茅盾

Last day 特別被安排做法航客機, 大哥大話比我同新公司啲同事認識吓, 多謝佢用心良苦! 拖完機中間嘅空檔果陣比啲嘢阿賢, 同佢傾咗一陣突然紅色閃電警告, 我即刻由 W50 位揸架牛車返休息室都比雨打到又痛又濕. 今朝起身就收到阿賢 email 話從我眼神睇得出我唔捨得啲同事, 叫我向前看並安慰我話仲響機場做都仲可以見面. 我即時諗起遞完信行出 planning 果陣, 竟然連 Co Co 都睇得出...

唔捨得個表情係點架???

的確我真唔捨得啲同事, 雖然響呢度做嘢亦都有好唔開心嘅時候, 例如有人認為我響公司嘅垃圾 newsgroup 攪攪震, 又或者係上年努力工作, 雖不至 outstanding, 但總算做好本份, 並冇請過病假都竟然攞唔足花紅等等... 但一 confirm 要走就唔知點咁. 其實三月果陣已經決定走, 果次可能 timing 問題比咗求職信連工都冇得見. 到呢次有果邊嘅朋友游說我去, 內心掙扎咗好耐, 因為我知道佢搵得我就好大機會走得. 掙扎果陣腦裡面浮現好多同同事有講有笑嘅情景, 仲有做咗咁耐, 公司嘅運作同環境都好熟識. 我並唔係驚適應新環境, 除咗早過我過檔好幾位舊同事外, 新公司有若干人係我以前入行果間公司同 team 嘅舊同事, 所以冇乜好擔心.

呢間公司我做咗六年, 六年對好多人嚟講可能唔係好多, 起碼公司有好多人都做得耐過我好多, 但我出嚟做嘢做咗十幾年, 呢份工對我嚟講係最長嘅一份. 記得上年未諗住走果陣都會諗究竟我會響度做幾耐?? 果陣仲同阿昌講笑話做到退休... 我冇諗咁長遠, 不過我估至少會見證到 hangar 嘅開幕掛, 點知...

人嘅際遇真係好難講, 其實 Catherine 一直都哦我話份工搵錢少, 又話整同揸車都多過我, 我一直都不意為然. 直到同身邊嘅人傾開大家嘅待遇比較之下先知出面經濟好咗係同自己無關. Catherine 係啱嘅, 一份返 shift 嘅專業工作日曬雨淋, 返工又遠車費又貴仲要入咗行差唔多十年, 點可能搵咁少?? 再講, 佢上星期同我講原來佢呢幾個月嘅業績都令佢連續攞到全個集團嘅 top ten! 一方面我戥佢開心同驕傲, 另一方面自己不其然會比壓力自己... 仲有, 我不嬲都攪得佢份人傻更更烏吓烏吓, 我有乜理由會差過佢??

新工作雖然唔係搵好多好多錢, 但已經比前多好多. 沉晚同阿媽傾開佢話仲以為我 "pair" 到唔識郁, 原來我都仲有自尊咁話... 真係激死!! 我唔係冇自尊, 自係我一向冇鬥心安於現狀姐... 而家心裡總算好過好多!!

頭先瞓醒起身諗起我終於唔使再響呢間公司返工竟然有少少失落同空虛... 其實呢個月心情好茅盾, 一方面見得成工走得甩可以鬆一口氣, 我記得人事部打比我 confirm 請我同 offer 我滿意嘅人工真係好開心, 我甚至想快啲走, 唔想再留響度!! 但另一方面見到好多同事戥我開心送上祝福真係有啲唔開心. 點都好, 唔捨得又唔可以當飯食, 響舊公司冇前途同錢途之下唯有咁做...

呢個圈子咁細, 我好相信我地會重聚都唔定... 我唔係話我想食回頭草, 話唔定兩間公司將來會合併呢!! 呢啲嘢邊話得埋喎...

各位同事再見啦!! 保重!!