極限

今個生日同中秋都係要開工, 不過都慣. 所以頭先先至食餐飯叫慶祝, 去咗新城市廣場 Mr. Steak Cafe 度鋸扒 (又鋸悶唔悶啲??). 我叫咗個差唔多三百蚊嘅厚切美國安格斯會所牛扒, 真係好味! 但其實想講嘅係我已經分唔到同平時食開百五蚊左右嘅分別. 即係我由細到大對牛扒嘅味覺已經到咗極限! 點都好要多謝 Catherine... 哈哈! 跟住去咗中央公園睇花燈同散步影吓相咁.

沉日有志讚我個 blog 寫得好, 仲比咗啲意見, 我聽佢講改咗舒服啲嘅淺色版面, 咁啱 blogger.com 又新加咗好多嘢, 於是一次過改哂. 阿烈問我啲時間夠唔夠用, 尤其是寫 blog... 其實我都好懶寫, 個手寫板又衰! 不過有時聽到朋友同網友嘅 feedback 就堅持落去. 好似阿烈睇完之前我講父親大人果啲就話我感性, 係呀我係好感性架... 但男人太感性唔係咁好, 會好鍾意憑感覺做嘢. 都好, 寫呢個 blog 可以令身邊嘅人了解我多啲, 有啲嘢未必會面對面講尤其是我比較大男人, 好多情感 (友情親情愛情) 都收響心裡面唔表露出嚟, 好老套嘛.

不過有啲嘢我盡量避免寫, 例如太私人嘅如愛情呀家事呀, 仲有關於我公司嘅嘢呀咁... 尤其是公司果啲嘢, 廢事令人誤會我 (其實不嬲都有) 同果個低劣質數嘅公司新聞組有關. 其實我極之痛恨關於呢個新聞組嘅一切, 因為佢比咗好多麻煩同唔開心我... 好彩都有好多朋友同事相信我, 我先至有返啲安慰... 相信我嘅同事朋友們, 我係絕對絕對唔會令你地失望嘅!

啱啱又發現 Google Video 同 YouTube 啲片係可以 embed 上嚟個 blog 度, 以後一懶就可以出 video, 我盡量都唔想超過一個星期唔 update 個 blog 架.