功不可沒

除夕夜夜晚八點零踩單車原來同凌晨踩一樣小貓三兩隻...

中午攞咗芒果十八號去沙田單車亭阿偉度 tune brake, 順便 set 返條 cable 左煞前右煞後因為上次換 Shimano 時嘗試掉轉過唔慣. 放低咗就去咗第二度到夜晚 745pm 先攞返架車. 跟住踩去大埔圍頭村 Catherine 阿嫲度 BBQ, 唔太遠沙田去只有 16KM 左右, 需時一個鐘, 如果吐露港唔係朔風可以仲快少少. 路程唔難, 當中去到大埔林村河單車徑直達太和火車站然後大埔公路大窩段踩馬路就到. 玩完食完圖中所見嘅自製豬扒包同倒數完後返烏溪沙屋企路程多少少 16.8KM, 需時反而只需 50 分鐘. 雖然唔係咩難踩路段, 但深深體會單車作交通工具嘅好處. 成晚最功不可沒就係成套 brake 系統同埋 Speed Drive 仲有 Ergon R2M 手柄!! 佢地比到我既安全又比較舒適咁走完全程.

架芒果十八號雖然唔係啲咩超級靚車, 但改裝到咁嘅程度對我嚟講無論性能同外觀真係一流!! 當然缺點佢都有就係芒果呔太幼比較易爆, 尤其是夜晚踩時真係要一眼關七. 第二個缺點係冇避震, 以致舒適度大打折扣... 所以遠征途經新界鄉村小路真係要買架軟架 MTB, 呢個亦都係我下一個目標!!

最後要多謝單車亭阿偉個同事幫我 set 到個 brake 又應, 落去又好好手感, 冇得頂!!