千載不變

離開大昌足足有成十年, 學阿豪話齋, 響 Honda 部嘅日子係咁多分工最開心嘅. 諗返以前真係好好玩, 無論開工收工亦都一樣. 收工之後多節目, 放工成班去街就少不免, 仲有燒嘢食同遊車河, 最多就係唱 K, 原因係成班人個個拖男帶女之餘大部份仲係唱得之人, 最經典嘅池生同阿光, 佢地攪笑嘅事實在太多.

見返大家實在太開心, 真係唔明點解離開成十年先至肯的起心肝攪呢次聚會. 沉晚見到大家冇乜點變, 係池生肥咗成個小巴佬咁, 雄爺啲鬚仲型過以前... 我地希望快啲再攪多次, 再請多啲人因為呢次仲有幾個冇嚟到.

散會返屋企同阿康一齊搭巴士, 突然諗返起我地最後一次 farewell 唱 K, 因為我地幾個離開令佢一時感觸流下男兒淚嘅情景... 哈! 佢仲感性過我. 我都會喊但只會為男女間嘅感情... 其實我算好可以成日見到阿駿阿豪同阿賢... 寫到呢度又諗起阿豪好似寫過張聖誕卡比我, 內容冇記錯大概話我地係話我地離開大昌仲有緣一齊工作. 佢其實唔去佢而家果間公司我地而家都一樣係同事... 不過好難講嘅我呢一行行頭咁窄, 話唔定阿豪同阿賢將來都會一齊工作, 將來嘅嘢邊個知??

返到屋企阿駿打比我傾咗一陣以前啲嘢, 大家都回味無窮. 以前成班一齊學師好似返學咁好開心, Honda 部啲人又好易相處, 連最難攪嘅學師殺手劉師傅都比我將冰山劈開收我做契仔, 相比而家返工都係冇以前咁無憂無慮, 可能人大咗面對嘅嘢唔同咗啦. 不過同佢地一齊心境同心情一如以往, 依然仲係咁開心咁真.

十零廿歲一齊由細玩到大嘅感情係最真摯!