東京 Day 6

早幾日買咗隻被外國網站稱為近年最強 ARPG ---- The Elder Scrolls IV : Oblivion, 各大鬼佬網站一致評超過九分嘅 game, 的確少有!! 除非你部 PC 係最 high end, 如果唔係呢隻玩 XBOX 360 絕對比 PC 版靚同 frame rate 最 stable. 好耐都冇咁沉迷一隻單機 ARPG, 簡直玩到工都唔想返, 隻 Ghost Recon 同 Rumble Roses 放埋咗一邊, 等我講返尾二果日嘅行程先再講隻 game. 仲有頭終於先入手 Monster XBOX 360 VGA cable, 盛惠 $498... 貴而家用緊果條原裝成倍有多!! 我駁咗未試, 希望唔好令我失望...

我地果日二人世界, 完全係 shopping day. 第一站係涉谷, 百貨公司林立嘅地方, 0101 當然係必到啦, 但原來 Catherine 唔係咁鐘意行, 佢鐘意行街舖多啲, 代官山啲嘢又話貴唔去, 咁原宿似乎好啲. Catherine 雖然頓啲, 但竟然比佢搵到我地響吉祥寺果晚食完之後想再去嘅 Pepper Lunch (http://www.pepper-fs.co.jp). 我地去過新宿幾次都搵唔到西口嘅分店, 冇理由返吉祥寺食架! 響涉谷搵到非常開心, Catherine 呢次真係立咗大功!! 呢間嘢其實都係果啲自己買飛嘅快餐店, 佢主要係賣鐵版牛. 價錢大慨六百幾至千七 yen 左右, 對於好似我呢啲牛肉主義者, 賣相簡直係非常吸引. 阿高出法之前都話想去試, 可惜佢冇機會... 呵呵!! 上次叫咗個千三 yen, 呢次叫咗個千七 yen, 食得非常痛快, 就算呢一刻我諗返起都想即刻飛過去食!! 旅程中有啲咁嘅地方帶嚟啲咁嘅感覺, 足以證明呢個旅程好值得回味同紀念, 咁呢樣當然只係其中一樣啦!! Pepper Lunch 我地打算去完原宿先再返去涉谷食, 反正果日我地都買咗 1-day pass. 落到原宿梗係完成之前未行完嘅竹下通, 然後就幫 Catherine 搵一隻幾鐘意嘅牌子專門店, 地址只係得佢上次佢香港買果件衫嘅紙招牌裡面記載. 呢個任務對於我嚟講唔太難, 都係問路攪掂. 呢次到東京發覺日本人普遍嚟講啲英文進步咗, 咁當然仲有啲唔掂好似我去過兩間派出所分別問過兩個四十幾嘅警察, 佢地都係唔掂. 好彩派出所有大地圖, 佢地指比我地睇就攪掂. 我地係由涉谷行過去, 途經代代木公園, 竟然發現街頭表演同跳蚤市場嘅所在地!!! 呢個地方係我去過幾次果頭都未去過, 好可惜果日唔係星期日, 乜都冇得睇... 我地最後搵到目的地附近, 咁啱見到有速遞員, 咁就掂哂!! 原來佢都係去果度. 果個地方都係原宿左近叫神宮前嘅街, 棟嘢得幾層高叫 Villa Rosa, 殘殘地咁, 上到去原來係批發嚟, 問佢地有冇 shop 佢比咗張卡片我地, 佢話近原宿 JR 站喎... 咁我地好好彩咁好容易就搵到果度, 果個商場係半層半層咁上, 名就唔係好記得, 果度幾啱女仔行, 其實型式都好似金百利果啲差唔多, 不過 Catherine 所買嘅牌子竟然比香港貴成倍, 所以最後影張相留念就算. 離開原宿返涉谷食 Pepper Lunch, 跟住再返新宿行東口嘅電器鋪行, 行完再去食行程最後一次回転寿司 しおん. 食完我地諗住返 Taito 夾公仔順便睇吓撞唔撞到阿駿佢地, 可惜撞唔到... Catherine 話之前果晚同佢地夾得好開心, 佢話從未試過夾得咁開心咁喎. 我用阿高嘅秘技夾咗五隻狐狸同奉獻咗成千 yen 落隻米妮失敗後就盡興而返.