失敗之作???

首先多謝 Martin 幫我搵番鎖匙包, 頭先收工竟然留底響公司, 我仲以為唔見咗嚇餐死!! 唔見咗配過哂啲鎖匙麻煩事少, 個鎖匙包係上次東京同 Catherine 一齊買, 對我嚟講有記念價值, 唔見咗我會好唔開心.

早幾日打風機場大混亂大家都知, 出奇地所有同事都好合作加斑冇飯食攪掂哂啲機而又冇怨言 (起碼我聽唔到), 大佬又非常之高興. 原來大家都唔係咁斤斤計較嘅, 雖然公司對我地唔係咁好... 希望呢件事令公司明白我地先係佢地最重要嘅財產啦! 至於打風飛機事故, 其中一單就係義大利 Ocean Airlines reject takeoff 爆哂啲軚, 真精彩!!

用咗 Dopod 900 三日, 越用越正!! 衰在香港冇平嘅無限 3G 上網服務, 如果唔係就完美. 有啲朋友覺得我用 Peoples $128 無限上網好貴, 在我嚟講一啲都唔貴, 因為我成日用嘛! 百幾蚊食餐飯都冇咗啦. 部機唯一要挑剔係大部, 老實講我覺得 ok. 我仲發覺越用越好 feel, 以 PDA 角度嚟講比之前我至愛嘅 Dopod 838 更正, 尤其是佢可以成部 notebook 咁放響枱度睇戲同埋個 mon 大啲睇網頁真係舒服好多. 咁當然 Dopod 838 勝在有 keyboard 得嚟算輕巧適合當電話用啦. 仲有原來佢有個好似最 high-end 嘅 Apple MacBook Pro 咁有個環境光線感應器, 身處嘅地方夠光個 keyboard 背光就唔會着嚟慳電. 其實 HTC 真係好有心思同大膽咁開發呢部機, 奈何太貴同定位問題變成失敗之作. 起碼 Dopod 838 有代號 Hermes 嘅後繼機, 而 Dopod 900 就未見有. 電量又係值得一讚, 以行 520MHz 嘅 3.7 吋 VGA 機嚟講, 成日用 iSilo 睇報紙勁上網都可以捱到返屋企剩返十幾個 percent, 比起以前用 Dell X50V, 唔上網剩 iSilo 睇小說大半日就要換電, 實在冇得頂! 不過我都會買士啤代電同充電座, 反正夾埋百幾蚊咁平.

Dopod 900 同其他 HTC 啲機一樣有其他牌子 OEM, 當中 O2 XDA Exec (唔係 Atom Exec) 就最型, 成部黑色藍光 keyboard. 厭咗而家呢個色換呢部都唔錯, 不過香港好少, 多數係先達賣 QWERTZ keyboard layout 嘅 T-mobile MDA Pro.

唔知部 Dopod 900 會唔會用得耐過部用咗八個幾月嘅 Dopod 838 呢??