極限

諗住成個下晝都打機順便試吓部新電視, 電鋸打嚟叫我出車我都推咗... 點知打打吓機都係打返比佢出車, 我自己都估唔到踩車嘅癮竟然大過由細到大都沉迷嘅打機, 我而家甚至搭車經過錦泰左近單車徑都想跳落去踩! 講開打機, 今年完全冇買過 XBOX 360 game, 所以特登買返隻 Ghost Recon Advanced Warfighter 2 同最新嘅 Project Gotham 4, 兩隻都好一正, 尤其是 PGR 4 澳門賽道! 十一月仲有四隻新嘢想買, 又破財...

至於踩車都係大尾督來回, 響孖橋等佢果陣, 有班踩 MTB 車友問我架車呢樣果樣又影相. 其實幾開心出親車成日有人問, 不論玩唔玩開單車都好... 不過呢排越來越多人踩, 成日同人撞款, 我下一架一定要少人有車!! 回程輪到電鋸今日踩擺街 cheap  (原來佢有三架單車) 響大埔工業村爆呔, 我陪佢推車推到海濱公園, 跟住我借我架車比帶佢個轆去廣福村附近登山者換呔.

夜晚就同一齊過檔嘅同事加埋成班舊同事一行九人拖男帶女到松屋日本料理度食放題, 我猛咁同佢地講唔使理咁多, 喪寫就得... 佢地次次叫十件嚟三件, 點知臨尾 last call 佢地又喪寫, 唔知係廚房玩定想試我地極限, 多春魚串軟骨每樣十幾廿串, 我地都唔弱, 最後只食淨四串軟骨收工返屋企.