嘅 Unreal Engine 3 做 3D 繪圖引擎, 唔怪得畫面咁得人驚!!! 由於冇播片嘅關係, 一隻 DVD 已經有好豐當嘅內容如全程語音加華麗電影過場同埋巨大嘅世界, 只係同 Oblivion 其中一個最大嘅分別係由自度冇咁大, 但比 Oblivion 強就係所有設定無論人物同飛船都好正, 尤其是主角 Sherpard 隻 SSV Normandy 戰艦真係超型, 成個遊戲過程就同睇電影一樣, 悅耳嘅 soundtrack 仲攞埋獎, 唔介意狂睇英文字幕一定必買!!

故事背境好正, 引述台灣網友響 mobile01 嘅介紹:

"人類在火星挖到外星古文明, 科技瞬間往前兩百年, 並學會操縱 Mass Effect, 減輕太空船的質量, 終於達到超光速旅行, 進而在太空中發現神秘的 Mass Relay, 這是超大型的 Mass Effect 產生裝置, 可把太空船的質量降到趨近於零, 一次跳躍數千光年. 遊戲開始在人類掌握 Mass Effect的百年後, 已經和數種外星種族接觸."

呢隻只係三步曲嘅第一集, 等我玩多一排再同大家分享玩後感...

大容量

2008-07-25T23:33:00.004+08:00

留意咗 micro SD 轉 Memory Stick Pro Duo adaptor 一段時間, 沉日去黃金驚見 8GB Sandisk micro SD 賣 $249 連小型 card reader, adaptor 就賣 $48, 夾埋 $300 都唔使, 仲平過正版 Memory Stick Pro Duo. 最重要係 SD 用途同壽命一定多過 Memory Stick, 就算將來 PSP 玩完, 張 micro SD 可以用響其他地方. 兼容度方面, 除咗唔可以響 PSP format 之外其他通通冇問題. 速度分面似乎快過之前用開嘅 Memory Stick, 因為以前玩 Outrun Coast to Coast 會疾而家唔會. 咁剩返果兩張 4GB Memory Stick Pro Duo 就當 USB 手指用, 反正放返出去都唔值錢.

最後, 大家想買 adaptor 要問清楚 support 8GB micro SDHC 先好買, 因為市面上 adaptor 係有幾款.

成人向

2008-07-24T10:54:00.006+08:00

上集 Batman Begins 太好睇, 所以好期待今集.

一向都好喜歡 Batman, 一來近年啲設定好型, 二來主要係童年時嘅情懷... 記得細個果陣好鍾意追麗的果一套連續劇, 一眾角色無論忠奸到而家都仲好深刻. 以前果套就好似粵語長片咁好單純, 好似睇卡通片咁好易睇得明. 去到今集就比較深少少, 好似將 Diehard 果頭警匪片嘅原素加入, 犯罪再唔係殺人放火咁簡單. 莫講話小朋友, 連我地大人都唔係睇一次就完全明哂佢講乜.

終於都等到加人工, 雖然唔係超多, 但比想像中好, 不嬲都唔會咁大希望, 所以特別開心... 揸拖車推機果度開始上手, 正所謂萬事起頭難, 同學重型貨車一樣, 初初都遇到唔少挫折, 到而家能夠自己一手一腳推到真係幾有滿足感, 真係要多謝我大佬悉心教導.

不嬲對於自己工作不感興趣嘅我終於能夠搵到少少嘅滿足感...

暴肥

2008-07-17T01:16:00.003+08:00

個人暴肥都幾難抑止...

尤其是 Catherine 生日呢個幾星期, 先係勁食 Karaoke, 然後就頭先大圍小肥牛火窩局. 先講唱 K, 一樣係旺角中心 Neway, 不過冇食 buffet, 呢次係散叫, 又出奇地平喎, 但成班都勁叫洒飲, 對於我地兩個唔飲就勁蝕, 好彩喜歡唱 K 嘅我喪唱返本... 雖然係咁 Catherine 班朋友算係咁, 買咗個好好食嘅蛋糕. 玩完成個人一陣煙味都幾討厭, 仲諗住立法後唔會再咁... 跟住頭先同 Kitty 佢地打邊爐, 食物質數好高, 又有刺身叫, 又係喪食一輪!! 仲有後日 Ruby Tuesday, 問咗賴輝借咗張半價卡, 睇嚟個肚腩只會越來越大.

打水戰

2008-07-12T03:30:00.006+08:00

難得今日算好天, 下晝去 Catherine 度電髮做 color, 夜晚同個踩 B 仔咬柴嘅 Andy 踩復康團, 一出車就撞到香港討論區嘅阿 Chris, 佢架 KHS F20-RA 由 TT 頭轉咗做 RB 頭, 睇嚟佢地越來越多人用 RB 頭. 我地踩到創新路就分手, Chris 單拖操車, 我同 Andy 就去咗大尾督吹咗陣水, 跟住佢話落沙田睇佢班朋友玩 B 仔. 到咗沙田雨越來越大, hea 咗陣唔對路打水戰返馬鞍山, 返到屋企差唔多 2am. 洗埋車沖埋涼成個人舒服哂!! 好彩冇聽 Andy 講響沙田等停雨, 而家啲雨仲大過頭先...

成日月得一雨日好天, 日日都落雨, 想出車都難, 而家仲行雷劈到飛起, 今朝四點零直頭劈到屋企跳掣, 呢啲天氣真討厭...

無所用

2008-07-10T23:09:00.003+08:00

上次同 Catherine 去海洋公園嘅公司聯歡, 問答抽獎竟然抽中我!! 獎品係值千幾蚊嘅鉸剪同 $300 惠康 coupon. 把鉸剪當然我用唔著比 Catherine, 只係 coupon 有用...

頭先同阿珊佢地成家佢食泰國嘢, 都幾好食. 當中當然佢兩個仔都響度, 同佢地兩兄弟都食得好開心, 見到佢地總會諗起細個同細佬一啲點點滴滴, 大個咗成家立室後各有各家庭, 好多嘢都不復再...

廢武功

2008-07-04T19:48:00.002+08:00

傷咗後都冇踩過較長嘅路, 都係馬鞍山至沙田或大埔, 頭先走咗轉大尾督, 都成兩個幾月冇去過. 今日個人立到爆, 由頭到尾都踩得好辛苦, 踩踩下又要休息, 無端端又頭痛, 好似初初踩車咁...

好耐冇食過忠誠嘅冬蔭功肥牛河, 真係好食到爆, 尤其是啲湯, 次次都飲哂!!

選擇

2008-07-01T19:28:00.008+08:00

今日早咗返屋企, 見好好陽光就同車車洗白白, 洗完就放響度, 欣賞吓都好開心.

油價越來越高, 好似台灣好多人都轉返踩單車, 攪到當地小輪車經常斷貨, 好可惜單車好難響香港地位提高, 唔似台灣同國內. 雖然係咁, 當做一種運動同嗜好真係唔錯, 所以最近忙於做 research 研究我嘅三號車, 究竟好踩嘅 Strida 定摺得細同輕嘅 A-Bike 好呢?? 好難揀... 我不嬲都傾向 Strida, 不過呢兩日睇真啲 A-Bike 摺得細同較輕又真係好吸引, 以下 video 就係呢兩部車大比拼, 大家點睇??

重投 3G

2008-06-29T12:59:00.004+08:00

用咗 Peoples 個無限 EDGE plan 都好幾年, check 返用量平均每個月二三百 MB 流量, 所以想用吓越來越平嘅 3.5G HSDPA. 一來較快, 二來唔好浪費支援 3.5G 嘅 Dopod U1000. 選用 3HK 嘅 3Home PC plan, 價錢比 Peoples 貴少少, 只有 500MB 唔係無限, 不過 cover 到我用量, 仲有 1600 分鐘 airtime, 價錢比 Peoples 貴 $30 左右.

實戰 performance 唔係特別快, 主要係 Windows Mobile 嘅 web browser 如 Pocket Internet Explorer 同 Opera 本身係慢, 就算 Wi-Fi 都一樣, 最主要出圖明顯真係快好多. 雖然而家有好幾款 UMPC 都只係 $4000 有找, 但暫時都係 Dopod U1000 啱用多啲.