視覺系改裝

前晚返完通宵朝早收工見下晝冇乜嘢攪決定出席香港討論區單車版嘅
Dahon 第一次車聚, 由於一放工約咗位網友交收 Dahon Speed Pro 跟車張 SDG Bel-Air SL 坐墊連支 SDG I-Beam Pro 2014 鋁座通先返屋企涼洗衫, 跟住去阿偉度換埋支 Oval Concepts M800 碳纖 handle bar, 所以好晏先趕去大尾督 join 佢地, 點知太晏去到堤壩大家都準備走, 版主奇哥話橫掂都到咗不如加埋我影埋相先走... 由於我架車換咗幼呔後企得唔係好穩, 一冧就攪到他車好似骨牌咁冧哂, 場面相當攪笑. 聚會當中我試過奇哥部車嘅 schlumpf innovations Speed Drive, 一試中毒, 由於呢件嘢同我部車嘅價錢差唔多, 所以要說服自己, 不過有咗佢嘅話四圍轆都唔係問題. 聚會尾聲我同大家孖橋分手後返屋企放低啲野又出車同 Andy, Kitty 同 Catherine 落禾輋陳根記食飯, 本來食完同 Andy 踩去大埔同 Catherine 食糖水, 點知踩到科學園 Catherine 話太夜所以回程返馬鞍山新港城附近公園吹水至 1am 先返屋企... 返到去仲要做家務沫完單車到 4am 先瞓, 攰到死!! 好彩今日 dayoff...

講返果支 SDG I-Beam 坐通同 SDG 坐墊, 好鬼輕!! 不過佢係冇位裝 Topeak 尾袋個碼, 變咗用唔返, 有啲可惜... 坐通點解唔用埋碳纖?? 係因為睇唔啱... 至於支碳纖 handle bar, 又係超輕, 我仲 cut 得比之前更短, 而家個長度簡直 perfect! 講咁多偷輕並唔係主要目的, 我目的係要 "型"!!!! Dahon 聚會除咗毒物 Speed Drive 外, 仲有件平靚正嘅嘢, 呢樣嘢就係我搵咗好耐嘅 "專用" 水壺, 真多謝版友報料今日即刻飛車落火炭入手!!!

呢兩日買得最開心反而係最平而同架車襯到絕嘅 Continental 馬牌水壺!! 無得頂!!

有時會諗當初應該直上 Dahon Speed Pro, 唔使煩... 咁改下改下都買到部 Speed Pro... 當然冇得好講, 幾個月前覺得 $3000 買架單車都好過份.