重遊

自從賣咗架車之後都冇去過西沙公路至西貢市中心一帶, 冇去大大話話都有三年幾, 上次最後一次去冇諗過今次再去竟然係用呢個既原始又環保嘅方法.

同行只有電鋸一個, 地點都係佢定, 行馬路開正佢果瓣掛... 事實係最主要我同佢講我想試吓其他地方啫. 第一站係西貢市中心食嘢先, 然後就到西貢碼頭影陣相就經北潭涌到黃石碼頭. 事後睇返咪表原來距離同來回大尾督差唔多, 分別在全程有幾條長命斜同全程行馬路比較危險, 水皮我長命斜當然頂唔順要推車先掂... 果度其實好多 road bike 練上斜路... 辛苦上完落斜果下真係好很 free, 差唔多 60km/h 左右追住的士同巴士, 衝緊果陣入到九波都空腳. 幾段斜路都好鬼長, 飛住落都驚驚地, 架車有時有少少了, 最驚係落同 brake overheat, 所以打醒十二分精神同收下收下咁落, 我冇頭盔唔敢去咁盡, 如果唔係可以再快少少.

西沙公路同北潭涌呢段路以前車過唔少, 最鍾意西貢食完晚飯或同前女友返將軍澳屋企食完飯回程遊車河必經之路, 原來鐵包人同人包鐵行呢段路感覺係咁唔同!! 可能車果陣心情輕鬆, 踩單車可能成日驚比車閘同需要大量體力, 所以咁大分別, 又或者...