給十年前的我

我估應該都唔會再有人睇呢個 blog... 成差唔多十二年冇再 update 究竟呢十年發生咗啲咩事？我可以話俾大家聽我嘅人生都係一塌糊塗... 我依然都係呢間公司做，最長呢份工做咗到十一二年左右掛，胡呢糊塗由初初諗住做個 hea 霸變咗做個掃把，最近仲轉部門轉咗一個唔使掂飛機又唔使返夜嘅工作，為嘅係乜嘢？咪就係因為我嘅家庭狀態改變咗囉！我人生有三次結婚時撻 Q，而結得成果次即係而家呢次我竟然同一個國內背景嘅女仔結咗婚而且佢而家佢有咗五個月身紀，完全都唔係我計劃以內嘅嘢嚟。 仲有呢十年去咗唔少旅行啦，而家累積嘅國家數量足足有 28 個，但係仍然唔滿足囉，因為我目標唔止咁少，但係疫情同埋家庭狀況似乎會阻礙左我嘅計劃進行，非常可惜... 去咗咁多次旅行最威果次就係由香港西九高鐵站出發搭火車去北京然後由北京搭西伯利亞鐵路去俄羅斯再由俄羅斯坐火車去波蘭玩。 今日無端端睇返呢個 blog 部份嘅 post，有好多嘢我都想同返當時嘅自己講，其實都好好笑！所以突然間就好想寫一篇嘢 update 下最近嘅情況啦，不過相信我啲朋友都唔會再睇呢個 blog。除咗家庭狀況嘅改變仲有而家世界大亂病毒入侵，原本諗住航空業係鐵飯碗都變成一份危危乎嘅工作，有好多嘢其實都估唔到... 唔知十年之後我會點呢？如果我屋企人仲係齊齊整整咁我諗我個仔可能都差唔多十歲，原本都唔想要小朋友而家無啦啦咁嘅年紀差唔多五十歲先至整一件，真係自己攞嚟衰！我真係覺得人生從此完咗，頭先睇返自己以前寫嘅嘢都係個 plan 咗唔生小朋友去旅行算啦... 十年之後嘅我未死唔知會想同今日嘅我講啲乜嘢呢？

別了

呢一排返早之前成日眼光光等天光, 就算瞓得著都係個零鐘, 所以起身返早係好痛苦. 唯一嘅舒緩就係巴士上有 Shure SE530 同 iPod touch 呢個靚聲組合, 每次聽都好享受!! 正如好耐之前提過 iPod Shuffle 推出後, 我將 32GB MP3 random 咁 play, 今朝就聽到孫耀威一首未聽過嘅新歌 --- 眼閉, 好好聽!! 可惜呢首歌冇 MV... 一路搭車一路諗吓今晚響度記低首歌, 同時亦考慮將呢度劃上句號...


不經不覺呢個 blog 都寫咗四年, 都應該係時候休息吓. 原因係呢一排冇乜心情又有啲懶, 唔想有交功課心態去寫, 又唔想超過一個星期都唔 update, 所以唔係咁想再寫落去... 呢次停幾耐我唔知, 睇心情啦... 一個月唔定一年唔定又或者唔會再寫都唔定... 點都好, 好多謝大家支持, 尤其是果啲齋睇唔出聲嘅朋友, 最後祝妹妹阿 Milk 今日生日快樂, 佢話佢間唔中都有入嚟睇架.

文化

拖咗三個月終於可以到惠州影相! 全因為就天氣就假期搞到咁遲... 值得一提行程途中我地被司機帶咗去一個小鎮食 RMB$8 煲仔飯. 味道真係唔錯, 只係三十幾度冇風扇冇冷氣之下食真係幾難忘... 仲有我參觀過佢地嘅廚房, 一如所料衛生欠佳, 洗碗果盤水啡色嘅, 好似黃泥水咁!! 最後, 司機未經我地同意改咗影日落嘅地點由大東海去咗大亞灣 (核電廠??) 一個冇地平線日落嘅海灘... SHIT!!!

國內同胞啲文化真係接受唔到到, 同佢地公司投訴永遠都好好禮貌咁耍你, 乜都話得得得, 但永遠唔同你跟進, 個個 A 字搏! 衛生又係咁, 十年如一日差到嘔... 仲有揸車又係亂咁嚟, 坐佢地車其實好得人驚!! 呢啲文化我諗唔係呢十年八載改變到...

巨星隕落

好多巨星都突然英年早逝, Michael Jackson 唔算係我偶像, 不過我都好鍾意佢啲歌同跳舞. 佢同其他歌星一樣, 一死就間間 DVD 舖都播佢啲 concert, 個個都圍住睇, 未死之前又唔見係咁, 永遠都係咁諷刺!!

呢幾日四圍播佢啲歌, 但好似冇乜人提或者識呢首情歌. 我唔算係粉絲, 不過都有佢嘅 MP3 同 DVD 收藏, 慢歌嚟講呢首最鍾意!!

跌眼鏡

賴輝上次元朗團之後已經話想再上大漁食鐵板燒順便睇單車, 不過最後咕咕提議試新嘢, 同樣係鐵板燒日本料理叫鳳山鐵板燒日本料理, 型式其實同我嘅至愛大漁差唔多, 只係多啲垃雜嘢食例如生蠔咁解... 任食當然喪叫, 食物質數一流, 個個都讚不絕口! 只係唯一一樣係冇大漁咁就腳…

行程另一個目的當然睇單車, 目的地一樣係樂園路同華強南路. 樂園路一向有個開驚人價嘅賣點. 今次唔例外, 口痕問吓標 RMB$9500 嘅 Dahon Mu SL, 佢地一開就 RMB$5800, 冇得再還價亦唔預你還! 計返港幣 $6600, 我自己都嚇咗一跳!! 不過冷靜落嚟諗吓再買多架托咩!! 咁算啦… 但全場最孤寒嘅小龍竟然話買, 仲係實牙實齒果隻, 即時令全場大跌眼鏡!! 可能上次元朗一役, 佢發現輕量化嘅車會踩得輕鬆啲... 而大洗嘅我竟然一啲收穫都冇!!

見到小龍有新車我都戥佢開心, 哈哈! 真係毒海無涯!

征服

上次遠征元朗大敗入廠, 一直耿耿於懷, 對以後落斜有好大陰影, 亦都對小輪徑性能失去信心... 直至打造完 26" 旅行車後, 心思思想再試一次!!

由於成日同小龍佢地一齊出車, 影埋啲相會 send 比一啲玩單車嘅朋友, 就係咁, 同事人山個幾月前已經叫我搞單車團, 因為佢今個月放大假. 心裡第一個 idea 就係元朗, 第二個 idea 就係唔行林錦公路.

天公總算做美, 係一到河上鄉豆腐花廠先落咗大半個鐘狗屎, 及時避過一劫, 其餘時間都冇雨. 之前果晚唱完 K, 成三點幾先瞓, 跟住 0800 出發到大圍集合食早餐玩到 2320 先返到屋企, 全程約 110KM, 攰到飛起但個個都話好玩!! 真係多謝大家比面出席, 同時亦都要多謝帶路嘅電鋸同賴輝!! 今次最勁有兩個人, 小龍單餅負重磅唔使推車走完全程; 第二個係阿賢, 同我地大圍至元朗不特止, 佢由油痲地屋企經大埔道入大圍都係踩, 回程都係踩返屋企, 真痴線!!

大家玩得開心我仲開心, 尤其是事後收到阿衡同人山嘅 SMS. 搞團大家開心反而係其次, 最重要係安全同個個平平安安返到屋企, 我係過來人深深體會到呢點... 所以有個問題係踩單車徑冇乜所謂, 但踩街我始終建議大家買返頂頭盔好啲. 其實好多人都冇, 我同朋友嘅團係咁, Facebook 果幾次 Dahon 團又係咁, 十個得兩個帶就響馬路四圍踩... 我上次出事之前都認為唔係咁必要. 回程同阿衡見到一個七十幾歲嘅阿伯帶住頭盔踩車, 原來佢識嘅, 佢話個阿伯日日走三轉唔知沙田至大埔定邊, 日日三轉喎!! 有一次炒車撞到個頭昏迷咗幾日, 之後就開始帶頭盔... 真係針唔吉到肉唔知痛!!

終於都征服咗元朗, 用征服對好多車友嚟講好似誇咗啲, 對我就唔係. 頭先同阿衡響電話傾開佢話下次想搞個萬宜水庫東壩日出團, 等我計劃吓先... 夾大家時間同天氣最難搞!!

升級

Olympus E-P1 係將史前 Olympus Pen 現代化, 雖說 Micro 4/3, 但唔係特別細部, 原先想將佢代替 Ricoh GR Digital II, 不過有幾樣嘢令我卻步. 第一就係冇內置閃燈, 作為隨身機唔夠全面; 第二兩支鏡都唔太啱心水; 第三就係太貴. 諗諗吓 Micro 4/3 市場係針對有少少要求又嫌 DSLR 大部嘅人用, 代替唔到 DC 仔同 DSLR. 反而之前我覺得勁樣衰嘅 Panasonic Lumix G1, 細心研究之後發覺同樣 Micro 4/3 佢好玩好多. 主要係 flip LCD 同強勁嘅 EVF, 不過就衰在冇機身防震. 如果我冇 Panasonic Lumix L1, 我會入呢部做旅行機. 細心啲諗 Panasonic 用縮水 DSLR 做外型似乎係想話比全世界知, 冇 DSLR 反光板呢個包袱, 可以整部咁嘅換鏡嘅數碼相機出嚟, 彷彿係對將來數碼相機一個革命.

Pentax K-7 終於開始響各大電器舖做 demo, 淨 body 差唔多一皮嘢, 莫財但好想快啲擁有, 有時間去試試先!!