阿賢 last day 都主要係影相, 選址係左近嘅上野公園. 果度係欣賞櫻花嘅熱點, 不過三月中櫻花係未開, 好好彩有幾棵都開咗, 我地梗係唔執輸狂影一輪. 有樣嘢好可惜嘅就係公園裡嘅動物園咁啱休息, 冇熊貓睇... 食完午飯我地送別阿賢後, 我地去咗附近御徒町行街, 我就想響果度買吓衫買吓波鞋, 果度啲衫雖然響街鋪賣, 但都幾貴. 後來一致決定去秋葉原, 佢地當然係搵玩具, 我就一早準備咗個中古 game list, 於是又分頭行事. 我呢次雖然搵唔哂, 但收穫都算豐富. 集合番之後佢地兩個玩具王竟然話唔夠喉, 我又何嘗唔係? 其實有好多地方我都係快立, 唔敢行咁耐, 我怕 Catherine 悶得太耐. 佢地竟然叫啲女隊員搵個地方坐番粒零鐘等我地呢班大男人... 我當然明白難得嚟到梗係盡油, 但同時亦都要理吓其他人, 因為我陪 Catherine 睇佢啲嘢都會好悶. 加上呢幾日其實啲女隊員都冇乜行過佢地啲嘢... 仲有雖然之前諗住東京七日會好悶, 原來仲有好多地方未去, 所以唔想浪費咁多時間等, 於是我提出話我先帶啲女仕到池袋行吓先, 佢地睇完到池袋 Tokyu Hands 搵我地, 結果當然如計劃進行...
沒有留言:
發佈留言