東京 Day 5

對於好似 Catherine 呢啲未去過日本嘅人嚟講, 東京鐵塔係必到嘅景點. 果一朝天氣非常好, 好藍同好清, 影相真係一流! 我地果日響呢個旅情第一次搭地鐵, 買咗 1-day pass, 打算下午經新橋站去台場, 夜晚再去新宿.

東京鐵塔入面重新翻新過, 同我四年前去完全唔同哂, 再冇殘舊嘅感覺, 賣手信嘅鋪頭依然響度, 仲多咗幾間食店同 food court. 我地只係上咗下面嘅瞭望台, 最高果個就冇上, 因為冇乜特別. 呢啲觀光性質嘅景點真係純粹到此一遊, 悶悶地就梗. 我地響 food court 食完嘢就去台場 Decks 行吓, 當然唔少得影吓著名嘅彩虹橋, 阿駿同阿高話想睇吓果度果間玩具反斗城, 咁我就帶兩位女仕到對面 Venus Fort. Venus Fort 係一個賣女裝為主嘅商場, 特別之處係裡面佈置成羅馬式建築, 天花有投射成天空咁, 如果第一次去都會覺得好靚. 後來我地返 Decks, 就順便影彩虹橋夜景. 原本都諗住響 Venus Fort 果邊搭新果隻唔知乜鬼特急落新宿嘅地鐵走唔影彩虹橋夜景, 最後大家決定唔浪費張 1-day pass. 一返到去 Decks 阿高興奮非常咁狂影. 哈... 唔怪得佢之前提過好幾次去台場可以到彩虹橋夜景啦!!! 原來佢係好想去不過不斷係咁話唔影都冇所謂, 所以我地先諗住響 Venus Fort 果邊走... 佢條友仔都幾就得人喎... 其實一大班人去玩雖然熱鬧, 不過最煩就意見多. 雖然係咁, 有咩地方好想去同好想做都可以提議吓商量吓, 唔使唔好意思.

離開台場返新宿, 我地又分頭食嘢, 我同 Catherine 去咗 JR 新宿站東口近 ABC Mart 嘅回転寿司 しおん, 東京我至愛呢間 cheap 嘢, 到咗東京幾日終於有得食! Catherine 就好唔慣師傅吓吓用手乸. 我地響 Jumbo 集合後就到歌舞技町對面兩間夾公仔檔玩, 其中 Taito 果間啲店員幾好, 就係因為佢地, 我先夾到隻大米奇. 佢地就夾果隻日本啱啱上畫講狐狸果套戲嘅狐狸, 阿高仲搵到夾呢隻狐狸個百發百中嘅秘技. 其實我不嬲都冇興趣夾, 呢次試過覺得都幾得意. 我發覺真係好搵笨. 啲店員一定會將啲公仔放響啲窿附近整到就跌落去咁引你玩, 但其實佢地會用其他公仔好有技巧咁夾實佢, 佢地最鐘意用米奇個鼻!! 咩款公仔都好, 梗會用兩隻米奇鼻夾到實一實. 所以玩呢樣嘢真係無底深潭, 有啲似賭錢, 會唔忿氣咁追. 好似果啲公仔咁, 大多數都係好難先夾到, 因為佢地擺好位之後會自己試夾. 搵笨引你追, 我唔鐘意賭錢就係咁解.

啱啱入咗我第七隻 XBOX 360 game Konami 出嘅 Rumble Roses Double X. 隻 game 係 "18 才以上對象" 嘅女子摔角, 暴露程度比 Dead Or Alive 4 更激! 人物噴血指數將 DOA 4 比下去, 啲制服好攞命. 我最鐘意 Miss Spencer, 好 G-Taste feel, 攞命指數爆燈!! 畫面可能不及 DOA 4, 但都不遠, 其實人物似乎 detail 過 DOA 4. 背景同互動性當然 DOA win 哂. 佢比 DOA 4 易玩好多!! 仲有四人大亂鬥夠過引, BGM 同人物出場好正. 如果人氣指數過 80, 有果個角色嘅 Superstar 款揀, 出場勁好多, 衫同必殺技又唔同. 真係唔錯不過貴咗啲...