上坡道改裝

自從上次去完黃石碼頭後, 我好想改善架車嘅爬坡性能, 由於架車先天性只預你玩單餅, 要裝波撥碼先可以裝雙餅兼要加波手走威也, 所以 Speed Drive 係最簡單嘅方案. 呢次響火炭攪, 果度嘅偉哥好快幫我裝好. 由於要爬坡同速度攞個 balance, 佢推介 34T 比我, 回程試咗一陣發覺上斜真係舒服咗好多, 同埋 Speed Drive 運作後已經比前重腳少少, 係咁咦已經 40km/h, 明顯比以前好去, 仲有操作比想像中容易, 好快就適應到. Speed Drive 雖然同我架芒果車差唔多價錢, 但用料一啲都唔差, 剩係塊 34T 已經係 Stronglight, 上咗 Speed Drive 仲可以換走埋原廠 cheap 雞 BB 芯.

玩到咁已經步入非理性改裝, 括左出去之後價錢都唔太計較... 我諗架車我都改到八八九九, 遲啲 Andy 話 upgrade 佢架 MTB 套 brake, 換出嚟果套 Avid 鎂合金 V-brake 話送比我, 咁裝埋佢應該冇乜好攪, 極其量換埋軨同 hub.

下次再買都係想買第二種單車, 例如軟架 MTB, 頭先換緊 Speed Drive 時都睇過 Giant Anthem S.