打不死

用打不死嚟形容任天堂真係最好不過, 自從 Sony 用本來諗住同任天堂一齊開發嘅 Playstation (codename PSX) 將家用機市場佔領後, 諗住任天堂實死梗架啦, 點知原來唔係... 佢淨係食老本玩 Game Boy 同 Game Boy Advance 系列呢類手提機都長做長有. 又講返三月東京所見為例, 日日搭山手線啲日本人都係玩 NDS, PSP 成個星期都係見得一個. 自 NDS lite 推出後, 香港都比以前多人玩 NDS, 雖然未夠 PSP 多... 任天堂大師宮本茂成日話畫面機能幾靚幾勁係冇用, 最緊要係遊戲性. 呢套理論我唔係完全認同, 但又唔能夠唔承認. 以前玩 Feel The Magic: XY/XX 同 WarioWare Touched! 都覺得好過瘾好堅, 今次回歸玩埋任天狗, 押忍! 鬥え! 應援團 同超執刀先至驚嘆原來電子遊戲係可以咁, 點解 PDA 一樣有 touch screen 同 mic 但冇啲咁嘅 games?? 我不嬲唔太鍾意任天堂呢間公司, 不過佢真係幾醒, 明知鬥 hardware 實唔夠 Sony 同 Microsoft 撼, 以佢嘅專長玩創意都可以叫好叫座到咁! 而家係, 過幾個月 Wii 都係. 最癲就係 Super Mario Bros 系列, 番炒完移殖自 N64 行 3D 嘅 Mario 64 DS 再到近期玩返轉頭用 2D 嘅 New Super Mario Bros., 一樣仲有咁多人追棒!! Catherine 係其中一個人版... GBA 果幾隻爆完又爆都仲覺得新呢隻好好玩... 佢呢隻玩佢同事果部都已經一早爆咗, 而家我果部裝咗又玩多次, 真係得人驚!! Mario Kart DS 亦一樣出完又出, 真係唔寫個服字都唔得!!

補充番少少 EZ4-micro SD 先... 用落都唔錯, 佢原來有跟深淺藍色殼各一比另外兩隻色嘅 NDS lite 用. Software 呢樣好攪笑竟然要自己 download 即係冇碟冇說明書跟!! 仲有玩 roms 除咗 GBA 果啲有輕微唔夠 frame rate (好少好少) 外, 都好正常. 個 software 冇金手指同玩 NDS games 唔知點出返 EZ4 flash 個 main menu, 變咗轉親 games 吓吓要熄機再開, 唔係咁方便. 另外雖然佢唔凸出嚟, 但佢冇做埋原裝 GBA slot cover 同 G6 lite 果條 fit 機身嘅光面膠邊, 外觀爭啲啲. 仲有樣唔好就係張 micro SD 比較難響 EZ4-micro SD 度攞番出嚟, 因為張 micro SD 實在太細太 fit. 最後, 有興趣可以睇埋佢個兼容性列表參考一吓...