生理時鐘亂哂嘅關係, 成晚瞓得唔太好, 只有兩粒鐘左右. 一早搭八點半班 A41P 到青馬收費廣場轉 E31 入富東. 由於家俊屋企有事遲嚟, 於是上阿駿屋企等佢. 我地大約十一點零十二點出發, 呢度踩吓果度踩吓, 行吓冤枉路影吓相咁, 去到欣澳地鐵站都差唔多三點. 初段有太陽都幾辛苦, 後來天陰仲有驟雨反而仲舒服, 唯一唔好係影相差啲. 行程有啲失敗之處係我買得一支水, 要佢地兩個分啲比我, 都捱去欣澳, 點知原來地鐵站乜都冇... 靈機一觸打比機場鐵路工作嘅細佬諗住叫佢幫我地響站內加水, 點知佢啱啱收工, 不過佢直頭特登由東涌買幾支水入嚟, 真係唔話得!! 有咗經驗回程快好多, 大約一個鐘攪掂, 只係東涌裡面踩去東會城有啲阻滯, 我架車咪錶錄到來回 40km 鬆啲. 行程尾段我地去咗 KFC 拆餐勁, 然後家俊車埋我返屋企, 真係非常感激!! 如果唔係, 原本我諗住搭 E42 返沙田再踩返屋企. 講真來回東涌欣澳成個人已經散哂, 不過再踩沙田至馬鞍山都應該仲頂得住嘅...
有樣幾開心嘅係佢地兩個響東涌單車舖還車果陣, 有對踩 GIANT road bike 嘅夫婦車友讚我架 "大黃蜂" 靚仔!! 仲有玩完摺埋部車入袋途人嘅驚嘆眼光真係幾過癮!! 以我呢個新手嚟講呢架車 performance 真係唔錯, 今日去嘅地方完全應付到, 都係果句有買貴冇買錯!!
而家成身肌肉酸痛又勁累, 令我諗返起細個同細佬游成日水就係咁嘅感覺, 次次返屋企食飯沖個涼就好好瞓. 不過今次好奇怪, 沉晚瞓咁少, 頭先十點零上床一點就扎醒, check 完 email 上床典到三點半都瞓唔返先至索性起身寫呢篇嘢, 我原本諗住朝早先寫架!!
沒有留言:
發佈留言