我好錫車, 每一次出完車都會洗乾淨, 有時會打埋臘. 通常簡單嘅如 set 吓 brake 換吓呔都自己搞吓, 其他就落單車舖. 最近架 LG 條鏈有少少嘈, 比阿偉睇佢話冇嘢!! 好啦, 叫佢幫我落少少鏈油啦, 佢又話唔使. 真實我啲車好少落鏈油, 咁不如自己買支自己搞. 去咗屋企附近單車舖買咗支 Finish Line WAX Lubricant (KryTech), 車友通常喜歡用 Finish Line, 佢地有幾款, 我呢隻屬於乾性, 因為考慮到香港天氣比較濕. 落油之前用 WD-40 同布清潔好啲污糟嘢, 跟住一路轉個 crank 一路滴少少就得, 唔使咁多. 落咗幾日大雨下晝叫好天少少, 終於可以走返轉試吓個效果. 嘩!! 真係順哂靜哂!! $35 咁大支真係抵有排滴, 尤其是我有三架車實用得著.講開清潔, 部 laptop 攞返嚟第一件事就還原個 clone harddisk, 之前幾次都冇事, 不過呢次就出咗個妖怪問題, 就係 drive letter 無啦啦自己轉咗唔係 C drive, 修復 WinXP 雖可正常開機, 但成個 WinXP drive letter 同 clone harddisk 調轉咗, WinXP 可以正常 bootup, 但由於之前啲 software 係裝響 C:, 而家有好多都有問題. 於是 clone 返個 backup, 然後用部超慢 PowerMac 上網搵方法搞, 搞衰咗又再修復 WinXP 反反復復十幾次, 足足三日終於放棄唔想再浪費時間... 咁執著主要係唔想重新裝過哂所有嘢, 不過諗返轉頭如果一開始試幾唔得就當機立斷重新嚟過, 可能兩日就搞掂哂.
努力重裝咗一日, 而家總算搞掂哂. 個 clone harddisk data 雖然有 drive letter 問題, 不過 email 同我的文件所有嘢都可以過返, 而家終於可以開開心心咁用電腦, 之前有啲小問題由於重裝, 所以冇哂!! 當係比個機會清潔吓部電腦啲垃圾 data 都未嘗唔好嘅...
冇 laptop 用果幾日, PowerMac 就成為我主要上網工具, 不過佢真係太慢, 我頂唔順... 反而我用部 Nokia 5800 XpressMusic 經我屋企 WiFi 上網仲爽仲快. 佢個 browser 好正, 睇 You Tube 又掂又可 fullscreen, 我去開果啲 forum 用筆劃輸入中文出 post 又得, Facebook 仲好過我響 Dopod U1000 用 Opera Mobile 上流動版, 我直頭試過帶上床玩到瞓著為止!! 呢部機今時今日買真係超值, widescreen 拍片又清又超慳電, 而且之前新出果陣嘅問題同 bugs 都 fix 哂咁滯. 期待下個月同樣行 Symbian S60 v5.0 嘅旗艦機 Nokia N97 一出, 真係可以同 htc Touch Pro 2 有得打.
之前好努力去搞部 laptop 我當時認為自己好堅持, 相信只要唔放棄, 一定可以比我搞掂. 響呢件事我體會到堅持同執著似乎係一線之差, 結果發現有時唔咁執著反而係一件好事...
4 則留言:
其實你應該用O下cooked rom, opera mobile 9.5 + flash lite 3.1 已經睇倒 youtube mainsite好耐, 你有機會你應該試O下WM6.5 cooked rom, wm6.5 stable同快過 wm6.1都幾明顯. 仲有宜家microsoft 係O甘出新wm6.5 build, 可以去xda-developers 度睇.
至於facebook, 除O左main site, microsoft都出O左official client好耐, 可以起下面條link搵倒.
http://forum.xda-developers.com/showthread.php?t=489379
aiya... 人越老越唔想搞唔多嘢, 以前好享受 tweaking, 而家享受用多啲...
多謝報料 Facebook!!
其實cooked rom唔等於要tweak部機, cooked rom係幫你tweak好晒部機同裝好晒O的software比你, 例如opera mobile and flashlite3.1, 一flash完就有齊大部份O既software.
我意思話唔想裝過哂啲嘢啫... 以前好鍾意搞呢啲嘢, 而家老咗啲嘢行得走得就算...
發佈留言