唔夠喉呀!!

真係估唔到呢個主題公園咁新淨企理, 非一般大陸主題公園可比. 我覺佢除咗冇廸士尼果啲卡通人物外, 其他真係比佢好.

首先講吓長隆野生動物園先, 如果有車係可以自己揸入去慢慢睇嘅, 好似我地呢啲跟團嘅就坐外型似火車嘅觀光卡車. 裡面嘅動物應有盡有, 響 Discovery Channel 見到大路果啲佢都有. 馬戲方面水準亦好高, 唔係求其搵班二打六表演, 所有戲服舞合佈景燈光都係超水準. 至於機動遊戲亦都係好好玩, 裡面所有配套係經過精心安排, 廁所又乾淨. 想響大陸玩吓短綫呢度一定要去!

本來我地諗住買 package 去, 最後都選擇跟新華去, 貴啲啲搭車唔使煩又安全, 定時又有飯食, 啲餐算唔錯, 可以話大魚大肉. 連埋導遊費包所有入場券一千蚊有找真係抵.

我地計劃十月或十一去古兜温泉或海泉灣, 不過兩日一夜實在太快玩完, 如果下次玩三日兩夜就好啲... 唉!! 放埋聽日就放完為期十日嘅大假, 唔係好夠呀我仲有好多嘢未做...

無論旅行同大假都唔夠喉...