再接再厲

之前話過用筒響 02 年頭買嘅過期 Kodak Gold 400 , 前日先攞出嚟影完再去相舖 scan 出嚟, 點知全部 under 不特止, 微粒勁粗仲有層白嘢好似用 software 夾硬推高 brightness 咁, 真係唔知菲林變咗質定測光打柴?? 因為我多數校大光圈再用光圈先決嚟影, 冇理由會勁 under. 擔心部機有時之餘再睇吓 user manual, 先發覺同一時間部機就嚟冇電, 希望係菲林或冇電影響測光先出問題啦...

今朝返通宵收工冇瞓過, 返屋企沖個涼就攞架生出發去尖沙咀天星碼頭同阿賢集合諗住正正經經用相機影一次中環天星碼頭順便再試部機, 行程係由尖沙咀一路搭船影到返中環. 呢次帶咗三支鏡: FA 28mm f/2.8 AL, FA 43mm f/1.9 Limited 同 Tamron A17. 菲林用 Fujifilm Superia 100, 想成像幼啲... 阿賢就用佢部手動機械機皇 Nikon FM2 出戰, 睇吓兩部手動機成像有乜分別先.

Pentax 鏡頭出名有啲乜?? 有三樣: 定焦, Super Multi Coating (smc) 同 pancake 鏡. 出門口前睇過 dchome 嘅 Pentax DA40 f/2.8 Limited samples 個 post 得知呢支比 APS-C size sensor 嘅 pancake 鏡原來落菲林機係冇成像圈嘅, 咁啱阿賢又買定咗支比 K10D, 即時問佢借嚟試吓. 呢支咁細又咁正嘅標準定焦鏡放落本身已經細部嘅 Super Program 度外觀真係好 compact, 搭 FA 43mm f/1.9 Limited 就最靚最 classic. 細機加細鏡成日帶佢出街 snap 都唔怕, 真係心動中... 之前響 ebay 同 Yahoo Japan 都睇過老爺手動版 Pentax M40 f/2.8, 諗住長搭響 Super Program 度, 而家唔會再諗.

仲有可能大家都知 DA 系列數碼鏡係冇光圈環, 因為光圈係響機身校. 咁冇光圈環落手動菲林機又會點呢?? 原來佢會行 auto, 即係可以用快門先決同 Program mode (全自動). 咁即係支 DA kit 鏡都得, 於是我試過落支 kit 鏡去 Super Program 度響 24mm 開始冇黑角, 不過我唔鐘意咁用. 因而家菲林機搭我啲 28mm 做 wide angle, 43mm 做標準再加支 70-300mm 做中距同 tele 乜都夠. 更何況主打 snap, 一支 43mm 或特登買支 DA 40mm 專比 Super Program 用都得, 横掂我冇 pancake 鏡, 一路都好想儲一支.

影完哪哪林返去接 Catherine 收工順便響佢公司附近果間相舖 scan 相. 呢間嘢超平, 一筒 $10 沖 $10 scan 共 $20 , 仲要半個鐘攪掂, 抵到爛!! 咁先至吸引到我繼續用菲林嘛! 每次等相同等成積表一樣咁緊張, 以前未用數碼係, 而家都係, 呢次更加係. 唔鐘意等係我鐘意影 digital 其中一個原因, 但等待嘅心情其實又幾過引, 都幾予盾架! 究竟呢次啲相影成點呢?? 部機又係唔係真係有事呢??

好彩冇事!! 呢次我估多數係過期菲林作怪. 仲有太多年冇用 manual focus, 真係要多多練習返先得, 因為有幾張 out focus 咗.

用 Pentax 比主流嘅 Canon 同 Nikon 可以話好少鏡玩, 又可以話好多, 因為淨計歷年嚟出嘅 K mount 鏡都唔少. 仲有數碼放震機身好似 K100D 同期待中嘅 K10D 搭 M42 螺絲 mount 鏡同 645 medium format 用嘅鏡都可照用 Shake Reduction, 真係幾堅.