東京 Day 2

自從阿賢肯加入, 我地就揀定星期六去富士急樂園玩, 事關佢星期一要走, 今次臨時臨急去都係我地一番誠意要請嘅比面派對.

個樂園係要響新宿小田急百貨對面個巴士總站買飛上車, 開頭仲指意阿高, 點知原來佢都搵唔返點去, 好彩我突然醒起我有記低同一路線嘅御殿場 outlet 點去. 阿高佢冇幾耐先去完, 所以只係送我地上車然後自己一個行街, 我地約咗夜晚響回程落車度等.

去富士急個行程要成個幾兩個鐘, 沿途景色都幾靚, 但我覺得呢啲我地偉大嘅祖國都有, 因為都有少少似大陸市郊, 車程中後期開始見到富士山, 佢真係好大座, 上一半全部積雪. 起初大家都擔心星期六會好多人, 好彩都唔算太多, 我覺得去遊樂場玩唔可以冇乜人, 要有適量嘅人氣先夠氣氛! 我地抵達後就第一時間玩曾經破健力士世界紀錄七十九米高嘅過山車, 呢架嘢最激之處就係一開波就一路上, 上到最高就差唔多垂直咁落. 而果度另一隻過山車返而令我更難忘, 佢唔及七十幾米高果個咁有花巧嘅路段, 佢特別之處係響開始時播高達出擊嘅音樂, 然後就射架過山車出去, 兩秒都唔使去到 172km/h, 呢個速度揸車嚟講唔算好快, 可能好多人都揸過呢個速度, 但兩秒都唔使就去到呢個速度, 衝力果種感覺同坐戰機差唔多, 心口好似有嘢壓住咁難以形容嘅感覺未必甘多人試過, 官方話個 G-Force 有 4.25G 大. 當架過山車射出後十零秒速度稍為下降, 然後衝上圖中成把劍咁嘅軌道, 衝上去果吓個頭係抬唔起, 落果吓由於又係垂直, 屁股離座不特止, 速度仲比之前七十九米果個更快, 驚嚇程度更甚!

夜晚一如計劃響新宿集合食飯, 地點竟然係吉野家!! 其實我想講係我地無意中發現新宿 JR 站西口吉野家後面有條小巷原來係別有洞天, 果度全部都係好地道嘅串燒店, 入面啲日本人都係一路食一路飲酒, 好鬼有 feel!! 奈何冇人想試, 我又冇理由賴低 Catherine 自己一個去.

呢個旅程最唔盡興都係食方面, 真係好難搵啲鐘意乜都試嘅腳去旅行... 我記得之後有一日我仲發脾氣自己一個走去食壽司, 原因就係我唔想老遠去到日本只係食香港都有嘅拉麵同咖哩豬扒飯. 壽司雖然香港都有, 但一來我自問係壽司狂熱份子, 二來日本用手搓嘅壽司風未完全唔同香港, 一路享受一路睇佢地整嘅樂趣相信只有同我一樣係狂熱份子先至會明...