第一次

今日好多第一次, 第一次踩入元朗, 第一次踩林錦公路, 第一次五十幾 km/h 炒車, 第一次坐白車, 第一次入醫院...

話說林錦公路入元朗有條長命斜, 落斜前其實都有心理準備, 先前講過長命斜都響黃石有過經驗, 所以唔太擔心. 咁就落啦, 當然以人包鐵來講算快, 加上架車又 dan, 前後 brake 收吓放吓, 都唔敢好似黃石果次咁快 (上次只係 60km/h), 後來沉晚攞返架車睇返先知原來唔係差好多. 一路落都冇事, 但好奇怪當時比黃石果次驚... 咁收吓放吓突然聽到前面 "chi" 一聲, 心知不妙... 眼見條斜路都未到底, 夾硬再乸前 brake 都冇用, 果一刻反而驚唔出, 我冇諗過會死, 只係諗今次實重傷... 一失控就跌, 都唔知有冇打筋斗, 記憶所及同傷勢應該係冇, 只係扒住落, 差唔多停就覺得左邊面撞落地磨咗一兩秒, 仲有喉嚨湧咗啖唔知咩出嚟落地面. 第一樣就諗自己竟然會毁容!! 第二, 唔係嘔血吓話?? 果陣仲扒緊即時睇吓嘔咗乜, 見到黃色心都定啲. 跟住梗係起身, 都唔記得尾隨嘅同行車友有冇扶, 即刻郁下四肢響唔響度郁唔郁到, 好彩都 OK. 愛車如命嘅我反而都冇理架車點, 坐埋一邊腦裡不斷重播出事情景... 車友即時打 999, 我就打比帶頭嘅車友 Oscar... 救護員電單車好快就到, 跟住救傷車, 其間我一位舊同事阿衡突然出現, 原來佢咁啱揸車經過, 佢幫我同車友 keep 住架車, 我地就上白車...

可能對於老手來講, 佢地唔會發生呢 d 事, 自問響單車方面都未到人車合一嘅竟界, 可能咁先出事啦. 點都好呢次真係好好彩只係皮外傷, 下次未必咁好彩...