直上

一如約定響孖橋等慢慢轆入大埔食咖哩至尊, 然後去單車舖睇嘢, 同時又即興約埋電鋸. 跟住由大埔經九龍坑入上水. 一路都想秋涼帶相機踩長途影相, 呢次啱哂但唔似上次咁用菲林, 用返 digital. 其實單車遊係越輕便越好, 雖然
K10D 一機一鏡唔用直度叫比較輕便, 不過如果有部 Panasonic LX2 或 Ricoh GX100 放腰就更一流!!

我地去到聯和墟同電鋸會合經過附近行人隧道竟然發生事故,
話說我跟住阿衡落斜, 點知佢突然話: "小心舊嘢!", 但我跟得佢太貼, 太遲... 話口未完已經到!! 原來係神主牌殘肢, 即時 chi chi 聲頭尾兩條內呔同時 certify, 好彩推十零分鐘車有單車舖... 我跟車有泵但冇士啤內膽, 就算有好似頭先咁一次過爆兩條真係冇得攪. 摺車如 Dahon Speed P9 幼呔冇避震都係跑吓單車徑馬路好啲, 踩啲爛嘅行人路鄉村路真係麻麻地, 可能配跟車出廠條 Big Apple 會好少少.

今日嘅組合幾齊全, 一架 road bike 一架 mountain bike 加摺車, 我就由烏溪沙一路踩到上水食豆腐花, $6 任食, 我食咗四碗加一碗豆槳, 勁飽!! 講豆槳同豆腐花都係唔夠深水埗公和咁好食. 離開豆腐花廠就去最後一站羅湖邊境禁區, 我地本應想照入禁區, 但見有警車響附近所以冇, 據阿衡講可以踩到邊位嘅鐵絲網同有個荒廢咗嘅警崗, 影相好正咁喎, 可惜... 反而有班耆英單車黨好勇咁話唔驚照入...

總結今次幾好玩, 唯獨是有伴唔好意思成日踩踩停低慢慢影, miss 少少想影地方. 部車買咗差唔多兩個月都已經踩咗九百幾 km, 淨係沉日都 60km 今日都 70km, 我真係幾勤力架! 我都同阿衡講我地住新界唔買單車真係幾浪費, 我都算買得遲... 遲吓想跟吓阿衡玩環港島. 仲有估唔到好似冇乜嗜好同節儉嘅電鋸居然會踩靚車, 佢地兩個架車都過萬, 我部而家改埋都只係佢嘅一半, 不過我部正在夠型, 出街好多人望好多人問, 好鬼開心架! 虛榮感唔多唔少都有啲!