狂熱

新呢份工返中轉返夜一定有成日嘅空檔, 同上次一樣返夜前走轉大尾督. 去到一定整返個 tea, 呢次就揀間泰國菜, 叫咗個海南雞飯 (泰式? ) 加凍奶茶. 然後當然又上提霸坐陣先回程, 我仲響馬料水附近撞見黃金寶.

而家比之前份工少咗時間玩反而更珍惜, 可以嘅話就出車. 點解突然對踩單車咁狂熱? 最主要兩三年前上大東二東行山冧偈, 令我注意到自己體能差咗. 第二, 講真任何球類運動我都冇興趣, 而且一個人係玩唔到, 所以難得搵到樣自己鍾意嘅運動會零舍投入. 再加上單車對我嚟又係玩具嘅一種, 咁樣會有興趣好多. 仲有如果可以習慣以單車為短途交通工具其實真係幾過癮! 例如幾個朋友一人一部去食飯, 食完飯踩去海邊吹吓水再各自踩返屋企, 真係幾爽! 不過響香港比較難, 交通太發達又車多, 適合踩單車嘅地方唔多, 我住新界已經好好尤其是沙田大埔區單車徑比較完善, 起碼好似我最近成日踩嘅烏溪沙至大尾督咁, 係就係冇難度, 而且成日踩會悶少少, 但勝在全程單車徑夠安全, 而且來回有成 46KM 左右, 綀體能真係夠哂皮.

唔講咁多, 又要出門口返工..