畫質革命

從傳聞規格至正式發表再到推出兼延期足足等咗三個月, 中間仲經歷轉會放盤, 頭先同阿賢終於響紅磡廣場風度攞機. 機身 + 直度 + 額外原廠電 + screen protector 差唔多 $9500, 比 cash 都冇得平, 只係屈到老闆李 Sir 本影集同原廠 K 系相機背包, 唔係咁爽因為聽講有少部份人早兩日響永成訂有九折.

用後感唔敢點寫咁多住, 初步同之前 Konica Minolta Dynax 5D 相比對焦明顯爽快好多, 暗位 AF 都唔係人地講得咁差, 手感一流尤其是連直度. Menu 都幾 user friendly. 操控幾正尤其 customize 前後 dial 好方便. 成像唔錯, ISO 1600 就麻麻!! 早兩個月買落果張 Kingmax 4GB 150x SD (非 SDHC) 都用到. 有樣嘢怪就係影完即 preview 要等兩三秒先出.

Upload 咗頭先夜晚用 FA 43mm f/1.9 Limited snap 嘅相, 冇乜點叉電都可以喪影! 開咗個相簿起名同 K10D slogan 一樣叫 "畫質革命", 我會定期 update. 考慮過可能比較多人睇所以唔用我自己 server 個 web album 而選用 Picasa Web Albums, 因為佢可以配合 Picasa2 同 iPhoto 一齊用, 但唯一唔好就係唔可以好似自己 server 咁可以用 full size 同儲存量只有 250MB 限制.

買到心頭好開心還開心, 全套機比我預計足足貴咗 $600 左右, 實在買得唔夠過引! 當然一方面只怪自己心急未知價錢一早落訂, 另一方面唔知關代理定舖頭事, 外國淨機身建議零售價只係 US$899, 而香港然 mark 到 $7800 左右, 真係有啲過份!! 果幾百唔係比唔起, 但有得比較之下局住咁比唔係咁爽!!

而家唯有自我安慰部機全球缺貨都買到, 仲有果幾百蚊當買個原廠 K 系相機袋囉. 另一方面積極啲諗, 部機玩落真係正嘅話, 既然都買貴咗, 倒不如搏命用佢影多啲靚相補番數!

最後送上同阿賢部 K10D 一齊合照仲有我自己嘅笨凸全家福.