記得

我每一年都記得 Linda 嘅死忌, 因為我地一向都當佢係屋企嘅一分子, 佢不經不覺已經離開咗我地六年.

Linda 個名嘅由來係爸爸細個養咗一隻狗叫 Linda, 聽爸爸講佢係比骨哽死, 最後爸爸好傷心咁葬咗佢... 改名叫 Linda 係為咗記念呢隻狗.

佢嘅生活細節不能盡錄, 只可以講佢好聰明好有性, 所以我地全家都當佢人咁看待. 對於 Linda 我覺得有幾樣嘢係幾遺憾. 第一, 同佢一齊十幾年都冇乜點同佢影相, 響電腦都係得幾張. 第二就係我覺得佢嘅離開我地處理得唔係咁好... 話說佢係生乳癌, 當初佢個肚有個地方凸咗少少出嚟, 我地都不以為意, 過咗幾年佢十幾歲時就變成惡性仲越發越大, 醫生都話冇計... 到大到裂開我地決定帶佢去愛護動物協會等佢舒舒服服咁走. 當日係細佬送佢去, 佢都頂唔順就咁放底佢就走. 聽細佬講臨走佢好似知道發生咩咁想一齊走, 於是細佬關門就咁走咗. 響呢件事有幾樣嘢我覺得做得唔係咁好... 可能我地唔應該送佢走, 我諗佢都寧願同我地一齊捱到最後. 仲有就算真係帶佢去愛護動物協會, 雖然難受但都應該陪住佢.

好記得佢啱啱走咗我打比爸爸討論以上所講嘅嘢, 佢都講到少少哽咽... 爸爸響我心目中都係一個強人, 果次係我第一次亦都係唯一一次見佢咁. 唔知係唔係巧合, Linda 走咗爸爸再一次返澳門工作直到而家.

今時今日諗返 Linda 睇返佢啲相都仲傷心, 以前仲間唔中發夢見到佢喊到醒, 係呢兩年冇... 唔好笑我唔係癫, 我相信當寵物係屋企人嘅人會明白. 正常嚟講佢一定會早死過我地... 我地本來都諗住唔再養狗, 一來唔想煩, 二來唔想再傷心. 但天意我地響 Linda 最後一年響村口個市政局大型綠色垃圾筒見到出世冇耐嘅 dotcom 比人當垃圾棄置, 實咗唔忍心! 我記得當日落雨, 帶佢返屋企都係諗住避一避唔好咁淒涼, 點知好天用條繩綁佢響村口一日都冇人理, 唯有收留佢啦.

最後, 希望 Linda 在天之靈知道我地仲掛住佢都有啲安慰啦.