改裝最終回???

以為 Speed Drive 係送比自己嘅聖誕禮物, 點知今日平安夜仲有...

呢幾日個尾轆 "胡胡" 聲響, 去火炭睇過原來個 hub 打柴!! 啱哂!! 早兩日有香港討論區版友報料話大埔捷成有 Dahon 專用 28 孔 Novatec 啤呤尾 hub 賣, 於是特登走去睇吓. 首次到訪, 老闆同老闆娘都好好傾兼不停落毒, 結果因毒性太強抵受唔住等唔切 Andy 套 V-brake 索性換埋套 Shimano 制動系統, 即係 08' Deore XT V-brake 同 06' XTR 手制, 手感同外型一流!! 至於 Novatec 尾啤呤 hub 可能唔係啲咩極品, 但相比原廠雞 hub 簡直係天與地!! 如果本身踩開原廠尾波子 hub 已經一段日子, 一換就會感覺到明顯順好多好多, 重量亦明顯輕好多. 此外, 如香港討論區版友所講會嘈咗, 會有單車招牌嘅 "的的" 聲, 鍾唔鍾意就見仁見智, 我就幾鍾意.

一輪芒果車非理性改裝總算告一段落, 改裝費用已經可以買多兩架芒果車... 對我嚟講架車已係無得頂, 除非連軨都換埋, 如果唔係都冇乜可以再攪, 所以唔會再揼錢落去!!

下個目標係想入架軟架 MTB 玩吓...