早兩日響荃豐中心見到有部好 classic 嘅二手菲林機 Nikon FM3A, 返到屋企起佢底之後比佢深深吸引住, 但可惜二手淨 body 都差唔多要 $4000, 對於只係想買部菲林機玩吓一年影幾次嘅我實在太貴. 其實最近都想平平地買部勁 classic 嘅二手菲林機, 想一部超強 digital (Pentax K10D) 同勁 classic 成強烈對比, 所以菲林機係想買舊啲. 跟住又發現原來 Pentax 嘅 classic 菲林機都有 K mount!! 正!! 即係用到我啱啱買果兩支定焦鏡啦. 做咗一輪 research 就鎖定既昂貴又經典嘅 Pentax LX 同差唔多功能嘅 Pentax K2. 首選當然係 K2, 一來同面世三十年後嘅今日 K10D 同一個系列, 二來二手唔使 $1000 就攪掂.
但當睇完 dchome Pentax 版版主響呢篇 "找可成為家傳之寶的相機" 裡面所講嘅物輕情義重之後感觸良多. 原因我一向都有一部 Pentax Spotmatic, 呢部老爺機係爸爸三十幾年未結婚前行船週遊列國用. 之後就到我中一攞咗嚟參加學校嘅攝影學會用咗一兩年, 果陣計落都成廿年前... 而家睇嚟唔用得, 鏡頭又發哂毛. 睇完 dchome 篇討論後即時打電話比爸爸問佢多啲呢部機嘅事. 同版主一樣, 呢部相機除咗同佢走遍天下之外, 仲見證我地幾兄妹嘅成長. 佢同我講擁有呢部機三十幾年來, 佢真正用呢部機都有成十幾年, 即係起碼到我十幾歲先冇用. 我仲問佢點解會買 Pentax, 佢話果陣時 Minolta 係最強, 然後就是 Pentax , Canon 和 Nikon 都只係啱啱冒起喎.
本來我趁 K10D 仲未推出想買部 classic K mount 菲林機玩玩同收藏, 但我而家打算過兩日帶部 Spotmatic 到尖沙咀香檳大厦相機維修中心, 希望將佢修理好繼續服役. 就算修理唔好都會繼續好好 keep 住, 至於 K2 或 LX 都會買不過有閒錢先, 又唔急.
我咁諗我嚟緊呢套新 Pentax 只係一萬幾千, 但呢部 Spotmatic 對我來講係無價, 所以一向都將佢收藏好冇將佢當垃圾咁掉. 只係呢件事令我的起心肝將佢重生, 希望攪得掂啦!
寫呢篇嘢時因為我冇 scanner, 所以諗住就咁影相簿啲相上嚟, 比我發現三十幾年前爸爸行船到日本所影嘅東京鐵塔, 同我今年三月去影果張差唔多.
5 則留言:
雖然已經不影菲林，我都買了幾部Pentax菲林機，得閒拿出來feel下他的重量、人體工學設計和製作工藝，聽下它們的快門和彈鏡的聲音，都咪話唔爽！
日本機操作的順手和合理，比之德國機優勝得多了。
我很欣賞您的Blog ，並且在我的Blog連結了您。
我有時都會在DC Home的Pentax Forum處發下言，筆名是「十二少」。
好多謝您欣賞我個 blog!! 我呢個 blog 其實真係一般, 冇乜特定主題... 所以一旦有朋友 feedback, 我都好開心, 有源動力繼續寫落去.
得閒多啲嚟睇吓喎. 係呢?? 您響澳洲住架??
係呀，在澳洲十幾年喇。
呢度pentax係極少數民族，根本無Pentax鏡賣，買機只是連Sigma鏡博售價可以平D，我要在Ebay買舊 K Mount鏡來用。
好warm呀你同你爸爸!!!想唔倒幾十年後個仔影的同自己影o既似曾相識好得意呀!!!好喜歡聽人們的往事!!!
係喎... 我下次見到佢問吓佢有冇諗過三十幾年後嘅今日佢個仔影返此情此景, 諗吓諗吓真係幾有趣.
發佈留言