東京 Day 1

UA 機我就做得多, 搭就真係第一次, 我地約咗阿賢響成田機場京城線 Skyliner 售票處等, 事關佢搭國泰. 我地到咗都未見佢, 原來佢咁啱去咗廁所, 好彩最後都順利滙合.

我地搭京城線到上野, 今次住嘅係有 HAECO 飯堂之稱嘅日光館, 果度係就係舊同細啲, 不過勝在夠平, 每人 3000 yen 一晚有獨立廁所. 我個人就覺得 ok, 但阿駿同 Catherine 就唔係好慣, 有啲不滿咁, 我諗佢地諗都冇諗過我大大話話 fax 比日光館十次八次 confirm 千叮萬囑一定要有獨立廁所嘅房, 都係想佢地住得舒服啲啫. 我地 check-in 完就落中野 Mandarake 睇玩具, 我就同阿賢睇鏡頭. 由於口味關係, 我地分道揚鑣去食嘢, 阿賢我同 Catherine 去食日本串燒, 唔知點叫之下發覺原來除咗老闆外所有店員都係中國留學生, 其中一個幫我地度一個每人筆直 3000 yen 左右嘅菜單, 啲嘢食認真正尤其是圖中嘅生牛肝, 係阿賢先會敢同我食呢啲嘢. 有時真係服咗啲日本人, 食生嘢簡直係佢地其中一種藝術, 生魚生牛肉我就食得多, 生牛肝我都係第一次食... 去旅行真係想試多啲香港冇嘅嘢, 隊員之中只有阿賢肯同我咁食, Catherine 都肯陪我食, 不過我唔忍心同佢去只有我食佢又冇乜嘢啱食, 我地食迴轉壽司就係咁, 因為佢唔食生嘢, 可以食嘅真係好少, 佢都陪咗我好幾次, 真係唔話得! 呢次中野阿高同阿駿收穫非常豐富, 佢地用超平嘅價錢入咗香港絕咗版嘅鐵人兄弟, 至於邊款我唔記得.

返旅館後我地梳洗完例必去阿高佢地間房傾吓計, 仲會去便利店買啲嘢一齊宵夜, 諗返起都好開心.

今次旅行嘅相我已經 upload 咗去我嘅網上相簿, 有 login 嘅朋友可以入去睇吓, 記住如果放大睇最好揀細嘅 resolution, 如果唔係會好慢.