吸車

正所謂出得嚟行, 預咗要還. 成日係咁踩都預咗有炒車嘅一日, 終於發生鳥...

沉日約咗電鋸響元州仔等, 過咗科學園有一家人一行十數人響單車徑度行, 我經過一對小姊弟身邊時, 姐姐同細佬玩時突然推細佬去左邊, 亦即係我前面, 有冇咁啱呀?? 我直頭好似比隻馬拋出咁撻落地, 好彩左手先落地同有帶手套. 記得中學有一次租單車又係咁, 果次係比單車欄住, 但冇咁好彩後腦落地先, 撻到暈暈地, 最後要同學仔咩走. 呢次個人就損咗少少, 架車好彩亦都只有 handle bar 果堆配件中招, 左邊牛角同茶叮叮花哂, 速度錶面殼同頭燈少花... 茶叮叮索性去電鋸大埔相熟果間單車舖買過隻比以前叮得更清脆嘅, 其他就返屋企修補, 好彩有豐富修補經驗, 而家總算整得好好睇睇. 好彩部車摺得, 回程果陣冇哂 mood, 所似踩到大埔工業村摺埋佢上 26 號專線小巴返馬鞍山算. 星期六日同公眾假期出車真係高危, 學電鋸話齋分分鐘踩馬路仲安全, 租車黨同行人當道, 失魂魚四圍都係, 失驚無神 cut 線停車乜都有, 真係多得佢地唔少...

不過都要感謝神, 原來我有好多年冇試過損手爛腳嘅感覺, 撻完之後望返自己嘅傷口, 先至發覺原來我真係忘記咗細個同同學仔玩到成日扒街嘅日子, 之後手手腳腳搽滿藍藥水...

跟住出朗豪坊食上次去東京至愛嘅 Pepper Lunch, 有少少失望係日本好食啲, 仲有啲嘢出得好慢, 但點都好自從愛上佢之後, 香港分店一直係我嘅願望, 而家終於達成, 實在太好!!