笨記手動機第二把膠椅

攞咗部 Pentax Spotmatic 去相機維修中心, 經過診斷後, 1/500 同 1/1000 快門唔得, 抹番油可能會好啲, 仲有支 Takumar 標準鏡最後一組 element 啲毛食到有個圈, 抹完影出嚟會 soft 咗. 算把啦... 唔攪... 比幾百整番個效果都可能唔好, 唯有好好收起佢繼續供奉, 佢嘅精神係永遠長存!! 失望之際響香檳大廈裡面睇吓, 點知比我見到有部 K mount 嘅 Super Program (又名 Super A), 據我響網上所搵嘅資料得知呢部機響 Pentax 手動機嘅地位只係僅次於而家全世界炒到九彩嘅手動機王 LX! 但價錢就平好多, 可能唔夠經典兼冇乜人搵卦... 之後亦去過松屋試部 Pentax MZ-5 (EISA/TIPA award edition), 呢部當然好啲有 AF, 不過我唔鍾意佢香檳金色機身同埋菲林機我始終想買部手動多啲... 其實我最近上 ebay 搵 classic K mount 機除咗 K2, ME Super 同 Ricoh XR-P 之外, 都有睇過 Super Program. Ricoh XR-P 我響香港 Yahoo 拍賣搵到一部八成新淨 body 賣 $400. 考慮咗一陣雖然好抵但都係想番一部 Pentax 銀黑機.

我呢部機有九成以上新, 標價 $750 還咗 $100 價即 $650 攪掂! 同 ebay 差唔多不過慳咗運費同試過先買咁解. 老闆仲好好人送咗兩粒新電同特登幫我搵咗個原廠個 body 前 cap. 買完機返相機維修中心買咗條原廠機帶, 好鬼正!! 我原來仲有四筒 Kodak Gold 400 菲林響 2002 年去北海道用淨唔知仲用唔用得, 不過唔理咁多唔好徙上咗落部機先講!! 話時話呢部機其實唔係我心目中嘅 classic 機首選因為佢快門唔係拎掣校速度而係上下掣用個細 LCD 顯視出嚟, 唔夠 classic 而且冇電係影唔到嘅... 不過見個朵算行仲要以前佢響 1983 年面世果陣榮獲 "歐洲相機大獎" 名譽, 加上還到一舊水幾開心就算啦. 不竟手動機我唔想買咁貴, 因為講緊一年可能只係用兩三次, 我始終鍾意影 digital 多啲.

頭先上咗我僅存兩支 FA 定焦同前日買果支 Tamron A17 影咗幾幅, 菲林就係衰在唔知影成點... 不過上 mount 果吓真係感動, 啲鏡終於有機可以用!! 我真係想影多次中環天星碼頭呀!! 可惜 Catherine 實睬我都傻...

對我部機有興趣可以睇吓國內著名攝影網站色影無忌, 裡面有個 PENTAX Super Program / Super A 俱樂部, 好多有關資料.