好滿足

我同阿賢支鏡雖然型號一樣, 由於年代唔同, 新舊版嘅外觀就好唔同. 我個支明顯係八十年代款襯新 body, 好攪笑!! 唔同阿賢果 set 咁 match. 唔好睇我支鏡老老土土咁, 佢嘅力量簡直超乎我想像, 呢啲係上次夜晚響旺角試阿賢果 set 試唔到...

原本因為朝早狂風暴雨嘅關係諗住取消去馬鞍山公園影相, 但阿賢堅持要去, 仲攞埋佢支 Minolta AF 80-200/2.8 HS-APO G 出嚟玩. 好彩天氣慢慢轉好, 仲出太陽. 新屎坑硬係狂試支新鏡啦!! 公園花同蟲嘅種類唔多, 但都影到不亦樂乎. 呢支鏡 AF 比我另外果支麻麻, 影蟲呢啲咁精細嘅嘢我索性用 MF, 準好多!! 不過 macro 其實都幾難影尤其是影蟲, 例如我 focus 隻眼, 個身或主體好少好少咁郁一郁就 out focus, 仲有我呢支鏡影蟲有一定難度, 因為要隊埋去影, 細胆嘅蟲會好容易被嚇走. 加上比蚊針同個太陽曬住影真係攞命, 成個人同相機都係汗, 隔咗咁多個鐘而家仲頭痛, 真係少啲定力都唔掂... 雖然係咁, 呢次努力真係冇白費. 呢輯相雖不至驚世巨作, 但對我嚟講係近年最滿意嘅一輯.

總括嚟講支鏡勁 sharp, 顏色鮮得嚟好自然尤其是膚色, 散色好靚, 影人一流. 之前因為富士啲顏色想過檔 S3 Pro, 而家唔使嘞... 可能有啲人未必會鍾意, 但我就勁鍾意! 我成日都想將我之前用過嘅 Fujifilm FinePix S602z 嘅色加 Panasonic LUMIX FZ20 嘅銳利同而家部 KM Dynax 5D 嘅低雜訊加埋一齊, 今日呢輯相做到啦! 正!! 我諗正如台灣 MinoltaFans CLUB 討論區網友所講 Minolta 50mm 定焦鏡嚟講呢支一定係最強!!

影相同結他一樣唔係一味器材先決就得, 技術反而係最重要嘅一環. 自問自己技術麻麻, 學阿賢話齋有啲人好有攝影觸角, 佢地可以張一件好普通嘅嘢影到好靚, 我諗呢啲係天份. 我好相信天份, 當然後天嘅努力都係成功嘅主要因數之一, 但我相信冇天份未必可以好 outstanding. 就天份方面我鍾意嘅音樂揸車方面我覺得唔錯, 只係影相就差少少, 不過我成日響呢方面思考同感覺... 好似好虛幻咁但我相信好多人會明我講乜嘢. 個個人都有唔同天份, 你要我畫公仔同 DIY 模型有阿駿咁叻我覺得我就算好努力學都去唔到佢嘅境界.