鳯園

今日又同阿賢去影相, 目的地係大埔工業村對面嘅鳯園. 果度有個蝴蝶保育區, 初初以為好堅, 點知去到只係屋仔一間仲要人都冇個. 影蝴蝶就要再行入啲到古家園左近嘅一撻爛鬼草地同樹林, 老實講景點就真係唔算, 只不過果度比較多蝴蝶比攝影發燒友影, 種類又唔算太多喎, 可能我地唔好彩啦. 一去到就已經見有班人同我地一樣唔駛返工響度影. 呢次我地準備咗蚊怕水, 阿賢仲着埋長袖衫, 但啲蚊太狼... 我比較好啲我住村屋可能有抗體冇針得咁勁, 阿賢就惨啲比啲蚊隔山打牛, 隔住條褲都照針, 連塊面都有!!! 最得意我影咗隻阿賢話係雀嘅物體, 成隻飛蛾咁專吸唔知花粉定蜜糖, 有冇人知係乜嘢嚟??

架生我都係果兩支鏡啦但 50mm f/2.8 Macro 就如我所料廢武功, 不竟蝴蝶係唔可以隊埋去影嘅, 咁就用 200mm 啦, 都係唔得! 啲蝴蝶警覺性太高唔似上次馬鞍山公園果種可以隊埋去任影. 好彩阿賢帶咗支 Sigma APO 70-300mm F4-5.6 DG MACRO 去比我試. 300mm 呢個距離啱啱好, 雖然我唔惯比較雖追住對焦, 不過聽埋個價錢真係唔錯, 又可以比 full frame 機用, 只不過成像一般光圈又唔夠大... 其實 300mm 有 5.6 都 OK 嘅. 呢支鏡除咗平吸引我之外就冇乜驚喜. 我鍾意影蟲可以諗諗, 不過要再 research 吓仲有冇好啲... 佢去到 300mm 成像有啲散散地, 色又唔夠鮮.

如果大家有興趣睇吓我近呢兩次 macro 劣作, 請去呢個 blog 嘅左手邊我個人相簿條 link 第三頁, 切記如非必要就唔好用最大解像度放大, 因為自家用 server 加 Netvigator 比較慢.