Minolta AF 50mm /2.8 Macro 入手

早幾日收工約咗阿賢睇相機嘢順便試吓雅蘭附近新開果間壽司店, 都幾正!! 不過最正就係佢帶咗支佢啱啱同佢同事買嘅第二代 Minolta AF 50mm /2.8 Macro, 響西洋菜街夜晚試人像同壽司店試 macro 之後即時中毒. 原本我諗住入 AF 50mm /1.4 或 AF 50mm /1.7, 點知因佢地 macro 冇咁勁所以即時轉軚!!

Minolta 鏡不嬲都比較少, 而家響香港更難買因啲舊貨已經清得八八九九等 Sony 出返, 熱門果啲直頭唔使諗, 就算有二手都即時比人搶哂. 所以當晚唯有響 eBay 搵... 搵到兩三支咁大把, 顯然呢支鏡冇另外果兩支 50mm 定焦咁 hit. 最後我揀咗一支價錢合理 condition 又唔錯, 不過賣家只 ship 美國, 好彩我之前響 eBay 買過幾次嘢, 有紀錄 support 我傾掂個賣家比我落 bid 寄返香港, 實在太好!! 而我 bid 果支係比阿賢果支舊嘅第一代. 分別主要係變焦環改良咗同第二代開始用令散景靚啲嘅圓形光圈葉. 不過個鬼佬話第一代嘅光學質數最正咁喎, 真係要同阿賢果支比較過先至知... 呢支鏡總共有三代, 而第四代將會響月尾由 Sony 推出. 我最鍾情呢支鏡有以下幾點: 1. 大光圈唔夠光同淺景深好用; 2. 成像銳利; 3. 人像焦段; 4. 放大率 1:1. 呢支鏡講到尾其實都係為咗 Catherine 同我啲玩具而買... 啱啱收到賣家 email 我話今日寄出, 好心急想快啲試... 如果趕得切漫畫節同埋下星期同阿賢到馬鞍山公園影相就好!! 下面幅壽司相就係用阿賢部 Dynax 7D 搭呢支鏡影嘅.

呢兩日經常到台灣 MinoltaFans CLUB 討論區搜集吓呢支鏡嘅資料, 竟然響鏡頭區嘅心得分享搵到對嘅評論:

"曾經入圍 19 隻最利的鏡頭之一, 相當優秀的傑作, 1985 年 2 月發表時可以說是震驚武林的劃時代產物, 由 1:1 到無限遠都保持超高的解像力, 鏡組採用相當大膽的設計, 使用兩組空氣鏡片, 來維持不同距離下化質得穩定，不僅如此，色彩的飽和度，和適當的反差，使得它卓然出眾，19 年來，再 1993 年和最近才做了小改款, 鏡組設計不變, 改良操控性 (好不到哪去), 新的鍍膜, 說到新的鍍膜, 新款和就款真的有差, 差異... 蠻難形容的, 拍出來的東西, 大概只有一句: 它 X 的好可以形容, 很值得擁有. 無悔."

原來阿賢同我鏡眼光唔錯, 我一路都冇為意呢枝鏡, 唔係阿賢比我玩過都唔知有支咁嘅好嘢!! 之前一味睇 DCHome 班友仔點吹捧 50mm /1.4 同 50mm /1.7 呢兩支, 我響果度 search 過佢地好少好少講呢支鏡... 相對香港, 台灣嘅討論區質數明顯高好多.

頭先細佬打比我話想買有防震 DSLR, 我同佢講話等月尾 Sony A-100 囉, 雖然成像一般, 但功能殺哂同夠新. 我同阿賢講呢單嘢佢話唔好, 不如買返 Dynax 5D 仲好. 話時話 Konica Minolta 呢兩部 DSLR 真係比較少二手, 尤其是 Dynax 7D, 一來呢兩部機比 Nikon 同 Canon 嘅 DSLR 少人用, 二來 Sony A-100 功能同成像比 Dynax 5D 唔係進步幾多, 尤其是成像簡直令人失望. 所以大多數現有用家冇意欲換機, 二手自然更少, 新貨又買少先少... 點都好佢真係買先算啦!!