插水旗艦

之前好似有提過當初 Sony Ericsson 公佈 P990i 果陣超期待, 仲諗住一出即買, 點知由於佢嘅 bug 超多超唔穩, 繁體香港行貨久久未出, 所以放棄... 到咗二月頭出以超優惠價 $4380 震撼推出, 比之前香港簡體行貨 $5980 足足平 $1600, 我都心郁郁不過都係冇入, 只係入部 W950i 試玩吓 Symbian 算. 再到個幾星期前又再插水到 $3680, 就真係不得了!! 加上 Sony Ericsson 呢幾個月好積極咁出 firmware, 搞到我成日上 Yahoo 睇, 到沉日終於比我搵到部全新公司抽獎正行機, 我用 $2900 同賣家 fast trade deal 咗, 跟手響星際買埋張 Sandisk 4GB Memory Stick Pro Duo, 返屋企即時 update 埋啱啱出嘅 firmware R9F011. 插水得咁勁多數係佢出得太遲, 比更強 spec 嘅 PPC 電話打到佢咁, 再加上下一批行 Symbian UIQ 3.1 機如 P1i 就出. 唔緊要!! 得益永遠係我地 end user.

比較 W950i 同 P990i, P990i 多咗個 flip mode, 冚咗 flip 個 touch screen 就用唔到, 變成普通電話, 如果唔鍾意個 flip 可以用跟機套 kit 拆咗佢當 Blackberry 咁用, 事實上佢內置咗 Blackberry connection 程式. 我就勁鍾意個 flip, 打中文 SMS 一流!! 之前 W950i 個 keypad 唔好㩒成日㩒錯, 而家好好多!! 至於 interface, 兩部機雖然同一個 OS, 但由於有 flip, 唔多唔少有啲唔同. P990i 比較好係 shortcut 可以 set 九個, 比 W950i 多四個. 不過比 W950i 都有缺點就係 4GB 同樣咁多歌 P990i scan 歌落 database 係要耐好多, 好可能同 Memory Stick 速度有關...

放咗部 W950i 賣番個 Sony Mobile Phone HPM-82 線控, 用 W950i 後愛上咗佢, 始終比 bluetooth handfree 聽歌好聲同慳電.

用咗個零月 Symbian 初初唔慣但用落好鍾意, 以電話嚟講佢係好用過 WM 5.0, 聽歌嘅 interface 同操控亦好太多. 但 WM 5.0 用 iSilo 睇報紙同上網仲有 Excel 計油數又好好多, 睇片更加唔使講!! 我知呢個世界係冇完美嘅嘢, 所以同我用 PC + Mac 一樣, 兩個 system 一齊用!! 出街主打 P990i, 反正 Microsoft Outlook 啲 PIM 一樣 sync 哂落去, 返工先會帶埋 X01HT.