集體回憶

自細喜歡打機, 雖唔算機癡, 不過癲峰時都好沉迷. 好耐之前曾經諗過畢生最喜愛嘅 game 係邊隻?? 唔... 當時就覺得係街霸 2 同 Rainbow Six.

街霸 1 已經係粉絲, 放學反轉件校服就到沙田廣場地下嘅機舖操, 波動拳昇龍拳學識就到剛有機舖嘅澳門大顯身手, 當時澳門冇人識昇, 睇到佢地呆哂. 記得果陣又未夠秤但好鍾意打, 同同學到長洲 camp, 夜晚個個入機舖打, 但果陣生得細粒, 一入去就比人睇出被拒諸門外, 搞到我自己一個響門口望住所有同學仔響入面玩...

直到有一日響而家旺角兆萬對面機舖見門口企滿人, 一睇先知原來出咗街霸 2!! 果種興奮同感動到而家都仲記得!! 果陣真係幾沉迷, 讀 T.I. 時點完名就去娛樂城沙龍度打, 打到食 lunch, 跟住又返去點名, 點完名又再去... 尤其是學軍佬無影撻, 響黃金做暑期工一放工就響附近機舖打到柵門, 苦練得嚟成功率達九成. 得知超任出街霸 2, 直頭問老闆借糧買機同帶. 為咗好 feel, 搵細佬同學文仔買鴨記買喇叭箱同威利電子遊戲機買棍同制 DIY 街機手制!! 老實講就算而家 Hori 頂級手制用果啲三和日本街機部件都冇咁正. 除咗打機方面, 我連 soundtrack 都唔放過!! 其實咁多年都有好多珍貴 game 嘅 soundtrack 而家收藏哂響 iTunes 裡面.

街霸 2 系列之後嘅街霸已經冇乜點玩過, 原因係角色同系統都變得幾多... 直至呢一隻第四集, 雖然都改咗好多嘢, 不過感覺返哂嚟... 成三張幾嘢, 相信好多人一樣以前一齊打機嘅同事同朋友, 大多已成家立室, 各有各忙, 已經少咗好多聯絡... 就係街霸 4 家用版一出, 個個可以上網抽過, 大家又難得一齊有共同話題, 呢啲真係百份百集體回憶... 我相信好多三張左右嘅男人都係同波動昇龍一齊成長... 身邊玩開嘅人大多數都買咗 game, 大家再回憶返以前都津津樂道!! 時代唔同, 以前要對戰要到大家屋企打, 好多時都打通宵, 而家科技一日千里, online 就得. Online 雖然方便, 回味返幾條友屈埋屋企打通頂又過癮好多, 比用 mic 更開心.

咁鍾意隻 game 梗係要入手掣, joypad 真係唔得... 不過手掣選擇太少, 靚嘢只有 HORI Real Arcade Pro.EX 同 MadCatz Street Fighter IV FightStick Tournament Edition.