体息咗個幾禮拜冇寫, 都係忙於 Oblivion 同新買果隻 Xbox 360 Battlefield 2 : Modern Combat. 早兩晚仲屎急痕 upgrade 咗 838 個 rom 攪到朝早八點半先瞓, upgrade 完有啲問題第二晚又要 hard reset 重新再嚟... 灰!
最後一日通常都係衝刺, 所以都係圍繞上野果頭, 又係 0101 同御徒町買手信. 我地食早餐諗住去番之前上野一間類似 Starbucks 嘅 Cafe, 好意外地 Amy 竟然好肯定咁話記得點去! 老實講我不嬲都覺得佢同 Catherine 一樣係啲矇吓矇吓嘅女仔, 不過當然 Catherine 嚴重好多啦. 我地班男仕見冇乜幾何, 明知錯都聽佢講, 有時一齊玩都冇理由吓吓都係啲女仔聽男仔講, 女隊員都可以做吓主導. 最後當然都係由男隊員搵到.
我地搭飛六點九果班 UA853, 原本我早兩日提議三點從上野出發去成田機場, 但阿高話個半鐘可以去到喎... 咁四點零鐘出發都冇問題! 好好好... 四點就四點. 就係咁, 呢個旅程第二樣經典因為咁而發生...
話說我地依照計劃四點幾從上野搭京城線, 我地一到就有架去成田嘅火車, 咁就梗係上啦... 架車一路搭都冇乜嘢, 佢地搭搭吓就瞓哂, 而我就瞓咁着四圍望, 過咗幾個站發覺有件事好奇, 就係架車越來越少人搭, 有啲甚至落車響番果個月台等下一架, 於是我去駕駛室問司機, 佢三十幾歲左右, 英文完全近乎零, 我大慨都知佢話呢班去唔到機場, 於是我叫醒佢地商量, 睇吓個路線圖發覺我地果班車係站站停, 於是搵個大站轉快車. 我地都係攪唔精點為之快速同特急, 有你冇你上咗之後班車. 班車好多人, 睇怕都冇錯掛... 我地坐到大約機場前六個站左右, 見到對面位坐咗兩個讀初中嘅小妹妹, 同佢地傾咗幾句先知原來呢架都去唔到機場, 原來成田站就機場之前一個站, 同成田空港係兩回事. 其實我地差唔多五點九都仲有幾個站都知好窄, 事關第二架車都係差唔多站站停, 仲要有時停好耐讓 Skyliner 行允先. 但斷估到 check-in counter 都差唔多仲有半個鐘掛. 但人算不如天算, 我地要到成田站第二個月台轉車之餘, 去到個月台見到六點三到站果架係我地唔上得嘅 Skyliner, 死!!! 再下一架到機場嘅要廿六分先到, 玩完!!! 大家都好擔心上唔到機尤其是一諗起齋買回程機票位位起碼三千... 我同佢地講唯有望隻機 delay 啦, 因為 UA 啲垃圾機一個月梗有幾次 delay... 跟住就 plan 定一落車點做...
我地差唔多六點七一到站, 我負責攞哂所有 passport 飛奔上 check-in counter, 阿駿幫埋我擺行李. 我跑上去由於壓力太大關係, 好快就腳軟... 我跑對京城線出口, 竟然有個火車站職員要對 passport 先比過, 果陣手忙腳亂咁搵返自己果本, 留低其他比佢地過. 我一支箭咁衝上去, 好彩好順利咁搵到 check-in counter, 但已經六點八個半字收緊檔, 太遲!!!!!! 我硬住頭皮去 check-in 諗住冇啦, 點知佢肯同我做, 原來架機真係 delay!!! 個 staff 同我講佢講正常真係冇, 咁啱果日 delay 到七點五先有... 與此同時佢地都跟到上嚟, 難為阿駿攞兩件大嘢暴走, Catherine 都話佢勁!! 我地嗱嗱林入閘, 去到閘口啱啱先開始上客, 由於太遲 check-in, 我地全部打散哂坐, 多得阿高同另一位好嘅男乘客一調再調之下先至可同 Catherine 坐.
話咁快就已經返咗嚟啱啱一個月, 大家都仲好回味仲希望今年去多一次...
沒有留言:
發佈留言