回鄉探親

有大半年冇返過澳門, 沉日一個人 (孤獨係改造人嘅悲哀) 即興返去, 一來好掛住爸媽同澳門, 順便試吓支新鏡 Sigma 18-50mm f/2.8 EX DC, 恆定 f/2.8 大光圈標準鏡實在好用. 自從買完上次支 50mm 定焦鏡之後, 我就諗住重組鏡群將支 Tamron AF18-200 XR Di II LD Aspherical [IF] Macro 賣出, 再入 tele macro Tamron AF70-300mm f/4-5.6 Di LD Macro 1:2, 最後有閒錢再入 Sigma 10-20mm F4-5.6 EX DC 呢支 ultra wide 共 4 支鏡咁就暫時完滿.

講開澳門, 我一路都當佢係我鄉下, 我響果度長大嘛! 果度有好多快樂嘅回憶, 不過佢而家變咗好多, 懶係現代化, 四圍高樓大厦天橋呀咁, 鬼五馬六... 人又多車又多, 真係冇以前咁好住. 有幾個地方好值得我懷念:

1. 新麗華酒店對開果個茶座.

2. 舊噴水池.

3. 亞馬留銅馬像.

4. 工人球場同飯堂
.
5. 近住二龍喉百街再落啲有檔牛腩麵.

6. 板樟堂中國文教左近條小巷啲街邊檔.

7. 營地街市附近賣香蕉榚嘅呀伯, 我諗而家應該仙遊咗, 不過而家國華門有檔一樣咁好食, 唔知係唔係傳人?

8. 母校永授中英文中學, 果度我只讀幼稚園至小六, 環境一流!

9. 水塘直路果個海皮, 爸爸成日揸車同我地遊車河都會停果度.

10. 最後當然係我長大嘅地方葡京, 細個爸爸成日帶我裡面四圍走, 好似四五六上海菜舘, 仲有我同細佬響果度個泳池學遊水, 洒店間機舖... 爸爸寫字樓仲可以免費睇賽車.

沉晚食飯我都同爸爸講, 我話佢好似我咁嘅紀已經係工程師, 有兩個仔又車又有樓, 相比好似我而家咁一事無成, 實在太失敗!! 其實我父母都花咗唔少心機心血同金錢裁培我, 只不過我由細到大都太任性...