東京 Day 3

呢次係我第一次寫遊記, 對我嚟講都幾辛苦, 因為我懶而且手寫輸入法慢, 認字有時又唔準, 我堅持寫因為我好耐冇同過一班朋友旅行, 下次都唔知幾時, 所以值得嘅...

三月十二日星期日最好就係去代代木人公園同原宿, 想睇吓街頭表演跳蚤市場, 下午就去宮崎駿三鷹美術館. 代代木公園啱哂我同阿賢呢啲鐘意影相嘅人, 唔多講... 街頭表演同跳蚤市場硬係唔多覺, 只有見到少量 lorita 服裝嘅日本妹. 行完公園梗係去行吓竹下通, 由於趕住落三鷹, 竹下通只行咗半條就走. 其實果一帶咁多年都冇乜點變, 只係有啲舖頭唔同, 人都係一樣咁多. 我地打算尾二果日自由活動日再嚟過... 果度最攞命係第一次見到日本人妖!! 佢外型同樣貌好似我一個叫凱老闆嘅同事, 簡單啲講即係一個四十幾歲身材略肥嘅男人. 佢身穿水手裝長白襪, 仲要係短裙果隻, 帶埋個東菇假髮, 手執靚妺手袋, 驚嚇程度滿分! 就係因為太驚嚇所以竟然唔記得影低, 認真可惜!

離開原宿我地搭 JR 山手線到新宿再轉中央線, 目的地就係三鷹站嘅宮崎駿美術館. 到達三鷹站要搵間好似 agent 嘅地方買飛, 因個館係冇飛賣嘅. 我地選擇咗行路去, 路程約十五分鐘. 館內多數都係啲關於動畫播放嘅展品同賣紀念品嘅地方, 館內唯一可以影相嘅就係天空之城嘅飛行石同巨型機械人, 就係呢兩樣都影咗唔少相. 我地臨走時撞到三個架妹要我地幫佢地影相, 其中兩個係姊妹, 我地認為係成個旅程之最, 阿妹啲英文仲 talk 得吓, 仲叫我地估佢地邊個係家姐, 我一估就估到啦! 我 post 張相你地估吓啦! 話時話, 真人靚好多架! 三鷹附近就係吉祥寺, 果度有條以前好多嘢賣嘅商店街, 而家冇乜料到, 好彩有間 PARCO 有好多女仔嘢行, 我都唔執輸終於買到我響日本第一樣嘢, 就係 Porter 散紙包同鎖匙包各一個, 我仲睇中咗一個為番港紙 $2500 嘅背囊. 比着以前初初出嚟做嘢我好捨得使錢落呢啲所謂名牌嘢度, 不過個人越大咗啲價值觀唔同哂, 好似以前玩 game 咁, 九成以上玩老番, 而家返而掉轉. 旅程仲有好幾日等我慢慢考慮吓先!

跟住講吓呢個旅程嘅兩件經典嘅第一件先! 話說我地當晚一如以往咁去便利店買宵夜去阿賢同阿高間房傾計, 傾傾吓住隔離房個日本女人傾電話越傾越大聲, 越傾越激動, 跟住仲喊哂果隻! 我地初初都唔理佢, 但佢嘅喊聲越來越淒厲同恐怖, 我地咪講笑話佢分分鍾一陣自殺呀四谷怪談呀咁, 點知越講越驚, 跟住全部執嘢轍離現場, 最搞笑係佢地兩個果晚唔敢響果間房瞓, 兩個分別去咗我同阿駿兩間房瞓. 最好笑頭先問 Catherine 成個旅程最好玩係邊度, 個傻妹竟然話係四谷怪談走難呢一晚!

唔記得講返香港果日出行版 XBOX 360, 隻 Ghost Recon Advanced Warfighter 要第二日先有時間買到, 玩完之後無論單打同上 live 果然勁到喊! 不過單打始終都係 Call Of Duty 2 正好多, 但 COD 2 呢隻 all code game 行版機竟然玩唔到, 仲有同行版一樣行 NTSC-J 嘅日版三國無雙 4 Special 都係. 聽日約咗個 Gamehit 版友買佢隻行版 FIFA 06, 講價講到 $180! 日版機玩到全部日版 GAME (當然) 仲有行版 game 認真正!!