細佬竟然響我生日之前果日搞結婚, 做大佬冇乜好幫手, 只係負責幫佢影吓花絮, 架生只係 Pentax K10D 加一支同事借嘅 Pentax AF540FGZ 閃燈同細佬特登買嚟借我幫佢影結婚用嘅 Sigma 18-50mm F2.8 EX DC MACRO. 由於之前冇影呢類題材嘅經驗, 所以影得麻麻, 當然都預咗. 影呢類相最大難處係同正莊攝影師爭位, 當然佢話哂正莊, 影咩都係佢優先好啲, 費事佢交唔到差.
至於全日除咗響伊甸園註冊環境麻麻 (商場裡面) 外, 其他都幾好. 好似佢地斟茶比媽媽, 媽媽竟然開心到流眼淚! 輪到斟比我時, 竟然之前冇人同我講要封利是比佢地, 搞到臨時臨急要媽媽借住啲利是嚟用, 成個過程仲拍埋片, 真係囉爆! 到夜晚婚宴都真係攪得幾好, 主要係酒店服務同食物水準都有番咁上下, 同成個流程都算順利. 仲有意外驚喜重頭戲自彈自唱, 一如所料發揮催淚作用. 老實講呢個環節又真係幾感動尤其是佢連練習嘅情況都拍埋片, 可以睇到佢下苦功嘅過程.
成晚好多人都問幾時到我, 都係果句耍佢地: "我係一個浪子..." 哈哈!
其實呢次 Catherine 成家都有去, 真係怕未來外父用呢次作準就弊! 同我熟都應該知我好怕煩, 未必有咁多心思攪咁多花神...
3 則留言:
咁你好好地plan下，整份proposal比外父啦~
結婚都唔通知聲呀 William?
我係 Jan.
係我細佬結婚唔係我, 你有冇 MSN 呀??
發佈留言