充實

一早起身上咗陣網就去附近泳池游水, 游到中午就去整頭, 整到五點幾返屋企沖涼休息一陣就出去. 呢次係同一大班同事去上次果間松屋食放題, 就係因為正所以急不及待介紹比啲同事. 同上次一樣啲嘢係不停咁嚟, 又撻朵有免費燒和牛. 我狀態麻麻, 好彩有阿高同 YY 兩個焚化爐, 如果唔係實淨好多.

好似有少少發燒, 都係早啲瞓... 呢排返工都好辛苦, 啲天氣真係攞命, 可能咁領咗嘢. 呢排成日諗點解呢份咁專業兼日曬雨淋嘅工作人工竟然咁低?? Catherine 成日同我講以而家嘅市道, 出面唔難搵咁嘅價錢, 仲成日問點解咁嘅工仲有人做?? 其實不嬲都唔太 care 呢啲嘢, 事關我都唔係果啲好等錢使嘅人, 不過一同人傾開阿邊個邊個賣髮型用品閒閒地皮半, 阿邊個邊個又響 OSIM 做平均每個月都有兩皮, 兩個都唔使咩學歷, 令我覺得響度繼續落去好唔值... 我唔會對而家做緊呢間公司有任何幻想, 亦都一定唔會返舊公司做, 舊公司用時間換錢只係自欺欺人. 我好清楚呢一行根本就係咁...

要再轉行一定要好大勇氣, 我呢一刻仲未有, 遲啲就唔敢講...