小朋友

軒軒同迪迪成日都話嚟我屋企打機打通頂, 沉晚終於得償所償. 佢地兩兄弟就真係開心, 車輪戰咁玩我屋企所有機包括手提... 本應話打到朝早六點上床, 不過我五點就要佢地瞓. 諗住佢地好好瞓, 點知十一點起身, 一起身即嚟過, 有圖為證. 佢地兩個其實都好乖, 唔會扭計同打交, 起碼呢兩日冇, 因為我用遊戲機克制住佢地, 哈哈!!!

同佢地一齊令我諗到好多嘢, 第一樣就係同細佬兒時點滴, 好似啲例牌嘢如打交爭嘢玩. 我細過都成日蝦佢, 好似以前小學暑假一定日日學游水, 去之前一定同爸爸到酒樓飲茶, 我地以前叫細佬做包皇因為佢好鍾意食叉燒包蓮蓉包呀咁. 記得有一次好過份游水時浸佢浸到佢嘔哂啲叉燒包出嚟, 而家諗番起都好內疚. 第二樣就係結婚後會唔會要小朋友... 講真我一路都係唔想要, 原因係養小朋友要好多錢, 我寧願去吓旅行好過. 錢, 都唔係最重要, 最重要小朋友唔同寵物, 責任大好多, 成日心掛掛佢健康功課群咩人玩, 仲要唔好諗住大個咗就甩難, 正如我阿媽而家仲成日驚我呢樣果樣咁. 我都問過爸爸媽媽意見, 佢地都支持唔要,可能我家族有婚姻失敗個案, 同埋佢地都覺責任太大, 況且而家啲小朋友似乎比我地呢代醒又難教... 另一方面佢地亦都同意一個家庭係要有小朋友先至係完整, 所以就算生都係一個算. 而家唯一令我猶豫係怕第日我死先, 依賴別人極強嘅 Catherine 老咗孤零零, 當然有兒女都唔包會理你... 仲有佢又好鍾意熱熱鬧鬧嘅家庭生活. 每次見佢同軒軒玩我都會諗... 冇錯我唔想要, 佢亦都話玩人地果啲就梗係好, 但試過拖住佢地兩兄弟去街我地都會諗如果係自己個仔真係幾開心, 我都想像到...

不過都未有足夠理由 support 我想要, 而家唯一有少少唔同係以前認為一旦意外地有咗, 我會堅決唔要. 而家就有所保留, 可能我會好開心都唔定... 起碼如果新工作穩定咗, 以我地兩個嘅經濟能力應該應付得到.