發夢

呢幾日冇乜特別嘢發生, 以致冇乜嘢好 update... 只係返工放工, 返我最唔鍾意嘅中更, 好彩最尾果幾日轉返早, 希望下個月都係早. 點解唔鍾意返中?? 除咗去唔到街之外, 返屋企交通好唔方便. 好彩有同事發現有的士 direct flight 返馬鞍山, 位位 $42 左右, 價錢 OK 但以返工車費嚟講真係幾溶!! 不過勝在夠快又唔使轉車... 點都好我堅持唔住東涌, 硬係唔鍾意個地點, 不過就算而家想搬去都唔得, 因為親愛嘅細佬今年十月成家立室. 講開東涌, 不經不覺都供咗差唔多十年, 今年供完攪掂一身鬆哂!

頭先身痕落旺角買 wireless router 皇 D-Link DGL-4300, 成 $1400 成個旺角都賣哂, 唔係咁好賣吓話!! 唔通經濟好咗啲人使錢疏爽咗好多?? 陣間瞓醒睇吓有冇心情落黃金買先...

早幾日分別發咗兩個夢... 第一個係我加咗 $1500 人工好開心. 第二個係買咗架舊款 Honda Accord. 不過以往嘅經驗話比我知夢係同現實相反, 所以瞓醒之後成個人灰哂... 加 $1500 人工除咗升職都冇第二個可能可以加咁多! 至於升職, 我響呢間公司又係冇可能, 所以唔使諗. 至於買車, 一路都希望再買, 但唔會再係跑車, 我想要舒舒服服又寬敞大體如 Honda Accord 或 Toyota Camry, 又或者 Honda Stream 同 Toyota Picnic 呢類七八人車全家載哂又得... 當然唔會咁快, 起碼未來兩年都唔會, 而家只係發吓夢先...

算把啦, 重温吓教主回歸開心吓, 我一路都想買部新 Mac, 不過要忍到 Mac OS X 10.5 出先!!