強者

強哥係我地以前 Honda 部嘅首領, 當年好多關於佢嘅嘢我都仲好記得, 例如名句動靜仲有揸車時好嚴肅果個樣, 仲有仲有 troubleshooting 時都幾有見地... Honda 部嚟講我覺得佢同第二把膠椅陳志強手車都好棘, 尤其是陳志強全速後波一手軚 L 位入唧床, 又快又準!

上次聚會反應熱烈, 頭先再嚟一次, 順便幫強哥做 farewell. 今次人數比月頭果次更多, 如果唔係有幾個臨時放飛機就差唔多三十人. 大家都知通常大佬同仔都係對立局面, 我地同強以前都一樣... 冇嘅, 大個明白到大家位置同立場唔同, 况且都咁多年... 今次嘅人數同到場人物可以見到大家都咁諗. 做大佬其實佢都算係咁, 起碼有穫佢會頂住唔會推啲仔去死. 最記得以前有個叫十一哥嘅學師, 當時係騎呢人物一名, 雖然佢勁騎呢, 但強哥都好維護佢, 驚佢比公司炒咗好難搵嘢做, 從呢件事可以見到佢都係好人嚟. 今次班舊伙記咁有佢心咁多人嚟, 佢應該都好安慰掛... 佢頭先仲同我講話見到個個大個咗結哂婚撈得掂好開心咁話喎.

第二個要提就係之前提過嘅有學師殺手之稱嘅契爺劉師父, 佢響修理界嚟講真係買少見少嘅傳統老師父. 聽佢講佢老豆以前響新英華整勞斯萊斯, 仲要係幾有名氣果隻. 佢由細到大都響車房打滾. 佢讀書唔多, 但手藝了得, 受公司上上下下所認同. 不過佢為人古板, 脾氣有時唔太好, 不過我知因為咁佢好寂莫, 同佢傾吓計講吓笑, 其實佢都唔係咁難相處, 好似細路仔咁氹吓佢就得. 佢嘅真傳我學到可能只有一成, 但感情就前無古人後無來者, 起碼咁耐佢只係請過我一個學師去佢屋企食飯. 除咗整車了不起外, 佢又孝順亦係一個好爸爸, 記得以前佢阿媽病咗入醫院佢日日都不持勞苦咁放工去照顧佢. 佢個人又好慳, 真係慳得好緊要, 佢老婆係全職主婦, 佢個仔仲有一年就大學畢業, 以大昌嘅微薄收入真係了不起!!

最後一個要提嘅係另一個契爺巢皮, 佢一路都冇出席, 因為佢好多年前響放工嘅一次交通意外過咗身. 傷心嘅嘢唔講咁多... 只係咁多年嚟我間唔中都有夢見佢, 你地信唔信都好咁啱響月頭果次聚會之前兩日我又夢見佢, 我當佢有出席架啦. 雖然大家響呢兩次聚會都冇乜點提佢, 但我好相信大家都在心中...

臨走之前力哥叫所有人寫低電話同 email 方便日後攪 function 容易聯絡, 其實大家都好鍾意呢啲聚會, 仲話下次到大祥或者生哥度 BBQ. 雖然大家已經各散東西, 但我相信大家都覺得呢份感情係咁多份工最珍貴嘅.