鼓勵

沉日響屋企冇嘢做悶悶地, 頂唔順又心思思出街打咗一筒 Konica Minolta Centuria 100 同第一次用嘅 Fujifilm Superia Reala 100 兼試吓支 G28. Fujifilm Superia Reala 100 負片嚟講較貴, 永成賣 $27 筒, 雖然貴但顏色比普通 Superia 自然同真實, 微粒超幼, 出嚟嘅相好滑. 漫無目的四處 snap 幾過癮, 當中尤其是中上環, 有啲地方住咁多年香港都未去過. 打咗兩筒出嚟嘅效果好滿意, 大致都掌握到部 Contax G1 嘅脾性, 所以炒咗嘅相呢次只得一張. 話時話大熱天時攞住部機身水身汗四圍去真係好辛苦, 但當見到出嚟啲相有藍天白雲咁正真係辛苦啲都值!!

同平時一樣響 dchome 以家在香港為題出 post 亦都有人讚賞, 加上 Annie 直到今日仲介紹啲相比其他同事睇真係對我影相幾大鼓勵!!

自從年頭有人用我手機影嘅相攪事之後對我有一定程度嘅打擊, 呢半年因為咁我唔知點解極少用手機 snap, 我估心理影響其一, 其次就係始終手機質數麻麻. 自從影菲林多返發覺自己明顯有進步, 雖然比自己影得好大有人在, 但近呢次開始連自己都覺得滿意, 睇完又睇, 正如阿駿所講工作方面冇滿足感, 響自己興趣方面搵到都唔錯!! 而且我希望用自己嘅劣作令人明白喜歡攝影同攞相片嚟開玩笑係兩回事, 熱愛攝影嘅人並唔會攞相片嚟開玩笑.

鼓勵就正如我沉日第二筒最後一格菲林呢幅相嘅曙光一樣, 比我感覺到人生係應該要有希望!!