我和殭屍有個約會

我自從 Rainbow Six 後, 一直以為自己最鍾意係玩第一身射擊 (FPS), 最近玩之前提過嘅外國 RPG 大作 The Elder Scrolls 4 : Oblivion (TES 4), 先至醒起番起原來 RPG 先至係令自己廢寢忘餐嘅 game 種.

回想自己第一隻玩嘅 RPG 係響小五小六左右, 就係當年超勁嘅 RPG : Ultima 4!! 爆完 Ultima 5 然後 complete 埋 Ultima 1-3. 呢隻嘢響當年真係一時無兩! 就算而家呢個系列響外國仲係殿堂級經典! 呢個系列由第四部曲已經有巨大地圖比你歷險, 獨特嘅故事同優良嘅系統亦係佢其中成功嘅原素. Ultima 系列到而家響我心目中都仲係經典, 永遠都係!!! 之後我玩 Ultima 系列一跳就跳到 Ultima Online (UO), skip 咗 Ultima 5 以後及 underworld, UO 簡直係另一高峰!! 當年 Ultima 己經要用 keyword 咁同 npc 講嘢攞料, 情况同而家 TES 4 一樣, 不過當然而家幸福好多唔使搵 keyword 打. 仲有 keyboard A-Z 都係 command 同 spell.

玩 TES 4 令我回憶返以前為 Ultima 不眠不休嘅日子... TES 4 有好多 Ultima 嘅影子, 所以連佢地嘅 producer 同好多鬼佬都話佢係 old-school RPG. 而家好似好難搵啲咁好似我咁 Apple II 時代已經玩美式 RPG 嘅人... 我覺得 TES 4 已經可以成為經典, 甚至比 Ultima 更青出於籃. 如果 TES 第時出 MMORPG 就真係得人驚!!!

TES 4 好多地方同 Ultima 一樣... 例如大得恐怖同自由度極高嘅世界, 就算唔玩 quest 四圍觀光同互動性極高嘅 npc 吹水都有排你玩. 佢畫面真係靚到絕!! 相信只有最 high end 嘅 PC 行 PC 版先會靚過佢. Main quest 係老套果類關閉魔界之門, 但 side quest 返而又多又有趣. 例如我入哂所有公會, 每個公會有唔同嘅 quest, 行行吓街聽到途人吹水又有 quest, 掹條草都可以有 quest. Quest 又唔係只有直線咁玩, 有啲會比你揀點做... 例如有次有個女人要我搵本魔法書, 成功攞到比佢佢會教你書中嘅一招, 同一時間法師公會有人知個女人要果本書, 叫我唔好比個女人, 交比公會佢就 recommend 我入魔法學院, 咁嘅情況你可以是但幫一個, 又或者比番本書公會再偷番比個女人食兩家茶禮又得. 最想講嘅係入咗一個叫 Dark Brotherhood 嘅會, 呢個會係要殺咗無辜嘅人先至入到. 入會資格要殺人, 咁 quest 一定係好黑暗... 我覺得佢嘅 quest 係比其他公會更有趣... 除咗普通殺人之外, 仲有製造意外殺人, 又或者一間屋同五個四圍走尋寶嘅人殺哂佢地而又要唔比佢地任何一個發現, 特別嘅如好似 Splinter Cell 咁玩潛入城堡靜靜雞將目標定時食嘅藥換做毒藥等佢毒死, 極盡邪惡!! 無他嘅因為會長原來係吸血殭屍! 我不嬲好鐘意西方吸血殭屍為題材嘅戲, 呢次我仲可以做佢地會員之餘, 玩咗幾個任務後, 比 assignment 我做果隻殭屍仲問我有冇興趣變成佢地一份子, 我選有佢就等我瞓着果陣吸我血, 當我瞓醒就會 "染病"... 其間有三日比我番轉頭醫, 如果唔係第四日就會完完全全咁變成一隻殭屍. 做殭屍有好有唔好, 講吓好先, 除咗 stats 如 strength 呢啲會增強外, 如果持續 24 小時唔吸血就會有多項殭屍技能如 night vision, 第二日仲唔吸又多啲如此類推直至第五日. 壞處就係殭屍嘅天敵 --- 怕陽光. 如果吸咗一次血會有一日時間好似我和殭屍有個約會果個況天佑一樣日間四圍走都冇事. 但一日唔吸血, 日頭出街就會慢慢扣 health, 第二日又扣多啲, 一日比一日扣得多直至吸血為止, 如果唔係就要夜間行動同入室內避陽光. 除咗扣 health 外, 個樣會越來似殭屍, 去到邊都神憎鬼厭, 冇辦法同人傾計!!

我有時都好鐘意啲奸角如 Darth Vader 同 555 嘅 Kaixa, 所以呢次入 Dark Brotherhood 做亦正亦邪嘅殭屍真係過癮!!! 自從上次 Star Wars Galaxies 後好耐都未試過玩到欲罷不能, 隻 game 起碼玩半年以上, 賣 $299 真抵玩!!! 睇埋網上 download 嘅 collector edition bundle 嘅製作特輯覺得仲低!! 佢地開發隻 game 用咗三年半, 非常認真!! 我果啲 Ghost Recon, Battlefield 2 同 Rumble Roses Double X 全部已經擺埋哂一邊. 沉日番中收夜晚一點返到屋企仲玩到朝早十點先瞓, 真痴線!!!

最後不吐不快, 唔識欣賞 TES 4 呢類美式 RPG 唔緊要, 可能玩慣日本 RPG 鐘意果啲架仔嘅人設. 最頂唔順有啲人話 TES 4 太多英文睇唔掂所以唔玩, 都係日文 RPG 好啲. 真係攪笑!!! 我相信玩日文 RPG 睇得明嘅人真係唔超過兩成... 我地學英文由幼稚園開始, 衰極爛船都應該有三分釘, 況且呢個世界有字典呢樣嘢嘛!!