呢張相係九六年離開大昌 farewell party 影, 我記得我地以前成日唱 K, 就連 farewell 都唔例外. 我一路都貼張相響 mon 頂, 買咗 scanner 成個幾星期先醒起原來可以 scan, 真白痴!! Scan 完之後要執執因為張相太舊又退色又甩色... 攪完張相之後竟然有個重大發現!! 原來上年久別重逢嘅 Honda 部聚餐咁啱同九六年嘅 farewell party 都係九月一號, 足足成十年!! 當年 farewell party 真係好唔捨得, 大家一齊學師大大話話都有四年, 學師果陣就好似返學咁, 一路做嘢一路玩, 放工又一齊去街, 放假又遊車河又 BBQ!! 而家冇啦... 阿駿同阿豪又結咗婚, 其他好似阿軒池生佢地又唔係做我地果行所以少聯絡... 得番我同阿賢兩個孤兒仔成日一齊去影相. 成日同阿賢一齊除咗有共同興趣外, 主要係佢比較感性同埋佢同我一樣乜都食, 壽司魚生呢啲係一個好好嘅例子... 仲有我最記得有一次失戀急 call 佢出嚟大喊一場, 真係好難忘!! 次次我感情到挫折我一定搵佢發洩... 哈哈!! 至於阿駿, 我同佢性格同觀點好唔同但係唔知點解可以咁老友, 佢係一個正直好孝順好關心別人嘅人, 乜都好有計劃, 不過佢有時真係太過老正, 可以話優點可以話缺點. 而我就比較任性乜都關人天落嚟先算果隻... 緣份嘅嘢真係奇妙, 正所謂人夾人緣. 我出嚟做嘢十幾年當中四份工有三份都係同佢做同事, 不過我地就嚟又要分開, 我 confirm 咗響呢間公司嘅 last day 係十八號, 下個月三號上新工, 足足有半個月休息, 如果可以再一齊去日本就好...今日終於有新冷氣機, 足足兩匹比以前勁兼有暖氣比冬天用, 勁正!!!
沒有留言:
發佈留言